ગાંધીનગર ચૂંટણીમાં 'મેયર વોર્ડ' પર સૌની નજર! 6માંથી 4 મેયર આપનાર વોર્ડ નં. 5 શું 2026માં ફરી ઈતિહાસ પુનરાવર્તિત કરશે?

હિતલ પારેખ/ગાંધીનગર: ગાંધીનગર મહાનગરપાલિકાના અત્યાર સુધીના 6 મેયરમાંથી પ્રથમ ચાર મેયર આ જ વોર્ડમાંથી ચૂંટાયા હતા. એટલે સવાલ એ છે કે શું વોર્ડ નંબર 5 ફરી એક વખત ગાંધીનગરને મેયર આપશે? ગાંધીનગર મહાનગરપાલિકાના ચૂંટણી જંગમાં વોર્ડ નંબર 5નો જબરો દબદબો જોવા મળ્યો છે. 

એવું કહેવાય છે કે ગાંધીનગર મહાનગરપાલિકાના ચૂંટણી જંગમાં 6 મેયરમાંથી 4 મેયર વોર્ડ નં. 5ના છે. ગાંધીનગર મહાનગરપાલિકાની રાજકીય સફરમાં વોર્ડ નંબર 5નું સ્થાન ખાસ રહ્યું છે. મેયરપદના ઈતિહાસ પર નજર કરીએ તો પ્રથમ ચાર મેયર વોર્ડ નંબર 5માંથી ચૂંટાયેલા હતા. એટલે જ વોર્ડ નંબર 5ને ગાંધીનગરનો ‘મેયર વોર્ડ’ કહેવામાં આવે છે.

ગાંધીનગર મનપાના મેયર પદનો ઈતિહાસ
ગાંધીનગર મહાનગરપાલિકાના ચૂંટણી જંગમાં વર્ષ 2011માં મહેન્દ્રસિંહ રાણા, વર્ષ 2015માં હંસાબેન મોદી, વર્ષ 2016માં પ્રવીણ પટેલ, વર્ષ 2019માં રીતાબેન પટેલ, વર્ષ 2021માં હિતેશ મકવાણા, વર્ષ 2024માં મીરાબેન પટેલ મેયર પદે રહ્યા છે.

પ્રથમ 4 મેયર → વોર્ડ નં. 5માંથી બન્યા, જાણો કયારે કોણ હતું મેયર

ગાંધીનગર મહાનગરપાલિકાના પ્રથમ 4 મેયર વોર્ડ નં. 5
2011માં ગાંધીનગર મહાનગરપાલિકાની પ્રથમ ચૂંટણી યોજાઈ. મહેન્દ્રસિંહ રાણા ગાંધીનગર મનપાના પ્રથમ મેયર બન્યા. ત્યારબાદ હંસાબેન મોદી મેયર બન્યા. 2016માં પ્રવીણ પટેલે મેયરપદ સંભાળ્યું અને ત્યારબાદ રીટાબેન પટેલ મેયર બન્યા. આ ચારેય મેયરોના કારણે વોર્ડ નંબર 5ની ઓળખ માત્ર એક ચૂંટણી વોર્ડ તરીકે નહીં, પરંતુ ‘મેયર વોર્ડ’ તરીકે બની. અર્થાત ગાંધીનગર મનપાના અત્યાર સુધીના છ મેયરમાંથી ચાર મેયર એક જ વોર્ડમાંથી આવ્યા. એટલે કે કુલ મેયરમાં લગભગ 67 ટકા હિસ્સો ધરાવે છે.

પ્રથમ મેયર, અને ચુંટણી સહ સંયોજક, મહેન્દ્રસિંહ વાઘેલા
ગાંધીનગર મહાનગરપાલિકાની ચૂંટણીમાં પ્રથમ મેયર, અને ચુંટણી સહ સંયોજક મહેન્દ્રસિંહ વાઘેલાએ જણાવ્યું હતું કે ગાંધીનગરની રાજકીય પરિસ્થિતિ બદલાઈ ગઈ છે. વોર્ડનું સીમાંકન બદલાયું અને મેયરપદનું રાજકીય ગણિત પણ બદલાયું. 2021ની ચૂંટણીમાં ભાજપે 44માંથી 41 બેઠકો જીતીને ગાંધીનગર મનપામાં જબરદસ્ત બહુમતી મેળવી. ભાજપની બહુમતી બાદ વોર્ડ નંબર 8 માંથી હિતેશ મકવાણા મેયર બન્યા અને બીજી તમામ વોર્ડ નંબર 10 માંથી મીરાબેન પટેલ મેયર બન્યા. હવે 2026ની ચૂંટણીમાં ફરી એક વખત વોર્ડ નંબર 5 ચર્ચાના કેન્દ્રમાં છે.

2026માં ફરી ‘મેયર વોર્ડ’નો વારો?
ગાંધીનગર મહાનગરપાલિકાની ચૂંટણીમાં હવે સૌથી વધુ લોકોના મનમાં એક જ સવાલનો જવાબ દોડી રહ્યો છે. વોર્ડ નં. 5માં કોણ જીતશે? કોણ બનશે મેયરપદની રેસમાં દાવેદાર? શું ફરી મેયર આપશે વોર્ડ નં. 5?.. આ ચૂંટણીમાં વોર્ડ નંબર 5ની ચાર બેઠકોનું પરિણામ માત્ર ચાર કોર્પોરેટરોની જીત-હાર નક્કી નહીં કરે, પરંતુ ગાંધીનગરની નવી મહાનગરપાલિકામાં સત્તાના કેન્દ્ર અંગે પણ સંકેત આપશે. કારણ કે આ એ જ વોર્ડ છે. જેણે ગાંધીનગરને અત્યાર સુધીમાં ચાર મેયર આપ્યા છે.