ઓક્ટોબર મહિનામાં ગુજરાતના કયા વિસ્તારોમાં ક્યારે કેવો વરસાદ પડશે? જાણો અંબાલાલ પટેલ અને હવામાન વિભાગની લેટેસ્ટ આગાહી

ચોમાસાની વિદાય પૂર્વે સૌરાષ્ટ્ર અને દક્ષિણ ગુજરાતનું વાતાવરણ પલટાશે

અંબાલાલ પટેલના જણાવ્યા મુજબ, ગુજરાતમાંથી હવે ચોમાસું ધીમે-ધીમે વિદાય લઈ રહ્યું છે. પરંતુ ચોમાસાની સંપૂર્ણ વિદાય પહેલાં જ સૌરાષ્ટ્ર અને દક્ષિણ ગુજરાતના વાતાવરણમાં ફેરફાર જોવા મળશે. જૂનાગઢ, અમરેલી અને તેની આસપાસના દક્ષિણ સૌરાષ્ટ્રના ભાગોમાં ગાજવીજ સાથે ભારે વરસાદની શક્યતા છે. જ્યારે અમદાવાદ સહિત મધ્ય ગુજરાત અને સૌરાષ્ટ્રના ભિન્ન-ભિન્ન વિસ્તારોમાં પણ વાદળછાયું વાતાવરણ અને વરસાદી પલટો આવી શકે છે.

અંબાલાલ પટેલે સમજાવ્યું હાથિયા નક્ષત્રનું મહત્વ અને તેની કૃષિ પર શું પડે છે અસર

હવામાન નિષ્ણાત અંબાલાલ પટેલે હસ્ત (હાથિયા) નક્ષત્ર અંગે વિશેષ માહિતી આપતા જણાવ્યું હતું કે હાથિયા નક્ષત્રમાં ગડગડાટ સાથે વરસાદ થવાની પૂરી શક્યતા રહે છે. જો હાથિયો ગાજે તો આગામી વર્ષે પણ સારો વરસાદ થાય છે તેવી લોકવાયકા છે. હાથિયાની ગર્જના અને વરસાદથી ખેતીમાં તીડનો ઉપદ્રવ ઘટે છે અને ઘઉંના પાક માટે વાતાવરણ ખૂબ અનુકૂળ બને છે.

10 ઓક્ટોબર પછી બંગાળની ખાડીમાં સક્રિય થશે વરસાદી સિસ્ટમ

ઓક્ટોબરના શરૂઆતના દિવસોમાં બંગાળની ખાડીમાં વરસાદના ખાસ સંકેતો નથી, પરંતુ મહિનાના બીજા સપ્તાહથી હવામાનમાં મોટા ફેરફારો જોવા મળી શકે છે. 10 ઓક્ટોબર પછી વાદળવાયુનું પ્રમાણ વધશે અને હવામાનમાં પલટો આવશે. 17 ઓક્ટોબરની આસપાસ બંગાળની ખાડીમાં થોડી હલચલ જોવા મળે અને હવાના હળવા દબાણ સર્જાઈ શકે છે. જો આ સિસ્ટમ ઓમાન તરફ ફંટાય, તો ગુજરાતના હવામાન પર તેની સીધી અસર પડી શકે છે અને વાવાઝોડા જેવા ભારે પવનો સાથે વરસાદી માહોલ સર્જાઈ શકે છે.

2થી 4 ઓક્ટોબર દરમિયાન રાજ્યમાં કેવું રહેશે હવામાન

હવામાન વિભાગના જણાવ્યા મુજબ, ઓક્ટોબરમાં વરસાદી ઝાપટાં બાદ હવે રાજ્યમાં વરસાદનું જોર ઘટશે. 2થી 4 ઓક્ટોબર દરમિયાન સમગ્ર ગુજરાતમાં વરસાદની કોઈ મોટી આગાહી નથી અને હવામાન મુખ્યત્વે શુષ્ક રહેશે. રાજ્યમાંથી ચોમાસાની સત્તાવાર વિદાયની પ્રક્રિયા પણ ઝડપથી આગળ વધી રહી છે.