"રાત્રે અંધારામાં નહીં, તાકાત હોય તો દિવસે ફાડો... છઠ્ઠીનું ધાવણ યાદ કરાવી દેશું", ગાંધીનગરમાં ગેનીબેનનો હુંકાર

Geniben Thakor's statement: ગાંધીનગર મહાનગરપાલિકાની ચૂંટણીને લઈને ત્રણેય પાર્ટીઓ એડીચોટીનું જોર લગાવી રહ્યા છે. હાલ ગાંધીનગરના અલગ અલગ વોર્ડમાં ત્રણેય પાર્ટીઓ પોતાના દિગ્ગજ નેતાઓ સાથે સભાઓ ગજવી રહ્યા છે. મંગળવારે સાંજે ગાંધીનગરના વોર્ડ નંબર 6માં કોંગ્રેસની યોજાયેલી એક વિશાળ જાહેર સભા દરમિયાન બનાસકાંઠાના સાંસદ ગેનીબેન ઠાકોરે ભાજપ અને સ્થાનિક પોલીસ વહીવટી તંત્ર સામે આકરા પ્રહારો કરતા રાજનીતિમાં ગરમાવો આવી ગયો છે.

જો કોંગ્રેસના આગેવાનો તમને છઠ્ઠીનું ધાવણ યાદ ન કરાવી દે તો કહેજો: ગેની બેન
ગાંધીનગર મનપાની ચૂંટણી પ્રચાર દરમિયાન કોંગ્રેસના બેનરો ફાડી નાખવાની ઘટના બની છે. આ ઘટના અંગે આક્રોશ વ્યક્ત કરતા ગેનીબેન ઠાકોરે ભાજપ અને પોલીસ તંત્રને આડે હાથ લેતા જણાવ્યું હતું કે, "રાત્રે કોઈને ખબર ન પડે તે રીતે બેનરો ન ફાડાય. જો તમારામાં તાકાત હોય અને 56 ઇંચની છાતી હોય, તો દિવસે આવીને સામે ચાલીને બેનરો ફાડી બતાવો. જો કોંગ્રેસના આગેવાનો તમને છઠ્ઠીનું ધાવણ યાદ ન કરાવી દે તો કહેજો."

પોલીસ તંત્ર સામે ગેની બેન ઠાકોરના ગંભીર આરોપ
સભા દરમિયાન બનાસકાંઠાના સાંસદ ગેનીબેન ઠાકોરે પોલીસ દ્વારા પ્રચારમાં રોકાયેલા નાના વર્ગના લોકોને હેરાન કરવાનો આરોપ લગાવતા કહ્યું કે, "અહીંથી પોલીસ બધાને ધમકીઓ આપી રહી છે. રિક્ષાચાલકોથી લઈને સામાન્ય લોકોને ખુદ એસ.પી. ફોન કરીને ધમકાવે છે. પોલીસનું કામ કાયદો અને વ્યવસ્થા જાળવવાનું છે, કોંગ્રેસના કાર્યકરો કે મતદારોને ડરાવવાનું કે ધમકાવવાનું નથી."

"દારૂના અડ્ડાઓ બંધ કરાવો, હપ્તાખોરી બંધ કરો": ગેનીબેન ઠાકોર 
ગુજરાત પોલીસની કામગીરી સામે આકરા પ્રહારો કરતા ગેનીબેને જણાવ્યું હતું કે, "જો તમારામાં ખરેખર ડ્યુટી પ્રત્યેની ફરજ અદા કરવાની તાકાત હોય, તો કાર્યકરોને ધમકાવવાને બદલે ફતેપુરા સહિતના વિસ્તારોમાં જે રેલમછેલ દારૂ વેચાઈ રહ્યો છે તે બંધ કરાવો. દારૂના વેપારમાંથી મહિને હપ્તા ઉઘરાવવામાં આવે છે. ગરીબ સમાજના યુવાનો બરબાદ થઈ રહ્યા છે અને નાની ઉંમરે બહેનો વિધવા બની રહી છે, છતાં તંત્રને આ દૃશ્ય દેખાતું નથી. જ્યારે પણ ચૂંટણીઓ આવે છે ત્યારે વહીવટી તંત્ર બેફામ બનીને સત્તાનો દુરુપયોગ કરે છે."

"અમિત ચાવડાની હાજરીને કારણે મર્યાદા જાળવું છું": ગેનીબેને મંચ પર ઉપસ્થિત નેતાઓનો ઉલ્લેખ 
પોતાના આક્રમક અંદાજ માટે જાણીતા ગેનીબેને મંચ પર ઉપસ્થિત નેતાઓનો ઉલ્લેખ કરતા કહ્યું કે, "આમ તો જો ગુજરાત પ્રદેશ કોંગ્રેસ સમિતિના પ્રમુખ અમિત ચાવડા હાજર ન હોત, તો હું આનાથી પણ વધુ કડક ભાષામાં જવાબ આપત. પણ તેમની હાજરી હોવાથી હું મારી મર્યાદા જાળવી રહી છું."

"જો તમારામાં તાકાત હોય, તો આ 11મી તારીખે મતદાન પૂર્ણ થવા દો!
ગેનીબેન ઠાકોરે સંબોધનના અંતે વિરોધીઓને ખુલ્લો પડકાર ફેંકતા કહ્યું કે, "જો તમારામાં તાકાત હોય, તો આ 11મી તારીખે મતદાન પૂર્ણ થવા દો. અને જો તમને એટલી બધી ઉતાવળ હોય, તો તમે જાતે મેદાન નક્કી કરો. તમે જે રીતે લડવા માગતા હોવ, એ રીતે લડી લેવાની અમારા તમામ કોંગ્રેસના કાર્યકરોની પૂરેપૂરી તૈયારી છે."