12 દિવસ ઘરમાં કેદ, ₹8 કરોડની લૂંટ...ડિજિટલ અરેસ્ટનો ચોંકાવનારો કિસ્સો, અમદાવાદ ક્રાઈમ બ્રાન્ચે આરોપીને દબોચ્યો

ઉદય રંજન, અમદાવાદ : અમદાવાદના એક સિનિયર સિટીઝનને 12 દિવસ સુધી ડિજિટલ અરેસ્ટ કરી કરોડો રૂપિયા પડાવનાર આરોપી અલ્તાફ ઉર્ફે મેમણ પીઠડીયા મૂળ ભાવનગરના તળાજાનો વતની છે. ડિજિટલ અરેસ્ટનો આ ગુનો નોંધાયા બાદથી જ તે પોલીસથી બચવા માટે સુરત ખાતે છુપાઈને રહેતો હતો.

સુરત પોલીસને આ અંગે બાતમી મળતા જ તેમણે બાજ નજર રાખીને અલ્તાફને ઝડપી પાડ્યો હતો અને બાદમાં તેને વધુ તપાસ માટે અમદાવાદ શહેર ક્રાઈમ બ્રાન્ચને સોંપ્યો છે. આ આરોપીએ પોતાની ગેંગના અન્ય સાગરીતો સાથે મળીને સિનિયર સિટીઝન ડૉક્ટરને ડિજિટલ અરેસ્ટ કર્યા હતા અને 8 કરોડ રૂપિયા પડાવ્યા હતા.

સિનિયર સિટીઝન ડરાવી-ધમકાવી કરોડો ખંખેર્યા

આ ગુનાની વિગતવાર વાત કરીએ તો, સાયબર ઠગોએ અમદાવાદના સિનિયર સિટીઝન ડૉક્ટરને પૂરા 12 દિવસ સુધી ડિજિટલ અરેસ્ટ રાખ્યા હતા. ઈડી અને અન્ય તપાસ એજન્સીઓના નામે ડરાવી-ધમકાવીને તથા સુપ્રીમ કોર્ટના ખોટા લેટર મોકલીને તેમની પાસેથી કરોડો રૂપિયા પડાવવામાં આવ્યા હતા.

અધધ...ગુજરાતમાંથી ઝડપાયું ₹19.41 કરોડનું વિદેશી સોનું, DRIએ ત્રણની કરી ધરપકડ

આ મામલે અગાઉ ક્રાઈમ બ્રાન્ચે પ્રાથમિક તપાસ કરીને 56 લાખ રૂપિયા બેંકમાં સીઝ કરાવ્યા હતા. આ કેસની ઊંડાણપૂર્વક તપાસ કરતા અગાઉ આસિફ શાહ ઉર્ફે ભદો પઠાણ, વિકાસકુમાર સિંહ, પપ્પુસિંગ પરિહાર અને સોહીબસા પઠાણની ધરપકડ કરવામાં આવી ચૂકી છે.

પકડાયેલા આરોપી અલ્તાફ પીઠડીયાએ ભાવનગર ખાતે બોગસ બેંક એકાઉન્ટ્સ ખોલાવ્યા હતા અને આ ઠગાઈના નાણાં તેમાં ટ્રાફિક કરાવ્યા હતા. અલ્તાફ આ એકાઉન્ટ્સમાંથી 15 લાખ રૂપિયા વિડ્રો કરીને અન્ય મુખ્ય આરોપીઓ સુધી પહોંચાડતો હતો, જે બદલ તેને 2 ટકા જેટલું કમિશન મળતું હતું.

અલ્તાફ સામે અગાઉ પણ ગુના નોંધાયેલા છે

આરોપી અલ્તાફનો રેકોર્ડ તપાસતા સામે આવ્યું છે કે તેની સામે અગાઉ પણ ભાવનગર, સુરેન્દ્રનગર અને હરિયાણામાં ગુના નોંધાયેલા છે. એટલું જ નહીં, હરિયાણામાં પણ ડિજિટલ અરેસ્ટના એક ગુનામાં તેની અગાઉ ધરપકડ થઈ ચૂકી છે. આ કૌભાંડ કેટલું મોટું છે તેનો અંદાજ એ વાત પરથી લગાવી શકાય કે અલ્તાફ દેશની અન્ય કઈ-કઈ સાયબર ક્રિમિનલ્સ ગેંગના સંપર્કમાં હતો અને તેણે આ ઉપરાંત અન્ય કેટલા લોકો સાથે છેતરપિંડી કરી છે, તે અંગે અમદાવાદ ક્રાઈમ બ્રાન્ચે સઘન તપાસ શરૂ કરી છે. 

આગામી દિવસોમાં આરોપીના રિમાન્ડ દરમિયાન વધુ ચોંકાવનારા ખુલાસા થવાની પૂરેપૂરી શક્યતા છે વડીલો અને સિનિયર સિટીઝનોને નિશાન બનાવતી આ સાયબર ગેંગના એક પછી એક સાગરીતો હવે કાયદાના સકંજામાં આવી રહ્યા છે. પોલીસની આ કડક કાર્યવાહીથી સાયબર ફ્રોડ આચરનારા તત્વોમાં મોટો ફફડાટ વ્યાપી ગયો છે.