દિવાળી પર સરકારની મોટી ભેટ, આ લોકોને મળશે મફત LPG સિલિન્ડર, સીધા ખાતામાં જમા થશે પૈસા

Free LPG Cylinder : દિવાળીનો તહેવાર નજીક આવી રહ્યો છે અને તે પહેલાં મફત એલપીજી સિલિન્ડર આપવાની તૈયારીઓ ચાલી રહી છે. ત્યારે તમારા મનમાં પણ સવાલ હશે કે આ મફત એલપીજી સિલિન્ડર યોજનાનો લાભ કોને મળશે અને કોને નહીં? આ તમામ વિગતો આ લેખમાં જાણીશું.

કોને મળશે લાભ?

દિલ્હીના રહેવાસીઓને દિવાળીના અવસર પર મફત એલપીજી સિલિન્ડરનો લાભ મળશે. થોડા મહિના પહેલાં દિલ્હીના મુખ્યમંત્રી રેખા ગુપ્તાએ જાહેરાત કરી હતી કે દિલ્હીમાં રેશન કાર્ડ ધરાવતા તમામ પરિવારોને વાર્ષિક ધોરણે બે એલપીજી સિલિન્ડરની કિંમત જેટલી આર્થિક સહાય આપવામાં આવશે. તેમણે જણાવ્યું હતું કે આ સહાય હોળી અને દિવાળીના તહેવારો પર આપવામાં આવશે. તેમણે વધુમાં જણાવ્યું હતું કે સિલિન્ડર માટેની નિર્ધારિત રકમ ડાયરેક્ટ બેનિફિટ ટ્રાન્સફર (DBT) દ્વારા આધાર-લિંક્ડ બેંક ખાતામાં સીધી જમા કરવામાં આવશે.

મુખ્યમંત્રીએ કહ્યું હતું કે, દિલ્હીમાં રેશન કાર્ડ ધરાવતા તમામ પરિવારોને આ યોજના હેઠળ આવરી લેવામાં આવશે. આ યોજના તમામ રેશન કાર્ડ ધારકોને લાગુ પડશે, પછી ભલે તેઓ રસોઈ માટે એલપીજીનો ઉપયોગ કરતા હોય કે પાઈપ્ડ નેચરલ ગેસ (PNG) કનેક્શનનો. વર્ષમાં બે વાર હોળી અને દિવાળી પર આર્થિક સહાય આપવામાં આવશે, ભલે તે મહિના દરમિયાન સિલિન્ડર રિફિલ ખરીદવામાં આવ્યું હોય કે ન હોય. આ યોજના પાછળ વાર્ષિક અંદાજે ₹242.77 કરોડનો ખર્ચ થવાનો અંદાજ છે. એલપીજીના ભાવમાં વધઘટ, ભારત સરકારની સબસિડી અને લાભાર્થીઓની સંખ્યાના આધારે આ ખર્ચમાં ફેરફાર થઈ શકે છે.

સિલિન્ડરનો વર્તમાન ભાવ શું છે?

ઘરગથ્થુ રસોઈ માટે વપરાતા એલપીજીની કિંમત છેલ્લા કેટલાક મહિનાઓથી સ્થિર રહી છે. રાષ્ટ્રીય રાજધાની દિલ્હીમાં 14.2 કિલોના સિલિન્ડરની કિંમત ₹942 છે. ઉલ્લેખનીય છે કે માર્ચ અને જૂન વચ્ચે પશ્ચિમ એશિયાના સંકટના કારણે ભાવમાં થયેલા વધારાને કારણે પુરવઠામાં અવરોધ આવતાં ઘરેલું રસોઈ ગેસની કિંમતમાં સિલિન્ડર દીઠ ₹89નો વધારો કરવામાં આવ્યો હતો.

જોકે, 19 કિલોના કોમર્શિયલ LPG સિલિન્ડરની કિંમતમાં ₹62.59નો વધારો કરવામાં આવ્યો છે. સપ્ટેમ્બરમાં 19 કિલોના કોમર્શિયલ LPG સિલિન્ડરની કિંમતમાં ₹9.50નો વધારો થયો હતો. તે પહેલાં જુલાઈ અને ઓગસ્ટમાં કિંમતોમાં અનુક્રમે ₹183.50 અને ₹192નો ઘટાડો કરવામાં આવ્યો હતો.

ઉત્તર પ્રદેશના લોકોને પણ ભેટ

ઉત્તર પ્રદેશમાં યોગી સરકાર પણ દિવાળીના અવસર પર ઉજ્જવલા યોજનાના લાભાર્થીઓને મફત LPG સિલિન્ડર આપે છે. દિવાળી ઉપરાંત યોગી સરકાર હોળી દરમિયાન પણ લાભાર્થીઓને આ ભેટ આપે છે. ઉત્તર પ્રદેશમાં 1.5 કરોડથી વધુ લાભાર્થીઓ આ યોજના હેઠળ આવરી લેવામાં આવ્યા છે.