દિલ્હીમાં ફરી જામી 'દાદા'ની જમાવટ: IPL 2027 પહેલા સૌરવ ગાંગુલી બન્યા દિલ્હી કેપિટલ્સના હેડ કોચ

ભારતીય ક્રિકેટ ટીમના પૂર્વ કેપ્ટન અને BCCIના પૂર્વ અધ્યક્ષ સૌરવ ગાંગુલીને દિલ્હી કેપિટલ્સે આઈપીએલ 2027 માટે પોતાના મુખ્ય કોચ બનાવ્યા છે. ગાંગુલી હવે ટીમની કોચિંગ અને રણનીતિની કમાન સંભાળશે.

તેમના અનુભવને જોતા દિલ્હી કેપિટલ્સને ટીમના પ્રદર્શનમાં સુધારની આશા હશે. JSW અને GMR ની સહ-માલિકીવાળી દિલ્હી કેપિટલ્સે 6 ઓક્ટોબરે તેની સત્તાવાર જાહેરાત કરી છે. ગાંગુલી હવે હેમાંગ બદાણીની જગ્યાએ આ જવાબદારી સંભાળશે. બદાણીએ આઈપીએલ 2025 અને 2026ની સિઝનમાં ટીમની સાથે આ ભૂમિકા નિભાવી હતી.

ગાંગુલીની આ દિલ્હી કેપિટલ્સની સાથે નવી ભૂમિકા હશે, પરંતુ ફ્રેન્ચાઇઝી સાથે તેમનો સંબંધ જૂનો છે. તેઓ વર્ષ 2019મા દિલ્હી કેપિટલ્સ સાથે એડવાઇઝર તરીકે જોડાયા હતા. ત્યારબાદ તેમણે ફ્રેન્ચાઇઝીના ક્રિકેટિંગ સેટઅપમાં ઘણી મહત્વપૂર્ણ જવાબદારી સંભાળી. તેઓ પુરૂષ અને મહિલા બંને ટીમોના ડાયરેક્ટર ઓફ ક્રિકેટ પણ રહી ચૂક્યા છે. ખેલાડી તરીકે નિવૃત્ત થયા બાદ ગાંગુલીએ ક્રિકેટ વહીવટમાં ભૂમિકા ભજવી હતી, અને બીસીસીઆઈની કમાન પણ સંભાળી હતી.

આ પણ વાંચોઃ હરમનપ્રીત કૌરે અચાનક છોડી કેપ્ટનશીપ, ઇન્સ્ટાગ્રામ પર લખી ઈમોશનલ પોસ્ટ

દિલ્હી કેપિટલ્સ કરશે નવી શરૂઆત
ગાંગુલી દિલ્હી કેપિટલ્સ સાથે જોડાયેલા રહ્યાં છે. હવે હેડ કોચ બન્યા બાદ તેમની જવાબદારી ટીમને પ્રથમ આઈપીએલ ટ્રોફી અપાવવા પર હશે. દિલ્હી કેપિટલ્સના ચેરમેન અને કો-ઓનર પાર્થ જિંદલે ગાંગુલીની નિમણૂંક પર ખુશી વ્યક્ત કરી છે. તેમણે કહ્યું કે દાદા હંમેશા દિલ્હી કેપિટલ્સનો મહત્વનો ભાગ રહ્યાં છે. જિંદલ પ્રમાણે ભારતીય ક્રિકેટના મહાન કેપ્ટનો અને વહીવટમાં સામેલ ગાંગુલી હવે કોચની ભૂમિકા સંભાળી રહ્યાં છે અને તેમની લીડરશિપમાં ટીમ આઈપીએલ ટાઇટલ માટે સારી તૈયારી કરશે.

હેડ કોચ બનવા પર શું બોલ્યા દાદા?
સૌરવ ગાંગુલીએ નવી જવાબદારી મળવા પર કહ્યુ કે તેઓ આઈપીએલમાં હેડ કોચની જવાબદારી સંભાળવા માટે ઉત્સાહિત છે. તેમણે દિલ્હી કેપિટલ્સને પોતાના દિલની નજીક ગણાવી છે. ગાંગુલીએ કહ્યુ કે તેમણે ફ્રેન્ચાઇઝી માલિકો, મેનેજમેન્ટ અને સપોર્ટ સ્ટાફ તથા ખેલાડીઓ સાથે લાંબા સમયથી કામ કર્યું છે. તેમના મતે ટીમમાં ઘણા પ્રતિભાશાળી ખેલાડી છે અને હાલના સમયમાં ટીમે સારૂ કર્યું છે.

ગાંગુલીએ કહ્યુ કે તેઓ નવી સિઝનમાં ટીમની સાથે કામ કરવા અને એક મજબૂત તથા નિડર ટીમ તૈયાર કરવા ઉત્સાહિત છે.