Recipe: ઘરે બનાવો બજારમાં મળે એવી જ સાત પડવાળી પુરી, આ રીતે બધા પડ ખુલશે અને પુરી ક્રિસ્પી બનશે

Satpadi Puri Recipe: દિવાળી સમયે ઘરમાં અલગ અલગ ફરસાણ બને છે. દિવાળીમાં ઘરે આવતા મહેમાનોને વિવિધ મિઠાઈ અને ફરસાણ પીરસવામાં આવે છે. દરેક મહિલા ઈચ્છે કે તેના ઘરે એવા પકવાન બને કે જેને ખાઈને મહેમાન તેના વખાણ કરે. આ વર્ષે દિવાળીમાં ખાસ શું બનાવવું તેવો પ્રશ્ન તમને પણ થતો હોય તો તેનો જવાબ છે સાત પડવાળી પુરી. બજારમાં મળે તેવી જ સાત પડવાળી ખસ્તા પુરી ઘરે કેવી રીતે બને ચાલો તમને જણાવીએ.

સાત પડવાળી પુરી

બજારમાં અલગ અલગ પ્રકારની ફરસી પુરી મળતી હોય છે. જેમાંથી સૌથી ખાસ અને સ્વાદિષ્ટ હોય છે સાત પડવાળી પુરી કે જેને ઘણા લોકો સતપડી પણ કહેતાં હોય છે. આ પુરી ખાસ એટલા માટે હોય છે તેમાં ખારી બિસ્કીટમાં પડે એવા લેયર થયેલા હોય છે. જેના કારણે આ પુરી ખાવામાં સ્વાદિષ્ટ લાગે છે. સાત પડવાળી પુરી જોઈને લાગે કે આ પુરી બનાવવી મુશ્કેલ હશે પણ જો તમને પુરીમાં સાત પડ પાડવાની ટ્રિક ખબર હોય તો આ પુરી ઘરે સરળતાથી બનાવી શકો છો.

સાત પડવાળી પુરી બનાવવાની સીક્રેટ રીત

આ પણ વાંચો: Thalipeeth Recipe: સવારના નાસ્તામાં ખાવાની મજા પડે તેવી જુવારના લોટની થાલીપીઠ બનાવવાની રીત

સાત પડવાળી પુરી માટેની સામગ્રી

મેંદાનો લોટ અથવા ઘઉંનો લોટ
મોણ માટે તેલ અથવા ઘી
મીઠું
અધકચરું વાટેલું જીરું અને મરી
સાટા માટે ચોખાનો લોટ અને ઘી
તળવા માટે તેલ

આ પણ વાંચો: Kalakand: ફાટેલા દૂધમાંથી ઘરે બનાવો કલાકંદ, સ્વાદિષ્ટ કલાકંદ બનાવવા ફાટેલા દૂધ સિવાય ફક્ત 4 વસ્તુઓની જરૂર પડશે

સતપડી પુરી બનાવવાની રીત

• સૌથી પહેલા ઘઉં અથવા મેંદાનો લોટ લઈ તેમાં મીઠું ઉમેરી ઘી અથવા તેલનું મોણ આપવું. પુરીના લોટમાં મુઠ્ઠી પડતું મોણ ઉમેરવું.
• લોટમાં મોણ કર્યા પછી જીરું અને મરી ઉમેરી થોડું થોડું પાણી ઉમેરી પુરી માટે લોટ બાંધવો. પુરીનો લોટ વધારે ઢીલો કે વધારે કઠણ ન હોય તેનું ધ્યાન રાખવું.
• લોટને ઢાંકીને 30 મિનિટ સેટ થવા દો. ત્યાં સુધીમાં એક બાઉલમાં ચોખાનો લોટ લઈ તેમાં ઘી ઉમેરી સ્લરી તૈયાર કરો. આ સ્લરી એટલે કે સાટામાં ઘી બરાબર લેવું. પુરીના લેયર આ સાટાના કારણે જ બરાબર ખુલશે.
• લોટને તેલવાળા હાથ કરી કુણવવો અને પછી તેમાંથી પરોઠા જેવા લુઆ કરવા. હવે સૌથી પહેલા એક મોટું પરોઠું વણવું. તેના પર તૈયાર કરેલો સાટો બરાબર લગાડી રોટલીનો ટાઈટ રોલવાળો.  
• તૈયાર કરેલા રોલમાંથી પુરી બને તેવા લુઆ કટ કરો. તૈયાર લુઆમાં તમને લેયર દેખાશે. હવે હળવા હાથે પુરી વણો. બધી જ પુરી વણીને સાઈડ પર રાખો અને કઢાઈમાં તેલ ગરમ કરો.
• તેલ ગરમ થઈ જાય પછી ગેસને મિડીયમ ફ્લેમ પર રાખી તેમાં પુરી તળવા મુકો. પુરીને મધ્યમ તાપે ગોલ્ડન થાય ત્યાં સુધી તળો. જો તમે સાટો બરાબર લગાવ્યો હશે તો પુરી તળશો ત્યાં જ લેયર ખુલી જશે.

આ પુરી બનાવ્યા પછી એરટાઈટ કંટેનરમાં ભરી લો. આ રીતે બનાવેલી પુરી તમે 10 થી 15 દિવસ સ્ટોર કરી શકો છો. જો કે આ પુરી એટલી ટેસ્ટી લાગે છે કે બનાવ્યાના 2 જ દિવસમાં ડબ્બો સાફ થઈ જશે.