વિદેશમાં વધુ એક ગુજરાતી પાટીદારનો ડંકો! ગુજરાતી મૂળના હોલિવૂડ એક્ટર હિમેશ પટેલ વિશ્વના 100 પ્રભાવશાળી લોકોમાં સામેલ

TIME100 Next 2026: હોલિવૂડ ક્ષેત્રે પોતાની એક્ટિંગથી આગવી ઓળખ ઊભી કરનાર મૂળ ગુજરાતી બ્રિટિશ અભિનેતા હિમેશ પટેલને પ્રતિષ્ઠિત 'TIME100 Next 2026'ની યાદીમાં સ્થાન મળ્યું છે. વિશ્વભરના સૌથી વગદાર અને ઉભરતા કલાકારોમાં સ્થાન પામનારા તેઓ જાણીતા ભારતીય મૂળના અભિનેતા બન્યા છે. ઓસ્કાર વિજેતા દિગ્દર્શક ક્રિસ્ટોફર નોલને પોતે 'ટાઇમ' મેગેઝિન માટે હિમેશ પટેલના અભિનય, શિસ્ત અને ક્ષમતાની મુક્ત મને પ્રશંસા કરી છે.

મૂળ ગુજરાતી અભિનેતા હિમેશ પટેલનું બાળપણ અને કલાકાર તરીકે કરિયર
35 વર્ષીય મૂળ ગુજરાતી હિમેશ પટેલનો જન્મ ઇંગ્લેન્ડના કેમ્બ્રિજશાયરના સોટ્રી ગામમાં થયો હતો. તેમના માતા-પિતા મૂળ ગુજરાતી છે. તેમની માતાનો જન્મ ઝામ્બિયામાં અને પિતાનો જન્મ કેન્યામાં થયો હતો. ઘરમાં ગુજરાતી વાતાવરણ હોવાને કારણે હિમેશ પટેલ નાનપણથી જ સુંદર ગુજરાતી બોલે છે. તેમણે પ્રિન્સ વિલિયમ સ્કૂલમાં અભ્યાસ કરતી વખતે 11 વર્ષની ઉંમરે જ નાટકોમાં ભાગ લેવાનું શરૂ કર્યું હતું. કલા પ્રત્યેનો ઉત્સાહ જોઈને શિક્ષકોએ તેમને 'કી યુથ થિયેટર' અને બાદમાં કેમ્બ્રિજના 'ધ યંગ એક્ટર્સ કંપની'માં જોડાવા પ્રોત્સાહિત કર્યા હતા. અભિનયની સાથે સાથેૃ તેમણે પિયાનો અને ગિટાર જેવા સંગીતવાદ્યો પણ શીખ્યા છે.

હિમેશ પટેલનો ટીવી સ્ક્રીનથી હોલિવૂડ સુધીની સફર
માત્ર 16 વર્ષની ઉંમરે તેમણે પ્રખ્યાત શો EastEndersમાં 'તમવાર મસૂદ' તરીકે અભિનય કારકિર્દીની શરૂઆત કરી (2007). હતી. વર્ષ 2019 માં ઓસ્કાર વિજેતા ડાયરેક્ટર ડેની બોયલની ફિલ્મ Yesterday થી હિમેશ પટેલને વૈશ્વિક સ્તરે મોટો બ્રેક મળ્યો હતો. આ ફિલ્મમાં તેમણે 'જેક મલિક' નામના મ્યુઝિશિયનનો મુખ્ય રોલ નિભાવ્યો, જેમાં તેમના અભિનય સાથે ગાયકી અને ગિટાર વાદનની પ્રતિભાની પણ ખૂબ પ્રશંસા થઈ.

નોલનની ફિલ્મો અને એમી નોમિનેશન
મૂળ ગુજરાતી હિમેશ પટેલે હોલિવૂડની ઘણી સુપરહિટ ફિલ્મો અને શોઝમાં મુખ્ય ભૂમિકાઓ ભજવી હતી. ક્રિસ્ટોફર નોલનની સાયન્સ-ફિક્શન ફિલ્મ Tenet અને મલ્ટી-સ્ટારર ફિલ્મ Don't Look Upમાં દમદાર કામ કર્યું. HBOની આ સિરીઝમાં 'જીવન ચૌધરી'ના પાત્ર માટે તેમને 'પ્રાઇમટાઇમ એમી એવોર્ડ' (Outstanding Lead Actor) નું નોમિનેશન મળ્યું હતું.

ક્રિસ્ટોફર નોલનની ભવ્ય ફિલ્મ 'The Odyssey' માં પણ હિમેશ પટેલે મહત્ત્વની ભૂમિકા નિભાવીને ફરી એકવાર વૈશ્વિક મંચ પર પોતાનો ડંકો વગાડ્યો છે. વિશ્વભરમાં ભારત અને ગુજરાતનું નામ રોશન કરનાર હિમેશ પટેલ આજે નવી પેઢીના કલાકારો માટે એક મોટો પ્રેરણાસ્ત્રોત બન્યા છે.