હરમનપ્રીત બાદ હવે કોણ બનશે ભારતીય ટીમની કેપ્ટન? સ્મૃતિ સિવાય આ 4 ખેલાડી પણ દાવેદાર

Indian Women Team Captain : હરમનપ્રીત કૌરે ભારતીય મહિલા ક્રિકેટ ટીમના ત્રણેય ફોર્મેટની કેપ્ટનપદની જવાબદારી છોડી દીધી છે. ઝિમ્બાબ્વે સામેની T20 શ્રેણી પહેલાં ભારતે હવે નવા કેપ્ટનની પસંદગી કરવી પડશે. આ ભૂમિકા માટે સ્મૃતિ મંધાનાને મુખ્ય દાવેદાર માનવામાં આવે છે. જોકે તેની નિમણૂક લગભગ નિશ્ચિત જણાય છે, તેમ છતાં BCCI પુરુષ ટીમની જેમ જ અલગ અલગ ફોર્મેટ માટે અલગ અલગ કેપ્ટન નિયુક્ત કરવાનો નિર્ણય પણ લઈ શકે છે. ત્યારે કયા ચાર ખેલાડીઓ છે જેમને કેપ્ટનપદ સોંપવામાં આવી શકે છે.

દીપ્તિ શર્મા

દીપ્તિ શર્મા આ યાદીમાં મોખરે છે. તે ટીમની સૌથી અનુભવી ખેલાડી છે, ત્રણેય ફોર્મેટમાં રમે છે અને ભારત માટે સતત શાનદાર પ્રદર્શન કર્યું છે. તેણે સ્થાનિક ક્રિકેટમાં બંગાળ અને નોર્થ ઝોનનું નેતૃત્વ કર્યું છે અને મહિલા પ્રીમિયર લીગમાં UP વોરિયર્સની કેપ્ટનશીપ સંભાળી છે. તેણે 2022 મહિલા T20 ચેલેન્જમાં વેલોસિટી ટીમનું નેતૃત્વ પણ કર્યું હતું, જે તેને કેપ્ટનપદ માટે મજબૂત દાવેદાર બનાવે છે.

જેમિમા રોડ્રિગ્સ

સ્મૃતિ પછી જેમિમા રોડ્રિગ્સ કેપ્ટનપદ માટે સૌથી મજબૂત દાવેદાર છે. જો સ્મૃતિને કેપ્ટન બનાવવામાં આવે, તો એવી પ્રબળ શક્યતા છે કે જેમિમાને વાઇસ-કેપ્ટન બનાવવામાં આવશે. તે IPLમાં દિલ્હી ટીમની કેપ્ટનશીપ પણ કરે છે. તેના નેતૃત્વમાં તેણે ટીમને ફાઇનલ સુધી પહોંચાડી હતી અને ચેમ્પિયનશિપ મેચમાં અડધી સદી ફટકારીને ટાઇટલ જીતવાનો પૂરો પ્રયાસ કર્યો હતો. જોકે, સ્મૃતિની ટીમે 204 રનનો ટાર્ગેટ હાંસલ કરી લીધો અને મેચ જીતી લીધી હતી.

શેફાલી વર્મા

ભારતની આ યુવા ખેલાડીએ ખૂબ નાની ઉંમરે મહત્વપૂર્ણ સિદ્ધિઓ હાંસલ કરી છે. પ્રતિકા ઈજાગ્રસ્ત થયા બાદ 2025ના વન-ડે વર્લ્ડ કપ દરમિયાન તે ટીમમાં પરત ફરી હતી અને ત્યારથી તેણે પાછું વળીને જોયું નથી. આ સમયગાળા દરમિયાન તેણે સતત રન બનાવ્યા છે અને બોલિંગમાં પણ શાનદાર પ્રદર્શન કર્યું છે. તે લાંબા સમયથી ટીમની સભ્ય રહી છે અને તેની જ કેપ્ટનશીપ હેઠળ ભારતે અંડર-19 મહિલા વર્લ્ડ કપ જીત્યો હતો.

રિચા ઘોષ

હરમનપ્રિત કૌર બાદ ભારતીય મહિલા ક્રિકેટ ટીમના કેપ્ટન પદ માટે રિચા ઘોષને પણ જવાબદારી મળી શકે છે. વિકેટકીપર-બેટ્સમેન તરીકે રિચાએ પોતાની આક્રમક બેટિંગ અને વિકેટકીપિંગથી ટીમમાં મહત્વનું સ્થાન બનાવ્યું છે. યુવા ખેલાડી તરીકે આંતરરાષ્ટ્રીય ક્રિકેટમાં તેનો અનુભવ સતત વધી રહ્યો છે. ટીમ મેનેજમેન્ટ ભવિષ્યને ધ્યાનમાં રાખીને નેતૃત્વ માટે રિચા પર વિચાર કરી શકે છે. જોકે, અંતિમ નિર્ણય પસંદગીકારો અને ટીમ મેનેજમેન્ટ દ્વારા લેવામાં આવશે.