CEC જ્ઞાનેશ કુમાર સામે રોષનો વંટોળ: દેશભરમાં વિરોધના સૂર વચ્ચે અમદાવાદ પણ રસ્તા પર પ્રદર્શન!

Ahmedabad : અમદાવાદમાં મુખ્ય ચૂંટણી કમિશનર (CEC) જ્ઞાનેશકુમાર સામે વિવિધ સંસ્થાઓ દ્વારા વિરોધ પ્રદર્શન કરવામાં આવ્યું હતું. શહેરમાં એમ.જે. લાયબ્રેરી પાસે યોજાયેલા આ વિરોધ પ્રદર્શનમાં પ્રદર્શનકારીઓએ જ્ઞાનેશકુમારના રાજીનામાની માંગ કરી હતી. આ દરમિયાન ચૂંટણી પ્રક્રિયા અને સ્પેશિયલ ઇન્ટેન્સિવ રિવિઝન (SIR)ની કામગીરીમાં ગોટાળા થયા હોવાના આક્ષેપો કરવામાં આવ્યા હતા.

SIRની કામગીરીમાં ગોટાળાનો આક્ષેપ

પ્રદર્શન દરમિયાન યુથ ફ્રન્ટ સહિત વિવિધ સંસ્થાઓના લોકોએ મતદાર યાદીમાંથી નામ કાપવામાં આવ્યાં હોવાનો આરોપ લગાવ્યો હતો. પ્રદર્શનકારીઓએ માંગ કરી હતી કે મતદાર યાદીમાંથી દૂર કરવામાં આવેલાં નામોની યોગ્ય તપાસ કરવામાં આવે અને લાયક મતદારોનાં નામ ફરીથી ઉમેરવામાં આવે, જેથી કોઈ પણ મતદાર પોતાના મતાધિકારથી વંચિત ન રહે. આ મુદ્દે પ્રદર્શનકારીઓએ ચૂંટણી તંત્રની કામગીરી સામે સવાલો ઉઠાવી જવાબદારી નક્કી કરવાની પણ માંગ કરી હતી.

દિલ્હી બાદ હવે અમદાવાદમાં પણ CEC જ્ઞાનેશ કુમાર વિરુદ્ધ ઉગ્ર વિરોધ પ્રદર્શન! પ્રોટેસ્ટ કરતી યુવતીઓની અટકાયત #ahmedabad #protest #cec #gyaneshkumar #gujarat #GenZ #viralvideos #trendingvideos https://t.co/A0jFiptD1m

— Zee 24 Kalak (@Zee24Kalak) October 10, 2026

એમ.જે. લાયબ્રેરી પાસે વિરોધ પ્રદર્શન

એમ.જે. લાયબ્રેરી નજીક મોટી સંખ્યામાં લોકો એકત્ર થતાં વિરોધ પ્રદર્શન દરમિયાન પોલીસ બંદોબસ્ત ગોઠવવામાં આવ્યો હતો. 150થી વધુ પોલીસ જવાનો તૈનાત કરવામાં આવ્યા હતા. પરિસ્થિતિને ધ્યાનમાં રાખીને પોલીસે કાર્યવાહી કરી હતી અને વિરોઘ કરી રહેલા કેટલાક લોકોની અટકાયત કરી હતી.

દિલ્હીમાં 3000 લોકોની અટકાયત

દિલ્હીમાં પણ 10 ઓક્ટોબરે મુખ્ય ચૂંટણી કમિશનર જ્ઞાનેશકુમાર સામે વિરોધ પ્રદર્શન યોજાયું હતું. જંતરમંતર ખાતે યોજાનારા પ્રદર્શનને ધ્યાનમાં રાખીને પોલીસે કડક સુરક્ષા વ્યવસ્થા ગોઠવી હતી. કોકરોચ જનતા પાર્ટી અને પ્રદર્શનકારીઓએ SIRની કામગીરી સામે સવાલો ઉઠાવી ફોર્મ-6 અંગે અનિયમિતતાનો આરોપ લગાવતા મુખ્ય ચૂંટણી કમિશનર જ્ઞાનેશ કુમારના રાજીનામાની માંગ કરી હતી.

વિરોધ પ્રદર્શનને ધ્યાને લઈ મેટ્રો સેવાઓ, ટ્રેનો અને મોબાઈલ ઈન્ટરનેટ પર પ્રતિબંધો લાદવામાં આવ્યો હતો અને લગભગ 25,000 સુરક્ષાકર્મીઓને તૈનાત કરવામાં આવ્યા હતા. સાંજે 5 વાગ્યા સુધીમાં રાજકીય નેતાઓ અને વિવિધ સંગઠનોના વડાઓ સહિત ઓછામાં ઓછા 3000 લોકોને અટકાયતમાં લેવામાં આવ્યા હતા. દિલ્હીમાં અરવિંદ કેજરીવાલ અને મમતા બેનર્જી સહિતના અનેક નેતાઓને પણ અટકાયતમાં લેવામાં આવ્યા છે.