Food Poisoning: ફૂડ પોઈઝનિંગના થયું છે તે કેવી રીતે ખબર પડે ? જાણો લક્ષણો અને પ્રાથમિક સારવારના ઉપાયો

Food Poisoning: દૂષિત ભોજન કે પાણીના કારણે ફૂડ પોઈઝનિંગ થઈ શકે છે. ખાદ્ય સામગ્રી કે પ્રવાહીના માધ્યમથી જ્યારે શરીરમાં બેક્ટેરિયા, વાયરસ કે ઝેરી તત્વો પહોંચી જાય તો તેના કારણે ફૂડ પોઈઝનિંગ થાય છે. શરૂઆતથી લક્ષણો સામાન્ય લાગે છે પરંતુ જો તેના પર ધ્યાન આપવામાં ન આવે અને જરૂરી પગલાં લેવામાં ન આવે તો ફૂડ પોઈઝનિંગ ગંભીર સ્થિતિ સર્જી શકે છે. આજે તમને જણાવીએ ફૂડ પોઈઝનિંગ થયું હોય તે વાતની ખબર કયા લક્ષણો પરથી પડે અને કોઈ વ્યક્તિને ફૂડ પોઈઝનિંગ થાય તો તેણે તુરંત શું કરવું જોઈએ ?

ફૂડ પોઈઝનિંગના લક્ષણો

દૂષિત પાણી કે ખાદ્ય વસ્તુના કારણે જો ફૂડ પોઈઝનિંગ થઈ ગયું હોય તો તેના શરૂઆતથી લક્ષણો સામાન્ય હોય છે. જેમકે શરૂઆતમાં પેટમાં દુખાવો થાય, પેટમાં ચૂંક આવે, ઉલટી થઈ જાય, ડાયેરિયા થાય, માથામાં દુખાવો રહે અને શરીરમાં નબળાઈ જેવો અનુભવ થાય છે. ઘણા લોકોને ફૂડ પોઈઝનિંગમાં તાવ પણ આવે છે, ધ્રુજારી થાય છે અને પાણી ઘટી જવાથી ડિહાઇડ્રેશન પણ થઈ શકે છે.

ફૂડ પોઈઝનિંગ થાય તો તુરંત શું કરવું ?

ડોક્ટરના જણાવ્યા અનુસાર ફૂડ પોઈઝનિંગ થાય ત્યારે મોટાભાગે વ્યક્તિને ઝાડા કે ઉલટી થાય છે. આ સ્થિતિમાં શરીરમાંથી પાણી ઝડપથી નીકળી જાય છે. એટલા માટે સૌથી પહેલું કામ છે કે શરીરને હાઇડ્રેટ રાખવું. ડીહાઇડ્રેશનના આવા લક્ષણ દેખાય તો દિવસ દરમિયાન થોડું થોડું પાણી પીતા રહેવું. પાણીની સાથે નાળિયેર પાણી, છાશ, લીંબુ શરબત જેવું પ્રવાહી પણ લેતા રહેવું જેથી શરીરમાં પાણીની ખામીના કારણે ડિહાઇડ્રેશન ન થાય. ડિહાઇડ્રેશનથી બચવા માટે ઓઆરએસ પણ લઈ શકાય છે.

ભારે ખોરાક લેવાનું બંધ કરો

ફૂડ પોઈઝનિંગ જેવા લક્ષણો જણાતા હોય તો શરીરને હાઇડ્રેટ રાખવાની સાથે ખોરાકમાં પણ ફેરફાર કરો. ફૂડ પોઈઝનિંગના લક્ષણો દરમિયાન ભારે ખોરાક લેવાનું બંધ કરો. આ સમય દરમિયાન હળવો અને પચવામાં સરળ હોય તેવો ખોરાક લેવો. ભરપેટ જમવાનું પણ ટાળવું. ફૂડ પોઈઝનિંગ જેવી સ્થિતિમાં ખીચડી, દલિયા, દાળ ભાત, મગનું પાણી કે પછી ફળ ખાવાનું રાખવું.. પચવામાં ભારે હોય તેવો ખોરાક કે મસાલેદાર વસ્તુઓ ખાવાથી તબિયત બગડી શકે છે.

પૂરતો આરામ કરો

ફૂડ પોઈઝનિંગના કારણે શરીરમાં નબળાઈ આવી શકે છે. આ સિવાય શરીરને વાઇરસ કે બેક્ટેરિયા સામે લડવામાં પણ ઊર્જાની જરૂર પડે છે. તેથી આવા સમયે પૂરતા પ્રમાણમાં આરામ કરો. આરામ કરવાથી રિકવરી ઝડપથી થાય છે અને ઈમ્યુમ સિસ્ટમ સારી રીતે કામ કરે છે.

ડોક્ટરને ક્યારે દેખાડવું

ફૂડ પોઈઝનિંગના લક્ષણો દેખાતા હોય અને ઉપર જણાવ્યા અનુસારની પ્રાથમિક સારવાર લીધા પછી પણ જો જાડા કે ઉલટી બંધ ન થાય અને નબળાઈ આવી જાય તો તુરંત જ ડોક્ટરને બતાવો. આ સિવાય મળમાં લોહી દેખાય કે પછી મળનો રંગ કાળો થઈ જાય તો પણ તુરંત જ ડોક્ટરને દેખાડો. ફૂડ પોઈઝનિંગના લક્ષણોની સાથે દર્દીને વધારે તાવ આવે કે શરીરમાં તીવ્ર દુખાવો થતો હોય તો સમય બગાડ્યા વિના ડોક્ટરનો સંપર્ક કરવો.

(Disclaimer: અહીં આપેલી માહિતી અને ઘરગથ્થુ ઉપચાર સામાન્ય માહિતી પર આધારિત છે. તેને અપનાવતા પહેલા તબીબી સલાહ લેવી જોઈએ. ZEE24kalak તેની પુષ્ટિ કરતું નથી.)