Gujarat News Live: રાજ્ય સરકારનો મહત્વપૂર્ણ નિર્ણય, વિદેશથી MBBS કરેલા ઇન્ટર્ન ડોક્ટરોને પણ મળશે સ્ટાઇપેન્ડ ,લલિત કગથરા 2027ની ચૂંટણી નહીં લડે

રાજ્ય સરકાર દ્વારા એક મહત્વપૂર્ણ નિર્ણય કરવામાં આવ્યો છે. હવે વિદેશથી MBBS કરેલા ઇન્ટર્ન ડોક્ટરોને પણ સ્ટાઇપેન્ડ મળશે. તેમને સામાન્ય ઇન્ટર્ન ડોક્ટરો સમકક્ષ દર મહિને 21,840 રૂપિયાનું સ્ટાઇપેન્ડ મળશે. સરકારી અને GMERS મેડિકલ કોલેજોમાં ઇન્ટર્નશીપ કરતા વિદ્યાર્થીઓને લાભ મળશે. રાજ્યના આશરે 350 જેટલા વિદ્યાર્થીઓને સીધો લાભ મળશે. તો નેશનલ મેડિકલ કમિશનના નિયમો મુજબ ભારતમાં એક વર્ષની ઇન્ટર્નશીપ ફરજિયાત કરાઈ છે.

મોરબી જિલ્લા કોંગ્રેસના પૂર્વ કાર્યકારી પ્રમુખ અને માજી ધારાસભ્યએ 2027ની વિધાનસભાની ચૂંટણી પહેલા મોટી જાહેરાત કરી છે. લલિત કગથરા કહ્યું છે કે, વર્ષ 2027માં હું ચૂંટણી લડવાનો નથી. કોંગ્રેસના આગેવાનો, હોદ્દેદારો અને કાર્યકરોની હાજરીમાં યોજાયેલ કાર્યક્રમમાં જાહેરાત કરી હતી.

રાજકોટ સહિત રાજ્યમાં મહેસૂલ વિભાગના વર્ગ-3ના કર્મચારીઓ માસ CL પર ઉતર્યા છે, તો જમીન દફતરના કર્મચારીઓએ પણ હડતાળ પર હોવાથી અરજદારોના કામ ટલ્લે ચડ્યા છે. કર્મચારીઓની હડતાળથી અરજદારોને આવકના દાખલા, 7-12 અને 8-અના દાખલા અને સિટી સર્વેને લગતા ડોક્યુમેન્ટ કઢાવવામાં હાલાકી પડી રહી છે. મહેસૂલ કર્મચારીઓ પડતર માંગણીઓને લઈને આજે માસ CL પર જતા અરજદારો હેરાન પરેશાન થયા છે.

વિધાનસભા ચૂંટણી 2027ને લઈને ભાજપ એક્શન મોડમાં આવી છે. ગુજરાત ભાજપ પ્રદેશ પ્રમુખ જગદીશ વિશ્વકર્મા અને પ્રભારી તરુણ ચુગની અધ્યક્ષતામાં કમલમ ખાતે બેઠકનું આયોજન કરવામાં આવ્યું છે. બેઠકમાં બંને સહ પ્રભારી તેમજ પ્રદેશ ટીમના સભ્યો પણ હાજર છે. આગામી દિવસોના ભાજપના સંગઠનાત્મક કાર્યક્રમો અંગે બેઠકમાં ચર્ચા કરવામાં આવશે.