ખેડાના કઠાણા ગામમાં વીજ કરંટ લાગતાં બે લોકોનાં મોત, ખેતરમાં પાણીની કુંડી સાફ કરતી વખતે બની દુર્ઘટના

Kheda : ખેડા જિલ્લાના કઠલાલ તાલુકાના કઠાણા ગામમાં વીજ કરંટ લાગવાની ગોઝારી ઘટના સામે આવી છે. ખેતરમાં પાણીની કુંડી સાફ કરતી વખતે વીજ કરંટ લાગતાં બે લોકોનાં ઘટનાસ્થળે જ મોત નીપજ્યાં હતાં, જ્યારે અન્ય એક વ્યક્તિ ઈજાગ્રસ્ત થયો હતો. એકસાથે બે લોકોનાં મોતની ઘટનાથી સમગ્ર વિસ્તારમાં શોકની લાગણી પ્રસરી ગઈ છે. બનાવની જાણ થતાં કઠલાલ પોલીસ તાત્કાલિક ઘટનાસ્થળે પહોંચી હતી અને આગળની કાર્યવાહી હાથ ધરી હતી.

પાણીની કુંડી સાફ કરતી વખતે સર્જાયો અકસ્માત

પ્રાપ્ત વિગતો અનુસાર, કઠાણા ગામના એક ખેતરમાં પાણીની કુંડી સાફ કરવાની કામગીરી ચાલી રહી હતી. આ દરમિયાન ત્રણ લોકો કુંડીની સફાઈ કરી રહ્યા હતા. કુંડી સાફ કરવા માટે લાંબા સળિયાનો ઉપયોગ કરવામાં આવી રહ્યો હતો. જોકે, આ સળિયો ઉપરથી પસાર થતી વીજલાઇનને અડી જતાં અચાનક વીજ કરંટ લાગ્યો હતો.

દિવાળીએ વતન જતા મુસાફરો માટે ખુશખબર, GSRTC દોડાવશે 1600થી વધુ એક્સ્ટ્રા બસો

વીજ કરંટની ઝપેટમાં ત્રણ લોકો આવી જતાં ઘટનાસ્થળે અફરાતફરી મચી ગઈ હતી. આ દુર્ઘટનામાં બે લોકોનાં ઘટનાસ્થળે જ કરુણ મોત નીપજ્યાં હતાં. જ્યારે અન્ય એક વ્યક્તિને ઈજાઓ પહોંચતાં તેને તાત્કાલિક સારવાર માટે કઠલાલની ખાનગી હોસ્પિટલમાં ખસેડવામાં આવ્યો હતો.

બે લોકોનાં મોતથી ગામમાં શોકની લાગણી

ખેતરમાં બનેલી આ દુર્ઘટનાની જાણ થતાં આસપાસના લોકો ઘટનાસ્થળે એકત્રિત થઈ ગયા હતા. એક જ ઘટનામાં બે વ્યક્તિઓનાં મોત થતાં કઠાણા ગામ અને આસપાસના વિસ્તારમાં અરેરાટી વ્યાપી ગઈ હતી. ઘટનાને પગલે મૃતકોના પરિવારજનોમાં શોકનો માહોલ છવાયો હતો.

પોલીસે તપાસ હાથ ધરી

બનાવની માહિતી મળતાં કઠલાલ પોલીસની ટીમ ઘટનાસ્થળે પહોંચી હતી. પોલીસે જરૂરી કાર્યવાહી કર્યા બાદ બંને મૃતદેહોને પોસ્ટમોર્ટમ માટે સામૂહિક આરોગ્ય કેન્દ્ર ખાતે ખસેડ્યા હતા. આ દુર્ઘટના કયા સંજોગોમાં બની અને અન્ય જરૂરી વિગતો જાણવા માટે પોલીસ દ્વારા તપાસ હાથ ધરવામાં આવી છે.