ભારતે પ્રથમ T20માં વેસ્ટ ઈન્ડિઝને 8 વિકેટે હરાવ્યું, શ્રેયસ અય્યરની ધમાકેદાર સદી

India vs West Indies 1st T20 : ભારતે વેસ્ટ ઈન્ડિઝ સામેની T20 શ્રેણીની શરૂઆત 8 વિકેટની જીત સાથે કરી છે. ભારત રત્ન શ્રી અટલ બિહારી વાજપેયી એકાના ક્રિકેટ સ્ટેડિયમ ખાતે ટોસ હાર્યા બાદ પ્રથમ બેટિંગ કરતા વેસ્ટ ઈન્ડિઝની ટીમ 171 રનમાં ઓલઆઉટ થઈ ગઈ હતી. ભારતે બે વિકેટ ગુમાવીને 15મી ઓવરમાં જ આ ટાર્ગેટ હાંસલ કરી લીધો હતો. આ સાથે જ ભારતે પાંચ મેચની શ્રેણીમાં 1-0ની સરસાઈ મેળવી લીધી છે.

શ્રેયસ અય્યરે 42 બોલમાં ફટકારી સદી

ભારતીય ટીમની જીતનો હીરો કેપ્ટન શ્રેયસ અય્યર રહ્યો. તેણે માત્ર 42 બોલમાં પોતાની કારકિર્દીની પ્રથમ T20 આંતરરાષ્ટ્રીય સદી ફટકારી હતી. વેસ્ટ ઈન્ડિઝ સામે કોઈ ભારતીય બેટ્સમેન દ્વારા ફટકારવામાં આવેલી આ સૌથી ઝડપી સદી છે. અય્યર 102 રન બનાવીને અણનમ રહ્યો. 43 બોલની પોતાની ઇનિંગ્સ દરમિયાન તેણે 10 ચોગ્ગા અને 6 છગ્ગા ફટકાર્યા હતા. તેણે ઈશાન કિશન સાથે મળીને ત્રીજી વિકેટ માટે 67 બોલમાં 137 રનની ભાગીદારી નોંધાવી હતી.

ભારત માટે ઓપનર અભિષેક શર્માએ 10 બોલમાં 21 રન બનાવ્યા, જ્યારે સંજુ સેમસને 11 રન નોંધાવ્યા. ઈશાન કિશન 27 બોલમાં 37 રન બનાવી અણનમ રહ્યો. વેસ્ટ ઈન્ડિઝના તમામ બોલરો મોંઘા સાબિત થયા. રોસ્ટન ચેઝ અને અકીલ હોસેને એક-એક વિકેટ ઝડપી.

𝗚𝗹𝗼𝗿𝗶𝗼𝘂𝘀 𝗛𝗨𝗡𝗗𝗥𝗘𝗗! 💯 Captain Shreyas Iyer with his maiden T20I century and what a knock it's been! 👏 Updates ▶️ https://t.co/2czVyKWreK #TeamIndia | #INDvWI | @mflone_ | @ShreyasIyer15 https://t.co/WxO6smJbRZ

— BCCI (@BCCI) October 6, 2026

ભારતીય બોલરોનું શાનદાર પ્રદર્શન

ટોસ હાર્યા બાદ બેટિંગ કરવા ઉતરેલી વેસ્ટ ઈન્ડિઝની ટીમ 171 રનમાં ઓલઆઉટ થઈ ગઈ હતી. કેરેબિયન ટીમ માટે કેપ્ટન શાઈ હોપ અને શેરફેન રધરફોર્ડે શાનદાર અડધી સદી ફટકારી હતી, પરંતુ ભારતીય બોલરો, ખાસ કરીને સ્પિનરો સામે મહેમાન ટીમ લાંબો સમય ટકી શકી નહોતી.

મેચની શરૂઆતમાં જ ભારતીય બોલરોએ શાનદાર બોલિંગ પ્રદર્શન દ્વારા વેસ્ટ ઈન્ડિઝ પર પોતાની પકડ મજબૂત કરી લીધી હતી. ભારતને અર્શદીપ સિંહે પ્રથમ સફળતા અપાવી, જેણે ઘાતક યોર્કરથી કામિલ પુરનને બોલ્ડ કર્યો. ત્યારબાદ શિમરોન હેટમાયર રન આઉટ થયો. તે પછી તરત જ સ્પિનર અક્ષર પટેલે રોવમેન પોવેલને બોલ્ડ કર્યો.

ત્યારબાદ, કેપ્ટન શાઈ હોપે શેરફેન રધરફોર્ડ સાથે મળીને મોરચો સંભાળ્યો. આ જોડીએ ચોથી વિકેટ માટે 35 બોલમાં 63 રન જોડ્યા. હોપ 37 બોલમાં 52 રન બનાવીને આઉટ થયો. તેની ઇનિંગ્સમાં બે સિક્સ અને છ ચોગ્ગા આવ્યા.

નમન ધીરે ત્રણ વિકેટ ઝડપી

હોપના આઉટ થયા બાદ વિકેટો પડવાનો સિલસિલો શરૂ થયો. સ્કોર 135 સુધી પહોંચ્યો ત્યાં સુધીમાં ટીમે આઠ વિકેટ ગુમાવી દીધી હતી. શેરફેન રધરફોર્ડે અકીલ હોસેન સાથે મળીને ઇનિંગ્સને સંભાળી. આ જોડીએ 18 બોલમાં 36 રનની ભાગીદારી નોંધાવી અને મુલાકાતી ટીમને મજબૂત સ્થિતિમાં પહોંચાડી. રધરફોર્ડ 34 બોલમાં 56 રન બનાવીને આઉટ થયો. ભારત તરફથી, ડેબ્યૂ કરનાર નમન ધીરે ત્રણ વિકેટ ઝડપી, જ્યારે કુલદીપ યાદવ અને અક્ષર પટેલે બે-બે વિકેટ લીધી.