વરસાદની ઘટ વચ્ચે ગુજરાત સરકારનો મોટો નિર્ણય, 4 જિલ્લા દુષ્કાળગ્રસ્ત જાહેર, જાણો શું મળશે સહાય?

મુખ્યમંત્રી ભૂપેન્દ્ર પટેલે રાજ્યમાં ઓછો અને વિલંબિત વરસાદ ધરાવતાં 4 જિલ્લાઓને દુષ્કાળગ્રસ્ત જાહેર કરવાનો ખેડૂતો અને પશુપાલકોના હિતમાં નિર્ણય કર્યો છે. તેમણે કૃષિ મંત્રી જીતુ વાઘાણીની ઉપસ્થિતિમાં ગાંધીનગરમાં પ્રચાર માધ્યમો સમક્ષ આ જાહેરાત કરતાં જણાવ્યું કે, ભારત સરકારની દુષ્કાળ નિર્ધારણ માર્ગદર્શિકા-2016 અનુસાર જરૂરી પ્રક્રિયાઓ કરીને તથા ઉચ્ચ સ્તરીય બેઠકો યોજીને આ જિલ્લાઓને દુષ્કાળગ્રસ્ત જાહેર કરવાનો રાજ્ય સરકારે નિર્ણય કર્યો છે.

4 જિલ્લા દુષ્કાળગ્રસ્ત જાહેર

તેમણે કહ્યું કે, સમગ્ર રાજ્યમાં આ વર્ષે સરેરાશ 89 ટકા જેટલો વરસાદ થયો છે પરંતુ દેવભૂમિ દ્વારકા, પોરબંદર, કચ્છ અને જામનગર જિલ્લામાં વરસાદનું પ્રમાણ ઓછું રહ્યું છે. જે સંપુર્ણ 4 જિલ્લાઓમાં ઓછો વરસાદ થયો છે તેના કારણે જે સ્થિતિ સર્જાઈ છે તેમાં ખેડૂતોની પડખે ઉભા રહેવા રાજ્ય સરકાર ઉદારતમ નિર્ણયો કર્યા છે.

મુખ્યમંત્રીશ્રીએ સ્પષ્ટપણે જણાવ્યું કે, પીએમ મોદીના માર્ગદર્શનમાં સરકાર ખેડૂતો અને પશુપાલકોના વિશાળ હિતને હંમેશા પ્રાથમિકતા આપે છે. ભૂતકાળમાં પણ ખેડૂતોની મુશ્કેલી સમયે સરકાર પડખે ઉભી રહી છે. વર્તમાન સ્થિતિમાં સંપૂર્ણ સંવેદનશીલતા સાથે ખેડૂતોની સાથે છે અને ભવિષ્યમાં પણ ખેડૂતો-પશુપાલકોની આપત્તિના કોઈપણ સમયે જે મદદ સહાય કરવી પડે તે માટે પુરેપુરી પ્રતિબદ્ધ છે.

વ્યાજખોરોના આતંકથી દંપત્તિએ જીવન ટૂંકાવ્યું, 8 લાખ રૂપિયાનું રોજનું વ્યાજ 42,000? 21 લાખ ચૂકવ્યા છતાં જીવવું ભારે કરી નાખ્યું

દુષ્કાળગ્રસ્ત જિલ્લાઓ માટે રાહતના નિર્ણયો

• મુખ્યમંત્રીએ દુષ્કાળગ્રસ્ત જિલ્લાઓના ખેડૂતો અને પશુપાલકો માટે જે ઉદારતમ નિર્ણયો લેવામાં આવ્યા છે તેની વિગતો આપતાં જણાવ્યું કે, આ જિલ્લાના ખેડૂતોના પાકને થયેલા નુકસાન સામે રાજ્ય સરકારે SDRFના ધોરણો મુજબ અસરગ્રસ્ત પાકો માટે સહાય આપવાનો જે નિર્ણય કર્યો છે તે મુજબ 8500 રૂપિયા પ્રતિ હેક્ટર 2 હેક્ટરની મર્યાદામાં ખેડૂતોને સહાય અપાશે. 
• પશુઓ માટે ઘાસચારાની જે વ્યવસ્થા રાજ્ય રાજ્ય સરકારે કરી છે તે સંદર્ભમાં મુખ્યમંત્રીએ કહ્યું કે, રાજ્ય સરકારે વિલંબિત વરસાદની સ્થિતિ ધ્યાને લઈને આગોતરુ આયોજન કર્યુ અને ખેડૂતો-પશુપાલકોના હામી બનીને દુષ્કાળ જાહેર થયા પહેલા રાજ્યમાં જૂન-જૂલાઈ-2026થી જ સમગ્ર રાજ્યમાં રાહતદરે ઘાસચારો વિતરણ કરવા માટેની મંજૂરી આપીને જિલ્લા કલેક્ટરોને ઘાસ વિતરણ માટે ખાસ કિસ્સામાં અધિકૃત કરવામાં આવ્યા છે.
• દુષ્કાળ જાહેર થયેલા તાલુકાઓમાં પશુ કેમ્પના પશુઓ માટે પશુ દિઠ રોજના રૂ. 80ની સહાય બે મહિના માટે SDRFમાંથી ચૂકવવામાં આવશે અને પશુપાલકોના વિશાળ હિતમાં ત્યારબાદ રાજ્ય સરકાર આવી સહાયનો ખર્ચ ઉઠાવશે.
• રાજ્યમાં અત્યાર સુધીમાં 1.21 કરોડ કિલોગ્રામ જેટલા ઘાસના જથ્થાનું 2 રૂપિયા પ્રતિકિલોના રાહતદરે વિતરણ કરવામાં આવ્યું છે. રાજ્ય સરકાર પાસે અત્યારની સ્થિતિએ ૩ કરોડ કિલોગ્રામ ઘાસ ઉપલબ્દ્ધ છે અને વધારાના ઘાસની ખરીદીની પ્રક્રિયા શરૂ કરી દેવામાં આવી છે.
• મુખ્યમંત્રીએ વધુમાં કહ્યું કે, રાજ્ય સરકારે જે તાલુકાઓને દુષ્કાળગ્રસ્ત જાહેર કર્યા છે તેમાં ગ્રામીણ લોકોને રોજગારી મળી રહે તે માટે વી.બી.જી. રામ જી. યોજના અન્વયે 150 માનવદિન રોજગારી આપવાનો પણ નિર્ણય કરવામાં આવ્યો છે.
• રાજ્ય સરકારે કરેલા આ નિર્ણયોનો અમલ તા. 1 નવેમ્બર 2026થી કરવામાં આવશે તેમ તેમણે જાહેર કર્યુ હતું.
• દરમિયાન રાજ્યમાં સિંચાઈ માટે પાણીની સ્થિતિ જોઈએ તો વિવિધ ડેમોમાંથી ખરીફ રૂતુમાં માંગણીના આધારે 44 ડેમોના કમાન્ડ એરિયામાં પાણી આપવામાં આવ્યું છે.
• ચાલુ વર્ષે રાજ્યના મુખ્ય 206 ડેમોમાં 66 ટકા જળ સંગ્રહ થયેલ છે. રાજ્ય સરકાર દ્વારા આગામી રવિ સિઝન માટે ૭૬ ડેમોના કમાન્ડ વિસ્તારમાં સિંચાઈ માટે પાણી આપવાનું આયોજન કર્યુ છે. સાથોસાથ પીવાના પાણીને પણ પ્રાથમિક્તા આપીને તા. 30/06/2027 સુધી પીવાનું પાણી અનામત રાખવામાં આવ્યું છે.
• તે અંતર્ગત ઉત્તર ગુજરાત વિસ્તારના ધરોઈ દાંતીવાડા સહિત ૧૧ ડેમો, મધ્ય ગુજરાત વિસ્તારના કરજણ-પાનમ સહિત 12 ડેમો, દક્ષિણ ગુજરાત વિસ્તારના ઉકાઈ-કાંકરાપાર, દમણગંગા સહિત 9 ડેમો, ક્ષેત્રુન્જી, બ્રાહ્મણી, મચ્છુ સહિત 39 ડેમો તેમજ કચ્છ વિસ્તારના ૫ ડેમોમાં સિંચાઈ માટે પાણી આપવાનું આયોજન થયેલ છે. ઉક્ત ડેમોમાં પાણીની ઉપલબ્દ્ધીના આધારે 1થી 4 પાણ આપવાનું આયોજન કરેલ છે.

 4 દુષ્કાળગ્રસ્ત જિલ્લાઓને મળનારી મદદ અંગે ટૂંકમાં માહિતી....

• ગુજરાત સરકાર દ્વારા ચાર જિલ્લાઓ દ્વારકા, પોરબંદર, જામનગર અને કચ્છને દુષ્કાળગ્રસ્ત જાહેર કરાયા છે જ્યાં વરસાદ ઓછો પડ્યો છે. 
• ઓછા વરસાદ અને અસરગ્રસ્ત પાક માટે સહાય આપવાનો સરકારનો નિર્ણય. SDRFના ધોરણે સહાય.
• 8500 હેકટર દીઠ ખેડૂતને સહાય આપવામાં આવશે.  2 હેક્ટરની મર્યાદામાં સહાય.
• 17 હજાર પ્રત્યેક ખેડૂતને મળશે.
• દુષ્કાળ જાહેર થયા પહેલા રાહત દરે ઘાસચારા વિતરણની મંજૂરી આપી. 
• રાજ્યમાં અત્યાર સુધી 2 રૂપિયે 1 kg ઘાસચારો અપાયો છે. 
• 1.21 કરોડ કિલોગ્રામ ઘાસના જથ્થાનું 2 રૂપિયા પ્રતિ કિલોના ભાવે વેચાણ કરવામાં આવ્યું
• 3 કરોડ કિલો ઘાસચારો હાલ રાજ્યમાં છે અને વધારાનું આયોજન સરકારે કર્યું છે. 
• દુષ્કાળ જાહેર કરેલ જિલ્લામાં પશુ દીઠ રોજના 80 ની સહાય 2 મહિના સુધી આપવામાં આવશે. 
• દુષ્કાળમાં ગ્રામીણ લોકોને સહાય મળે માટે યોજના હેઠળ 150 દિવસ રોજગારી આપશે. 
• આ નિર્ણયનો અમલ 1 નવેમ્બર 2026 થી કરાશે. 
• દુષ્કાળ ની જાહેરાતથી 6 મહિના સુધી જાહેરાત રહે છે. 
• ગુજરાતમાં 89 ટકા વરસાદ થયો છે પરંતુ 4 જિલ્લામાં ઓછો વરસાદ પડ્યો.

ગુજરાતમાં વહેલી ચૂંટણી થશે કે નહીં? ભાજપના પ્રદેશ પ્રભારી તરુણ ચુગનું મોટું નિવેદન, ખડગેના નિવેદન પર કોંગ્રેસને લીધી આડેહાથ

લાંબા સમયથી વિવિધ માધ્યમો થકી સર્વેની કામગીરી હાથ ધરાઈ હતી-ભાજપ પ્રવક્તા

ગુજરાતના 4 જિલ્લાઓને દુષ્કાળગ્રસ્ત જાહેર કરવા અને ખેડૂતો માટે રાહત પેકેજની જે જાહેરાત કરાઈ તે અંગે ગુજરાત ભાજપના મુખ્ય પ્રવક્તા ડો. અનિલ પટેલે પણ વિગતવાર માહિતી આપી. તેમણે કહ્યું કે  ગુજરાતના મુખ્યમંત્રી ભૂપેન્દ્ર પટેલે ઓછા વરસાદને કારણે દુષ્કાળની પરિસ્થિતિનો સામનો કરી રહેલા ચાર જિલ્લાઓ માટે રાહત પેકેજ જાહેર કર્યું. જામનગર, દેવભૂમિ દ્વારકા, પોરબંદર અને કચ્છને દુષ્કાળગ્રસ્ત જાહેર કરાયા .ચોમાસા દરમિયાન ઓછા વરસાદ અને પાણીની અછતની પરિસ્થિતિને ધ્યાનમાં રાખીને રાજ્ય સરકારે મહત્વપૂર્ણ નિર્ણય લીધો છે. દુષ્કાળગ્રસ્ત વિસ્તારોના ખેડૂતોને પાકના નુકસાન સામે આર્થિક સહાય પૂરી પાડવાનો સરકારનો નિર્ણય છે.  

તેમણે કહ્યું કે, ટેકનોલોજી, ડ્રોન સર્વે અને સ્થળ તપાસના આધારે દુષ્કાળની સ્થિતિનું મૂલ્યાંકન કરવામાં આવ્યું. રાજ્યના વહીવટી તંત્ર દ્વારા લાંબા સમયથી વિવિધ માધ્યમો થકી સર્વેની કામગીરી હાથ ધરવામાં આવી હતી.  સર્વે અને સ્થળ તપાસના આધારે ચાર જિલ્લાઓને દુષ્કાળગ્રસ્ત જાહેર કરવાનો નિર્ણય લેવામાં આવ્યો છે. અન્ય વિસ્તારોમાંથી મળેલી રજૂઆતોના આધારે પણ ટેકનિકલ સર્વે, ડ્રોન સર્વે અને સ્થળ તપાસની કામગીરી ચાલુ છે.

અન્ય અસરગ્રસ્ત વિસ્તારો ઉપર પણ નજર

તેમણે એમ પણ કહ્યું કે  જ્યાં ખેડૂતોને સહાયની જરૂરિયાત જણાશે ત્યાં રાજ્ય સરકાર મદદ કરવા તૈયાર હોવાનો સંદેશ છે. ગુજરાતની સરકાર ખેડૂતોની સરકાર છે અને ખેડૂતોની સાથે ઊભી રહેશે. મુખ્યમંત્રી ભૂપેન્દ્ર પટેલની સરકાર ખેડૂતો પ્રત્યે સંવેદનશીલ હોવાનો ભાજપના મુખ્ય પ્રવક્તા ડૉ. અનિલ પટેલનો દાવો છે. ગુજરાતમાં ત્રણ દાયકાથી વધુ સમયથી ખેડૂતોના સમર્થનથી ભાજપની સરકાર બની રહી હોવાનો ઉલ્લેખ કર્યો. ખેડૂતોની મુશ્કેલીઓમાં સહભાગી બની તેમને મદદ કરવી એ ભાજપ સરકારનો મંત્ર હોવાનું તેમણે નિવેદન આપ્યું. 

તેમણે કહ્યું કે, પાણીની અછત અને ઓછા વરસાદથી અસરગ્રસ્ત ખેડૂતોને રાહત આપવા સરકાર કટિબદ્ધ હોવાની ખાતરી.  ચાર જિલ્લાઓમાં રાહત પેકેજની જાહેરાત બાદ હવે અન્ય અસરગ્રસ્ત વિસ્તારોના સર્વે પર નજર છે.  જરૂરિયાતના આધારે અન્ય વિસ્તારોમાં પણ સહાય અંગે નિર્ણય લેવાઈ શકે છે.