દેશના 15 રાજ્યોમાં ભારે વરસાદ-આંધીનું એલર્ટ: ગુજરાતમાં નવરાત્રીમાં વરસાદ અને વાવાઝોડાને લઈને અંબાલાલની મોટી આગાહી

Ambalal Patel Rain Forecast: હાલ ગુજરાત સહિત દેશમાં ચોમાસું વિદાય લઈ રહ્યું હોય તેવું દેખાઈ રહ્યું છે, તો અમુક જગ્યાએ હવામાનની બેવડી અસર જોવા મળી રહી છે. દક્ષિણ-પશ્ચિમ ચોમાસું દેશના મોટાભાગના વિસ્તારોમાંથી વિદાય લઈ રહ્યું છે, તો બીજી તરફ દક્ષિણ ભારત અને પહાડી રાજ્યોમાં ગાજવીજ સાથે ભારે વરસાદની તીવ્ર શક્યતાઓ સેવાઈ રહી છે. ખરાબ હવામાન અને વાવાઝોડાને કારણે ખેતરમાં ઉભા પાકને મોટું નુકસાન થવાની ભીતિ સેવાઈ રહી છે.

હવામાન વિભાગની લેટેસ્ટ આગાહી મુજબ દિલ્હી, ઉત્તર પ્રદેશ, બિહાર અને પંજાબ સહિત દેશના 15 રાજ્યોમાં એલર્ટ જાહેર કરવામાં આવ્યું છે. ચોમાસાના આ અંતિમ તબક્કામાં 70 કિમી પ્રતિકલાકની ઝડપે પવન ફૂંકાવાની શક્યતા છે. પહાડી રાજ્યોમાં ભારે વરસાદની સાથે ભૂસ્ખલનની ચેતવણી આપવામાં આવી છે. જ્યારે દરિયામાં ભારે પવન અને કરંટને કારણે માછીમારોને સમુદ્રકિનારાથી દૂર રહી સલામત જગ્યાએ ખસી જવાની સલાહ અપાઈ છે.