Doodh Poha Recipe: શરદ પૂનમ સ્પેશિયલ દૂધ પૌવા બનાવવાની રીત, આ રીત ફોલો કરશો તો ખીર કરતાં વધારે ટેસ્ટી બનશે દૂધ પૌવા

Doodh Poha Recipe: શરદ પૂર્ણિમા વર્ષ દરમિયાન આવતી અન્ય પૂનમ કરતાં ખાસ હોય છે. કહેવાય છે કે આ પૂનમ એવી છે જેમાં ચંદ્ર સોળે કળાએ ખીલેલો હોય છે. શરદ પૂર્ણિમાને રાસ પૂર્ણિમા પણ કહેવામાં આવે છે. શરદ પૂર્ણિમા સાથે અન્ય એક પ્રથા વર્ષોથી જોડાયેલી છે. આ પ્રથા છે દૂધ પૌવાનો પ્રસાદ ખાવાની. પૂનમની રાત્રે ઘરમાં દૂધ પૌવા બને છે, પછી તેને ચંદ્ર પ્રકાશમાં રાખવામાં આવે છે અને પછી પરિવારના લોકો દૂધ પૌવાનો પ્રસાદ લે છે.

આ પણ વાંચો: Kalakand: ફાટેલા દૂધમાંથી ઘરે બનાવો કલાકંદ, સ્વાદિષ્ટ કલાકંદ બનાવવા ફાટેલા દૂધ સિવાય ફક્ત 4 વસ્તુઓની જરૂર પડશે

શરદ પૂર્ણિમાની રાત્રે બનતા દૂધ પૌવાનું મહત્વ શું છે, શા માટે દૂધ પૌવા ખાવા જોઈએ અને આ દૂધ પૌવા બનાવવાની રીત કઈ છે ચાલો આજે બધું જ તમને જણાવીએ.

શરદ પૂર્ણિમાના દૂધ પૌવાનું મહત્વ

શાસ્ત્રો અનુસાર શરદ પૂર્ણિમાનો ચંદ્ર સોળેકળાએ ખીલેલો હોય છે. આ રાત્રે દૂધ પૌવા બનાવી ચંદ્રના પ્રકાશમાં રાખી તેને ખાવાથી દૂધમાં ઔષધીય ગુણ વધે છે. આ ગુણ શરીરને ફાયદો કરે છે. આ સિવાય એવી પણ માન્યતા છે કે શરદ પૂર્ણિમાની રાત્રે આકાશમાંથી અમૃત વરસે છે. એટલા માટે ચંદ્ર પ્રકાશમાં રાખેલા દૂધ પૌવા પણ ઔષધીય બની જાય છે. જો કે આ વાતનો કોઈ વૈજ્ઞાનિક પુરાવો નથી. આયુર્વેદ અનુસાર ચંદ્ર પ્રકાશમાં રાખેલા પૌવા શરીરમાં શીતળતા વધારે છે જે પિત્તને શાંત કરે છે.

દૂધ પૌવા માટેની સામગ્રી

1 લીટર ફૂલ ફેટ દૂધ
અડધો કપ જાડા પૌવા
એલચી પાવડર
અડધો કપ ખાંડ
ડ્રાયફ્રુટ્સ જરુર અનુસાર
કેસર

આ પણ વાંચો: Thalipeeth Recipe: સવારના નાસ્તામાં ખાવાની મજા પડે તેવી જુવારના લોટની થાલીપીઠ બનાવવાની રીત

દૂધ પૌવા બનાવવાની રીત

- સૌથી પહેલા જાડા તળીયાના વાસણમાં દૂધ ગરમ કરવા મુકો. દૂધને સતત હલાવતા રહો જેથી દૂધ બળે નહીં.
- દૂધ ઉકળવા લાગે એટલે ગેસ સ્લો કરો અને ધીમા તાપે દૂધને 5 થી 10 મિનિટ ઉકાળો જેથી દૂધ ઘટ્ટ થઈ જાય.
- બીજી તરફ પૌવાને પાણીમાં પલાળી 2 વખત પાણીથી સાફ કરો જેથી તેની ગંદકી નીકળી જાય. 
- પલાળેલા પૌવાને સાઈડ પર રાખો જે તે બરાબર ફુલી જાય.
- દૂધ ઘટ્ટ થઈ જાય એટલે તેમાં ડ્રાયફ્રુટ્સ, કેસર અને ખાંડ ઉમેરી દો.
- ખાંડ ઓગળે ત્યાં સુધી દૂધ હલાવો અને પછી તેમાં પલાળેલા પૌવા ઉમેરી દો. 
- પૌવા ઉમેર્યા પછી દૂધને 5 મિનિટ ઉકાળો અને એલચી પાવડર ઉમેરી ગેસ બંધ કરો. 
- તૈયાર કરેલા પૌવાને ઠંડા કરવા ચંદ્રના પ્રકાશમાં મુકો. દૂધ પૌવા ઠંડા થઈ જાય એટલે પરિવાર સાથે સ્વાદિષ્ટ અને ઠંડા દૂધ પૌવાની મજા માણો.

(Disclaimer: અહીં આપવામાં આવેલી માહિતી સામાન્ય માન્યતાઓ અને જાણકારી પર આધારિત છે. ZEE 24 કલાક તેની પુષ્ટિ કરતું નથી.)