ઊંઘતા હશોને ત્રાટકશે વાવાઝોડું અર્નબ? હવામાન વિભાગે આપ્યું નવું અપડેટ, જાણો ક્યાં મચાવશે તબાહી

Cyclone Arnab: સોમવારે બંગાળની ખાડીમાં સર્જાયેલું ઊંડું દબાણ વાવાઝોડામાં પરિણમ્યું છે. મંગળવારે અર્નબ વાવાઝોડું તીવ્ર બનીને એક ગંભીર ચક્રવાતી તોફાનમાં પરિણમશે. આગામી થોડા કલાકોમાં તે આંધ્રપ્રદેશના દરિયાકાંઠે ટકરાઈ શકે છે. હવામાન વિભાગે તેના લેન્ડફોલના સમયની આગાહી કરી છે. જે મુજબ, વાવાઝોડું અર્નબ જ્યારે તમે સૂતા હશો ત્યારે તબાહી મચાવશે. IMD અનુસાર, તે રાત્રે 2થી 4 વાગ્યાની વચ્ચે દરિયાકાંઠે ટકરાઈ શકે છે.

વાવાઝોડું અર્નબને લઈને તૈયારીઓ

આંધ્ર પ્રદેશ અને ઓડિશાએ અત્યંત ગંભીર ચક્રવાતી વાવાઝોડા અર્નબને લઈને લગભગ 4,000 આશ્રયસ્થાનો તૈયાર કર્યા છે. હજારો લોકોને સ્થળાંતરિત કરવામાં આવ્યા છે અને આપત્તિ વ્યવસ્થાપન કર્મચારીઓ સતર્ક છે. વાવાઝોડાને ધ્યાનમાં રાખીને મંગળવારે વિજયવાડા અને વિશાખાપટ્ટનમ એરપોર્ટ પર આશરે 21 ફ્લાઇટ્સ રદ કરવામાં આવી હતી.

આવી રહ્યું છે ખતરનાક વાવાઝોડું, આ વિસ્તારોમાં ભૂકા બોલાવશે વરસાદ, હવામાન વિભાગની મોટી આગાહી

અર્નબ ક્યારે લેન્ડફોલ કરશે?

ભારતીય હવામાન વિભાગે ચક્રવાત અર્નબ અંગે ચેતવણી જારી કરી છે. તેની ગતિ વધુ હોવાને કારણે, તે વહેલા લેન્ડફોલ થવાની ધારણા છે. 28 ઓક્ટોબરના વહેલી સવારે 2થી 4 વાગ્યાની વચ્ચે તે દરિયાકાંઠે પહોંચી શકે છે.

વિશાખાપટ્ટનમમાં ભારે વરસાદ

વાવાઝોડા અર્નબની અસરને કારણે મંગળવારે આંધ્રપ્રદેશના વિશાખાપટ્ટનમ જિલ્લામાં ભારે વરસાદ અને ભારે પવનને કારણે સામાન્ય જનજીવન ખોરવાઈ ગયું. શહેરમાં અનેક સ્થળોએ વૃક્ષો ધરાશાયી થયા અને વીજ લાઈનો તૂટી ગઈ, જેના કારણે ઘણા વિસ્તારોમાં વીજળી સંપૂર્ણપણે ખોરવાઈ ગઈ.

નેપાળમાં હાઈ એલર્ટ

બંગાળની ખાડીમાં સર્જાતા વાવાઝોડા અર્નબને કારણે ભારે વરસાદ, ભારે પવન અને હિમવર્ષા થવાની શક્યતાને કારણે નેપાળમાં રાષ્ટ્રીય આપત્તિ જોખમ ઘટાડા અને વ્યવસ્થાપન સત્તામંડળ (NDRMA)એ 29 થી 31 ઓક્ટોબર સુધી લોકોને હાઈ એલર્ટ પર રહેવા અપીલ કરી છે.

દક્ષિણ મધ્ય રેલવેએ આપી સલાહ

દક્ષિણ મધ્ય રેલવે (SCR)એ વાવાઝોડા અર્નબને ધ્યાનમાં રાખીને લોકો માટે મુસાફરી સલાહ જાહેર કરી છે. વાવાઝોડાને કારણે તેલંગાણા, આંધ્રપ્રદેશ અને પડોશી રાજ્યોના ઘણા ભાગોમાં ભારે વરસાદ થવાની ધારણા છે. હવામાન પરિસ્થિતિઓ અને સલામતીની ચિંતાઓના આધારે, ટ્રેન સેવાઓ રદ, રૂટ બદલી અથવા ફરીથી શેડ્યૂલ કરવામાં આવી શકે છે.