વાવ-થરાદમાં કાળજું કંપાવતી ઘટના! પિતાએ અઢી વર્ષના બાળકને પેટ્રોલ છાંટી જીવતો સળગાવ્યો

વાવ-થરાદ જિલ્લામાંથી એક હૃદયદ્રાવક ઘટના સામે આવી છે, જ્યાં એક પિતાએ પોતાના અઢી વર્ષના પુત્ર પર પેટ્રોલ છાંટીને તેને જીવતો સળગાવી દીધો. મળતી માહિતી મુજબ, પત્ની તેના પિયર જતી રહ્યા બાદ પુત્રના ઉછેરની સંપૂર્ણ જવાબદારી પિતા પર આવી પડી હતી. જે બાદ તેને બાળકનો ઉછેર કરવો એક બોજ લાગવા માંડ્યો, જેના કારણે તેણે આ અત્યંત ભયાનક પગલું ભર્યું. બાળકના દાદાની ફરિયાદના આધારે પોલીસે પિતાની ધરપકડ કરી છે.

"દીકરી નહોતી ગમતી...", રાજકોટમાં બાળકીના શંકાસ્પદ મોતના કેસમાં મોટો ખુલાસો, 5મા માળેથી ફેંકી દીકરીને મારનાર કળયુગી માતા પકડાઈ

પોલીસના જણાવ્યા અનુસાર, બાળકને સળગાવ્યા બાદ પિતા તેને હોસ્પિટલ લઈ ગયો હતો, જ્યાં તબીબોએ તેને મૃત જાહેર કર્યો. ધરપકડના ડરથી તેણે ઉતાવળમાં અંતિમ સંસ્કાર કરી દીધા. જોકે, જ્યારે આરોપીના કાકાને આ ઘટના વિશે જાણ થઈ, ત્યારે તેમણે પોલીસને જાણ કરી.

બાળક એક બોજ બની ગયો હતો

આરોપી પિતાની ઓળખ અશોક જીતાભાઈ રાવલ તરીકે થઈ છે. પોલીસના જણાવ્યા મુજબ, લગભગ ત્રણ મહિના પહેલા અશોક રાવલનો તેની પત્ની સાથે ઝઘડો થયો હતો, ત્યારબાદ તે પિયર જતી રહી હતી. તેણે તેના અઢી વર્ષના પુત્રને પિતાની દેખરેખ હેઠળ છોડી દીધો હતો. પરંતુ અશોકને બાળકની સંભાળ રાખવાની જવાબદારી એક બોજ સમાન લાગી.

આ જવાબદારીમાંથી મુક્ત થવા માટે આરોપીએ નિર્દોષ બાળક પર પેટ્રોલ છાંટીને તેને સળગાવી દીધો, જેનાથી બાળક ગંભીર રીતે દાઝી ગયો. બાળકના મૃત્યુ પહેલાંનો એક વીડિયો પણ સામે આવ્યો છે. જેમાં ગંભીર રીતે દાઝેલો બાળક ખાટલા પર બેઠેલો જોવા મળે છે. આ દ્રશ્ય કોઈપણ વ્યક્તિને ઊંડો આઘાત પહોંચાડે તેવું છે.

આરોપીના કાકાએ નોંધાવી ફરિયાદ

ગુનાને છુપાવવાના પ્રયાસરૂપે આરોપીએ પરિવારના કેટલાક સભ્યોની મદદથી બાળકના મૃતદેહને દફનાવી દીધો. દરમિયાન, આરોપીના કાકા બાબુભાઈ રાવલને આ દુઃખદ ઘટના વિશે જાણ થઈ. પોતાના ભત્રીજાના આ કૃત્યથી વ્યથિત થઈને, તેણે પોલીસનો સંપર્ક કર્યો જેથી ગુનેગારને કાયદાના દાયરામાં લાવી શકાય. પોલીસે ફરિયાદ નોંધીને ત્વરિત કાર્યવાહી કરી અને આરોપી અશોકની ધરપકડ કરી લીધી. બાળકના મૃતદેહને જમીનમાંથી બહાર કાઢવામાં આવ્યો છે અને પોસ્ટમોર્ટમ માટે મોકલી આપવામાં આવ્યો છે. આરોપીએ પોલીસ કસ્ટડીમાં પોતાના ગુનાની કબૂલાત કરી લીધી છે.