Gulab Jamun: માવાની જરૂર જ નથી, મિલ્ક પાવડરથી બનાવો મોમાં મુકતાં જ ઓગળી જાય એવા ગુલાબજાંબુ

Gulab Jamun Recipe: તહેવારના દિવસોમાં મીઠાઈ બનાવવામાં વપરાતા માવાની ડિમાન્ડ વધી જતી હોય છે. માર્કેટમાંથી માવો ખરીદીથી વખતે ધ્યાન રાખવું પડે છે કારણ કે તહેવારના સમયમાં વસ્તુઓમાં ભેળસેળનું પ્રમાણ પણ વધી જાય છે. માવામાં થતી ભેળસેળની ચિંતા વિના જો કોઈ મીઠાઈ બનાવવી હોય તો ગુલાબજાંબુ બનાવી શકાય છે.

સામાન્ય રીતે ગુલાબજાંબુમાં પણ માવાનો ઉપયોગ થાય છે પરંતુ જો તમે માવા વિનાના ગુલાબજાંબુ બનાવવા ઇચ્છતા હોય તો તે પણ શક્ય છે. મોઢામાં મુકતાં જ ઓગળી જાય એવા સોફ્ટ અને સ્વાદિષ્ટ ગુલાબજાંબુ મિલ્ક પાવડરની મદદથી પણ તૈયાર કરી શકાય છે. જો તમારે માવા કે મીઠાઈની ભેળસેળની ચિંતા વિના ઘરે બનાવેલી સ્વાદિષ્ટ મીઠાઈ તહેવારમાં ખાવી હોય તો ઘરે મિલ્ક પાઉડરના ગુલાબજાંબુ બનાવી લો. મિલ્ક પાવડર, તાજી મલાઈ અને કેટલીક ઘરની વસ્તુથી ગુલાબજાંબુ કેવી રીતે બને ચાલો તેની રીત જણાવીએ.

આ પણ વાંચો: Shakkarpara Recipe: હવે ઘરે પણ બનશે બજાર જેવા જ ટેસ્ટી અને કરકરા શક્કરપારા, આ રહ્યું પરફેક્ટ માપ અને રીત

ગુલાબજાંબુ માટેની સામગ્રી

મિલ્ક પાવડર એક કપ 
મેંદો અડધો કપ
બે કપ ખાંડ 
બે કપ પાણી 
એલચી પાવડર
તાજી મલાઈ અડધો કપ 
બેકિંગ પાવડર 
દૂધ જરૂર અનુસ
તેલ અથવા ઘી ગુલાબ જાંબુ તળવા માટે

આ પણ વાંચો: Mohanthal Recipe: મીઠાઈની દુકાને મળે એવો જ દાણેદાર અને સોફ્ટ મોહનથાળ બનાવવાની રીત

ગુલાબજાંબુની ચાસણી

ગુલાબજાંબુ બનાવો તે પહેલા તેની ચાસણી બનાવીને સાઈડમાં રાખી દો જેથી ચાસણી ઠંડી થઈ જાય. ચાસણી બનાવવા માટે બે કપ ખાંડમાં બે કપ પાણી મિક્સ કરી મીડીયમ તાપ પર ગરમ કરવા મુકો. ચાસણીમાં એલચીનો પાવડર પણ મિક્સ કરી દો. જ્યારે ખાંડ પાણીમાં બરાબર ઓગળી જાય અને પાણી થોડું ઘટ્ટ અને ચીકણું લાગે એટલે ગેસ બંધ કરી દો. ગુલાબજાંબુની ચાસણી વધારે ઘટ્ટ કરવી નહીં.

ગુલાબ જાંબુ બનાવવાની રીત

• સૌથી પહેલા એક મોટું વાસણ લો અને તેમાં મેંદો, મિલ્ક પાવડર અને બેકિંગ પાઉડર મિક્સ કરીને ચાળી લો. ચાળવાનું મુખ્ય કારણ એ છે કે ત્રણેય વસ્તુ એકબીજા સાથે ભળી જાય અને લોટમાં ગાંઠા ન રહે.
• ત્યાર પછી એક વાટકીમાં મલાઈ લઈ તેને બરાબર ફેંટો અને પછી મિશ્રણમાં ધીરે ધીરે ઉમેરી લોટ મિક્સ કરો. મલાઈ મિક્સ કર્યા પછી જો લોટ કડક લાગતો હોય તો જરૂર પ્રમાણે દૂધ ઉમેરીને નરમ લોટ તૈયાર કરો. ગુલાબ જાંબુ માટે નો લોટ સોફ્ટ રાખવો.
• લોટ તૈયાર થઈ જાય પછી પાંચથી દસ મિનિટ તેને હળવા હાથે મસળો જેથી ગુલાબજાંબુ એકદમ ફ્લપી બને. ત્યાર પછી લોટમાંથી નાના નાના ગુલાબજાંબુ બનાવી લો.

આ પણ વાંચો: Mug Pulav Recipe: આણંદનો પ્રખ્યાત મગ પુલાવ બનાવવાની રીત, નાના-મોટા સૌ કોઈ આંગળા ચાટીને ખાશે

• ગુલાબજાંબુ બની જાય એટલે તેને ભીના કપડાથી ઢાંકી દો જેથી તેમાં કોઈ ક્રેક ના આવે અને ઉપરનું લેયર સુકાઈ નહીં.
• એક કડાઈમાં તેલ અથવા ઘી ગરમ કરો. તેલ અથવા ઘી ગરમ થઈ જાય પછી ગેસની ફ્લેમ મીડીયમ કરી દો અને પછી ધીરે ધીરે તેમાં ગુલાબજાંબુ ઉમેરી ગુલાબજાંબુને બરાબર તળી લો.
• ગુલાબ જાંબુ તળાઈ જાય પછી તેલ અથવા ઘીમાંથી કાઢીને તુરંત તેને ચાસણીમાં પલાળી દો. તળાયેલા ગરમ જાંબુને તુરંત જ ચાસણીમાં રાખી દેવાથી ચાસણી અંદર સુધી ઉતરે છે. ગુલાબ જાંબુને ચાસણીમાં 30 થી 40 મિનિટ પલળવા દો. ત્યાર પછી હળવા હાથે ગુલાબજાંબુને હલાવી અને પછી ફ્રિજમાં મૂકી દો.
• ઠંડા થયેલા ગુલાબજાંબુને સર્વ કરતાં પહેલાં તેના પર પિસ્તા અને બદામની કતરણ પણ છાંટી શકો છો.