'અમને ગોળી વાગી છે, જલ્દી આવો...': કુલગામમાં CRPF જવાનો પર આતંકી હુમલાના CCTV સામે આવ્યા

જમ્મુ-કાશ્મીરના કુલગામમાં સીઆરપીએફ જવાનો પર થયેલા આતંકી હુમલાનો ખતરનાક સીસીટીવી વીડિયો સોશિયલ મીડિયા પર વાયરલ થઈ રહ્યો છે. આ ક્લિપમાં સ્પષ્ટ જોઈ શકાય છે કે મીર બજાર સ્થિત બંધ દુકાનોની બહાર ફુટપાથ પર CRPF ના જવાનો બેઠા છે. બપોરે આશરે 2.06 કલાકે અચાનક ગોળીઓ ચાલી, ગોળીઓ જવાનની પાસે જમીન પર લાગી, જેનાથી ત્યાં ધૂળ ઉડવા લાગી. ખુદ પર અચાનક થયેલા આ હુમલા બાદ જવાન પોતાનો જીવ બચાવતા કવર લેવા માટે ભાગે છે અને ત્યારબાદ પોતાનું હથિયાર લઈ પરત આવી જોવા લાગે છે કે ગોળી ક્યાંથી ચાલી રહી છે.

સીસીટીવી ફુટેજમાં આશરે 5 મિનિટ સુધી ગોળીઓનો અવાજ, એકબીજાને એલર્ટ કરતા જવાનોનો અવાજ અને અફરા-તફરીનો માહોલ સ્પષ્ટ સાંભળી શકાય છે. બપોરે આશરે 2.07 કલાકે ફુલ કોમ્બેટ ગિયરમાં અન્ય એક જવાન દુકાનોની છત પર ચડેલો જોવા મળે છે, જ્યારે કેમેરાથી દૂર એક ઘાયલ જવાન જોરથી કહે છે, અમને ગોળી વાગી છે, જલ્દી આવો. આ વીડિયોમાં આશરે 25થી 30 રાઉન્ડ ફાયરિંગ રેકોર્ડ થયું છે. પરંતુ તે સ્પષ્ટ થઈ શક્યું નથી કે બધી ગોળીઓ આતંકીઓએ ચલાવી હતી કે કેટલીક ગોળીઓ જવાનો તરફથી જવાબી કાર્યવાહીમાં પણ ચલાવવામાં આવી હતી.

जम्मू कश्मीर के कुलगाम में आंतकियों द्वारा सीआरपीएफ जवानों पर लाईव हमले का वीडियो आया सामने #JammuKashmir https://t.co/yyGVjIYaSn

— Rajesh Kumar/राजेश कुमार/راجیش (@rajeshemmc) November 11, 2026

એક જવાનની સ્થિતિ ગંભીર

આ હુમલામાં ત્રણ જવાનો ઘાયલ થયા છે, જેને તત્કાલ ઘટનાસ્થળથી આશરે 22 કિલોમીટર દૂર અનંતનાગની હોસ્પિટલ પહોંચાડવામાં આવ્યા છે. ઈજાગ્રસ્તોમાંથી એક જવાનના પેટમાં ગોળી વાગી છે અને તેની સ્થિતિ નાજુક છે, જ્યારે બે અન્ય જવાનને હાથ અને પગમાં ઈજા થઈ છે.

ફાયરિંગ કર્યાં બાદ હુમલાખોરો પોતાની મોટરસાયકલથી ફરાર થઈ ગયા હતા, જ્યારબાદ સુરક્ષાદળોએ સમગ્ર વિસ્તારમાં સર્ચ ઓપરેશન શરૂ કર્યું છે. આતંકીઓને ટ્રેક કરવા અને તેની ઓળખ કરવા માટે તપાસ એજન્સીઓ આસપાસની દુકાનો અને ઈમારતોમાં લાગેલા સીસીટીવી ફુટેજને તપાસી રહી છે.