સ્મૃતિ મંધાના ત્રણેય ફોર્મેટમાં ભારતીય મહિલા ટીમની કેપ્ટન, BCCIએ કરી જાહેરાત

Smriti Mandhana Captain : BCCIએ સત્તાવાર રીતે જાહેરાત કરી છે કે મહિલા ક્રિકેટ ટીમની કમાન સ્ટાર બેટ્સમેન સ્મૃતિ મંધાનાને સોંપવામાં આવી છે. હરમનપ્રીત કૌરે કેપ્ટનશીપ છોડ્યા બાદ મંધાનાને ત્રણેય ફોર્મેટ ટેસ્ટ, વન-ડે અને T20માં ભારતીય મહિલા ટીમની નવી નિયમિત કેપ્ટન તરીકે નિયુક્ત કરવામાં આવી છે. 2013માં આંતરરાષ્ટ્રીય ક્રિકેટમાં પદાર્પણ કર્યા પછી, સ્મૃતિ લાંબા સમયથી વાઇસ-કેપ્ટન તરીકે સેવા આપી રહી છે અને તેનો અનુભવ ભારતીય ક્રિકેટને નવા યુગમાં લઈ જવામાં નિર્ણાયક સાબિત થશે.

સ્મૃતિ મંધાનાની શાનદાર કારકિર્દી

સ્મૃતિ મંધાના પાસે માત્ર આંતરરાષ્ટ્રીય ક્રિકેટમાં જ નહીં, પરંતુ ફ્રેન્ચાઇઝી અને સ્થાનિક લીગમાં પણ કેપ્ટનશીપનો વ્યાપક અનુભવ છે. તેના નેતૃત્વ હેઠળ, રોયલ ચેલેન્જર્સ બેંગલુરુ (RCB)એ 2024 અને 2026માં વિમેન્સ પ્રીમિયર લીગનો ખિતાબ જીત્યો હતો. આંતરરાષ્ટ્રીય સ્તરે, તેણે અગાઉ જરૂરિયાતના સમયે 18 T20 અને 4 વન-ડે મેચોમાં ભારતનું નેતૃત્વ કર્યું છે. BCCIને અપેક્ષા છે કે મંધાનાની દ્રષ્ટિ અને વ્યૂહાત્મક કુશળતા ટીમ ઈન્ડિયાની સફળતાને નવી ઊંચાઈઓ પર લઈ જશે.

કેપ્ટન બન્યા બાદની પ્રતિક્રિયા

કેપ્ટન તરીકે નિયુક્ત થયા બાદ પ્રતિક્રિયા આપતા સ્મૃતિ મંધાનાએ કહ્યું કે, ભારતીય ટીમની કમાન સંભાળવી એ મારા માટે ખૂબ જ ખાસ અને ગૌરવપૂર્ણ ક્ષણ છે. દેશનું પ્રતિનિધિત્વ કરવું મારા માટે હંમેશાં ખૂબ મહત્વનું રહ્યું છે અને ટીમનું નેતૃત્વ કરવાની તક એવો અનુભવ છે જેને હું હંમેશાં યાદ રાખીશ. મારા પર વિશ્વાસ મૂકવા બદલ હું BCCI, પસંદગીકારો, મારી સાથી ખેલાડીઓ અને ચાહકોનો આભાર માનું છું. હું હરમનપ્રીતના અમૂલ્ય યોગદાનની પણ નોંધ લેવા માંગુ છું, જેણે હંમેશાં સમર્પણભાવ સાથે ટીમનું નેતૃત્વ કર્યું છે.

A dawn of a new era ✨ Smriti Mandhana takes charge as the Captain of the Indian Women's cricket team 🇮🇳 Go well, Captain 🫡 More details ▶️ https://t.co/tbLb4jOiCn #TeamIndia | @mandhana_smriti https://t.co/27AxmrUhKt

— BCCI (@BCCI) October 6, 2026

BCCI પ્રમુખે પણ અભિનંદન પાઠવ્યા

મંધાનાને તેની નિમણૂક બદલ અભિનંદન આપતા BCCI પ્રમુખ મિથુન મન્હાસે કહ્યું કે, ભારતીય મહિલા ક્રિકેટ ટીમની જવાબદારી સંભાળવા બદલ હું સ્મૃતિ મંધાનાને અભિનંદન આપું છું. તે વર્ષોથી ભારતીય ક્રિકેટનો અભિન્ન અંગ રહી છે અને તેણે સતત મોખરે રહીને નેતૃત્વ કરવાની ક્ષમતા દર્શાવી છે. રમત પ્રત્યેની તેની સમજ અને તેનો અનુભવ આ નવી ભૂમિકામાં અમૂલ્ય સાબિત થશે. BCCIને મંધાના પર પૂરો વિશ્વાસ છે અને અમને ખાતરી છે કે તે તેની આગવી વ્યાવસાયિકતા સાથે ટીમને નવી ઊંચાઈઓ પર લઈ જશે.