Gujarat News Live: રાજ્ય સરકારની કેબિનેટ બેઠક, 15 દિવસની મેગા ડ્રાઈવમાં ઝડપાયા 38 બોગસ ડૉકટરો, દિવાળીના તહેવારમાં ફરી અમિત શાહ આવશે ગુજરાત

સુરત મનપા કમિશનર અધિકારીઓ પર લાલઘૂમ! કમિશનરની અધ્યક્ષતામાં યોજાઈ વિવિધ વિભાગોની કામગીરીની સમીક્ષા બેઠક. અનેક વિભાગોની કામગીરી સામે નારાજગી વ્યક્ત કરાઈ. ગુણતાની બ્રિજ પર રિપેરિંગ બાદ પણ રસ્તો ફરી તૂટી જતાં કમિશનર નારાજ. રિપેરિંગ પાછળ ખર્ચ કરવા છતાં રસ્તાની હાલત ન સુધરતાં સવાલો. રસ્તાની કામગીરીની ગુણવત્તા અને અધિકારીઓના નિરીક્ષણ સામે ઊભા થયા પ્રશ્નો. સમગ્ર મામલે તપાસ કરી તાત્કાલિક અહેવાલ રજૂ કરવા સૂચના. ગાર્ડન વિભાગની કામગીરી સામે પણ કમિશનરે અસંતોષ વ્યક્ત કર્યો. શહેરમાં બ્યુટિફિકેશનના અભાવ અંગે અધિકારીઓને ટકોર. ઠેરઠેર ગાર્ડન વેસ્ટના ઢગલા જોવા મળતાં નારાજગી. ગાર્ડન અને ઝોન વિભાગ વચ્ચે જવાબદારી ઢોળવાની વૃત્તિ સામે ટકોર. કચરો ઉપાડવાની જવાબદારી એકબીજા પર ઢોળવાને બદલે કામગીરી કરવા સૂચના. સ્ટાફ અને મશીનરીની અછત હોય તો જરૂરી માંગણી કરવા આદેશ. રોડ ડિવાઈડર અને રસ્તાઓની સફાઈમાં ઝડપ લાવવા તાકીદ. આરોગ્ય વિભાગને પણ કામગીરી ઝડપી બનાવવા સૂચના. દિવાળી પહેલાં તમામ બાકી કામો પૂર્ણ કરી શહેરને સ્વચ્છ અને સુઘડ બનાવવા કમિશનરનો આદેશ.

દિવાળીના તહેવારો ટાણે ગોરવા પોલીસની મોટી કાર્યવાહી. પોલીસ દ્વારા ગેરકાયદે ફટાકડાના વેચાણ સામે લાલ આંખ. ફાયર સેફ્ટી અને જાહેરનામાના નિયમોનું ભંગ કરનાર 2 સ્ટોર ધારકો સામે ગુનો દાખલ. લાયસન્સ વગર ફટાકડા વેચાણ કરતા સ્ટોલ પોલીસે તાત્કાલિક બંધ કરાવ્યા. મોડી રાત સુધી ભીડભાડવાળા વિસ્તારો અને બજારોમાં ગોરવા પોલીસનું સઘન પેટ્રોલિંગ. લાઈસન્સ ધારકોને પોલીસ કમિશનરના જાહેરનામાનું ચુસ્ત પાલન કરવા અપાઈ સૂચના. નિયમોનું પાલન ન કરનારા ફટાકડા વેપારીઓમાં પોલીસ કાર્યવાહીથી ફફડાટ.

પીએમ આવાસ યોજનામાં દુકાન અપાવવાના નામે ભાજપ નેતાના પુત્રનું વધુ એક કૌભાંડ. મહાનગરપાલિકાના ખોટા સિક્કા-સહી કરી ભાજપ નેતાના પુત્ર અને ટોળકીએ આચરી ₹9.05 લાખની ઠગાઈ. MGVCLના આસિસ્ટન્ટ લાઇનમેન સાથે પીએમ આવાસ યોજનાની દુકાનના નામે છેતરપિંડી. સુભાનપુરાની ઝાંસી રાણી હાઉસિંગ યોજનાની દુકાન અપાવવાની લાલચ આપી ટુકડે-ટુકડે નાણાં પડાવ્યા. કશ્યપ જોષીની ઓળખ 'ગુજરાત હાઉસિંગ બોર્ડના અધિકારી' તરીકે આપી આચરવામાં આવી ઠગાઈ. મહાનગરપાલિકા અને સબ રજિસ્ટ્રાર કચેરીના બોગસ સહી-સિક્કાવાળા બનાવટી દસ્તાવેજો બનાવી આપ્યા. લાંબા સમય સુધી દુકાનનો કબજો ન મળતાં અને તપાસ કરાવતાં કૌભાંડનો થયો ખુલાસો. ભાજપ નેતાના પુત્ર કશ્યપ જોષી, જીલ બારોટ, રોહન સોલંકી અને શુભમ મહાવર સામે ગોરવા પોલીસ મથકમાં ગુનો નોંધાયો.

વડોદરાના સેવાસી રોડ પર રહેતા પારેખ પરિવારનો વ્હાલસોયો આફ્રિકન ગ્રે પેરોટ 'લડ્ડુ' અચાનક ગુમ થઈ જતાં પરિવારજનો લડ્ડુને પક્ષી નહીં પણ પોતાના દીકરાની જેમ રાખતા હતા અને તેની સારસંભાળ માટે જેસિકાબેને પોતાની ખાનગી શાળાની નોકરી પણ છોડી દીધી હતી. પોપટની યાદમાં જેસિકાબેને છેલ્લા ૪ દિવસથી અન્નનો દાણો પણ લીધો નથી અને ખાલી પાંજરું જોઈ આખો પરિવાર રડી રહ્યો છે. સમગ્ર આસપાસના વિસ્તારમાં શોધખોળ કર્યા બાદ પણ પત્તો ન લાગતાં, પરિવારે લડ્ડુને શોધી આપનાર વ્યક્તિ માટે રૂ. ૧ લાખનું ઈનામ જાહેર કર્યું છે.

દિવાળીના તહેવારોમાં વતન સૌરાષ્ટ્ર અને ઉત્તર ગુજરાત જવા માટે સુરતમાં એસ.ટી. બસનું એડવાન્સ અને ગ્રુપ બુકિંગ ફુલ થઈ ગયું છે. એસ.ટી. નિગમની ‘ઘર આંગણે બસ’ યોજનાને ભારે પ્રતિસાદ મળ્યો છે, જે અંતર્ગત ૧૯૭ બસોનું ગ્રુપ બુકિંગ અને ૧૮૫ બસોનું એડવાન્સ બુકિંગ થઈ ચૂક્યું છે. મુસાફરોના ભારે ઘસારાને પહોંચી વળવા મુકાયેલી ૮૮ એક્સ્ટ્રા બસો પણ હાઉસફુલ થઈ ગઈ છે. નિગમ દ્વારા ડેપો પર સુચારુ સંચાલન માટે વધારાનો સ્ટાફ તૈનાત કરી મોનિટરિંગ કડક બનાવી દેવામાં આવ્યું છે.

મહેસાણાના ઝોનલ ઓબ્ઝર્વેશન હોમ ખાતેથી કાયદાના સંઘર્ષમાં આવેલા ત્રણ બાળ કિશોરો સિક્યુરિટી ગાર્ડે દરવાજો ખોલતા જ ભાગી છૂટ્યા હતા. ઘટનાને પગલે સક્રિય થયેલી મહેસાણા પોલીસની ટીમે સીસીટીવી ફૂટેજ આધારિત સઘન શોધખોળ હાથ ધરી હતી. કલાકોની જહેમત બાદ પોલીસે ત્રણેય કિશોરોને શોધી કાઢીને સફળતાપૂર્વક ઝડપી લીધા છે.

મુખ્યમંત્રી ભૂપેન્દ્ર પટેલના અધ્યક્ષસ્થાને આજે મહત્વપૂર્ણ કેબિનેટ બેઠક મળવા જઈ રહી છે. આ બેઠકમાં રાજ્યમાં પ્રવર્તતી દુષ્કાળની સ્થિતિ અને તેના નિવારણ અંગેના પગલાંની ઉચ્ચસ્તરીય સમીક્ષા કરવામાં આવશે. આ ઉપરાંત, રાજ્ય સરકારના કર્મચારીઓને ૩ ટકા મોંઘવારી ભથ્થું (DA) મંજૂર કરવા અંગે પણ કોઈ મોટો નિર્ણય લેવાય તેવી પ્રબળ સંભાવના છે.
 

લોકોના આરોગ્ય અને જિંદગી સાથે ચેડાં કરતા બોગસ ડૉક્ટરો સામે રાજ્યના આરોગ્ય મંત્રીએ કડક વલણ અપનાવ્યું છે. તંત્ર દ્વારા હાથ ધરાયેલી ૧૫ દિવસની વિશેષ મેગા ડ્રાઇવ દરમિયાન રાજ્યભરમાંથી ૩૮ બોગસ ડૉક્ટરોને ઝડપી પાડવામાં આવ્યા છે. નાગરિકોના સ્વાસ્થ્ય સુરક્ષાને ધ્યાનમાં રાખીને ગેરકાયદેસર રીતે તબીબી પ્રેક્ટિસ કરતા આવા તત્વો સામે આ સમગ્ર રાજ્યવ્યાપી મેગા ડ્રાઇવ આગામી સમયમાં પણ સતત ચાલુ રહેશે.

કેન્દ્રીય ગૃહમંત્રી અમિત શાહ દિવાળીના તહેવાર પ્રસંગે પોતાના વતન ગુજરાતની મુલાકાતે આવી રહ્યા છે. આ પ્રવાસ દરમિયાન તેઓ ૯ નવેમ્બરે અમદાવાદમાં NHAI દ્વારા નિર્મિત એસ.જી. હાઇવે પર ઇસ્કોનથી સરખેજ સુધીના એલિવેટેડ કોરિડોર/ફ્લાયઓવરનું ઉદ્ઘાટન કરશે. આ ઉપરાંત, તેઓ જોધપુરમાં AMC દ્વારા તૈયાર કરાયેલા ‘નોલેજ હબ’ અને ગોતામાં નવા બનેલા ‘અર્બન હેલ્થ સેન્ટર’નું પણ લોકાર્પણ કરશે. સાથોસાથ, સ્ટેડિયમ વોર્ડ ખાતે યોજાનારા આવાસ યોજનાના ખાતમુહૂર્ત અને લોકાર્પણ કાર્યક્રમમાં પણ ગૃહમંત્રી વિશેષ હાજરી આપશે.