Misal Pav Recipe: ઝણઝણીત મિસળ પાવ ઘરે બનાવવાની રીત, સ્ટ્રીટ સ્ટાઈલ તરીવાળો મસાલો બનાવવાનું જાણી લો સીક્રેટ

Misal Pav Recipe: મિસળ પાવ મહારાષ્ટ્રનું ફેમસ સ્ટ્રીટ ફૂડ છે. મિસળ પાવ એટલું ટેસ્ટી હોય છે કે લોકો સવારના નાસ્તાથી લઈને રાતના ભોજનમાં પણ મિસળ પાવ ખાવાનું પસંદ કરે છે. મિસળ પાવ મૂળ મહારાષ્ટ્રની વાનગી છે પરંતુ ગુજરાતમાં પણ આ વાનગી ખૂબ ખવાય છે. ગુજરાતના અલગ અલગ શહેરોમાં મિસળ પાવ માટે પ્રખ્યાત જગ્યાઓ પણ છે જ્યાં ટેસ્ટી અને તીખું તમતમતું મિસળ પાવ ખાવા મળે છે.

મિસળ પાવમાં મિક્સ કઠોળ પાવ અને સ્પેશિયલ તરી વાળો મસાલો સર્વ કરવામાં આવે છે. કઠોળ સાથે મસાલેદાર તરી, પાવ અને ફરસાણનું આ કોમ્બિનેશન એટલું જબરદસ્ત લાગે છે કે મિસળ પાવનું નામ આવતા જ મોઢામાં પાણી આવી જાય. મહારાષ્ટ્રનું સ્ટ્રીટ ફૂડ મિસળ પાવ ઘરે બનાવવું પણ સરળ છે. મિસળ પાવનો તરી વાળો મસાલો કેવી રીતે બનાવવો ચાલો તેના વિશે પણ તમને જાણકારી આપીએ.

મિસળ માટેની સામગ્રી

આદુ લસણની પેસ્ટ, બાફેલા બટેટા, ફણગાવેલા મિક્સ કઠોળ, ગરમ મસાલો, તજ લવિંગનો પાવડર, લીંબુનો રસ, મીઠું તેલ અને પાણી

મિસળની ગ્રેવી બનાવવા માટેની સામગ્રી

4 મોટા ચમચા તેલ, લાલ મરચું પાવડર, હળદર અને ગરમ મસાલો, ધાણાજીરું પાવડર, તજ અને લવિંગનો પાવડર, ખમણેલું નાળિયેર, 2 ટમેટા ઝીણા સમારેલા, 1 ડુંગળી ઝીણી સમારેલી, આદુ-લસણની પેસ્ટ.

મિસળ બનાવવાની રીત

સૌથી પહેલા ગ્રેવી અને ગ્રેવી માટેનો મસાલો બનાવવો તેના માટે એક પેનમાં તેલ ગરમ કરી તેમાં આદુ-લસણ અને ડુંગળી સાંતળો. ડુંગળી બ્રાઉન થઈ જાય પછી તેમાં ટમેટા અને ખમણેલું નાળિયેર ઉમેરી ધીમા તાપે શેકો. નાળિયેર કુક થઈ જાય પછી ગેસ બંધ કરીને મિશ્રણને ઠંડું કરી તેની પેસ્ટ બનાવી લો.

ત્યાર પછી ફરી એક પેનમાં તેલ ગરમ કરો અને તેમાં તૈયાર કરેલી મસાલાની પેસ્ટ ધીમા તાપે સાંતળો. સાથે જ તેમાં મરચાંની પેસ્ટ, ગરમ મસાલો, હળદર અને ધાણાજીરું ઉમેરો. 1 મિનિટ પછી તેમાં તજ અને લવિંગનો પાવડર ઉમેરી બરાબર સાંતળો. મસાલા કુક થઈ જાય અને તેલ છૂટું પડી જાય એટલે તેમાં ત્રણ કપ પાણી ઉમેરો. પાણી ઉકળવા લાગે અને તેના પર તેલ અલગ થઈ જાય એટલે ગેસ બંધ કરી તૈયાર કરેલી મસાલાની તરી સાઇડ પર રાખો

હવે મિસળ બનાવવા માટે એક પેનમાં તેલ ગરમ કરો અને તેમાં આદુ અને લસણ ઉમેરો. સાથે જ તેમાં ફણગાવેલા કઠોળ અને બાફેલા બટેટાના ટુકડા ઉમેરો. થોડું પાણી ઉમેરી ફણગાવેલા કઠોળને કુક થઈ જવા દો. કઠોળ અને બટેટામાં પણ સ્વાદ પ્રમાણે મીઠું હળદર ગરમ મસાલો અને તજ લવિંગનો પાવડર ઉમેરો. છેલ્લે તેમાં લીંબુનો રસ ઉમેરી થોડું પાણી ઉમેરી મસાલાને પાંચથી દસ મિનિટ પકાવો.

મિસળ સર્વ કરવાની રીત

મિસળમાં બે અલગ અલગ વસ્તુઓ તૈયાર કરેલી હોય છે તેથી તેને સર્વ કરવાની રીત પણ અલગ હોય છે. સૌથી પહેલા એક પ્લેટ કે વાટકીમાં કઠોળ અને બટેટાનું મસાલેદાર મિશ્રણ લેવું. તેના પર તૈયાર કરેલી મસાલાની તરી ઉમેરવી. આ મિશ્રણ પર ઝીણી સમારેલી ડુંગળી કોથમીર અને ફરસાણ ઉમેરવું. આ રીતે તૈયાર કરેલા મિશ્રણને પાવ સાથે સર્વ કરો.