લંડનથી શિકાગો જઈ રહેલું વિમાન અચાનક 28,000 ફૂટ નીચે આવી ગયું, ઇન-ફ્લાઇટ ઈમરજન્સી જાહેર

British Airways : લંડનથી શિકાગો જતી બ્રિટિશ એરવેઝની ફ્લાઇટમાં હવામાં જ ઇમરજન્સી જાહેર થતાં અફરાતફરી મચી ગઈ હતી. એટલાન્ટિક મહાસાગર પરની આ મુસાફરીના લગભગ એક કલાક બાદ જ્યારે વિમાન આયર્લેન્ડ ઉપર 37000 ફૂટની ઊંચાઈએ ઉડી રહ્યું હતું, ત્યારે તે અચાનક 9000 ફૂટ નીચે ઉતરી ગયું હતું. આ ઘટના અચાનક સર્જાયેલી તકનીકી ખામીને કારણે બની હતી.

આ દરમિયાન ફ્લાઇટ BA295ના પાઇલટોએ તરત જ રેડિયો દ્વારા '7700 સ્ક્વોક કોડ' જાહેર કર્યો. આ ચોક્કસ કોડ સંકેત આપે છે કે વિમાન કોઈ મોટી સમસ્યા અથવા ગંભીર સંકટનો સામનો કરી રહ્યું છે અને તેને એર ટ્રાફિક કંટ્રોલ પાસેથી તાત્કાલિક મદદની જરૂર છે. કોડ જારી થતાંની સાથે જ એર ટ્રાફિક કંટ્રોલર્સ હાઈ એલર્ટ પર આવી ગયા અને વિમાનના સુરક્ષિત ઉતરાણ માટેના પ્રયાસો શરૂ કરવામાં આવ્યા.

ખામીનું કારણ જાણી શકાયું નથી

વિમાનમાં સવાર મુસાફરો અને ક્રૂની સુરક્ષાને પ્રાથમિકતા આપીને ફ્લાઇટનો રસ્તો બદલવામાં આવ્યો હતો. આ ઘટનાના સમાચાર સોશિયલ મીડિયા અને ફ્લાઇટ-ટ્રેકિંગ વેબસાઇટ્સ પર ચર્ચાનો વિષય બન્યા હતા. સત્તાવાળાઓ હાલમાં વિમાનને નજીકના એરપોર્ટ પર સુરક્ષિત રીતે ઉતારવા માટે સંપૂર્ણ રીતે તૈયાર છે, જ્યારે ખામીના ચોક્કસ કારણની તપાસ કરવામાં આવી રહી છે.

#BA295 from London to Chicago squawking 7700 and descended down to 9000 feet above Ireland. https://t.co/KTkShOpJUh https://t.co/McVLR7XzEA

— Flightradar24 (@flightradar24) October 5, 2026

વિમાન મિનિટોમાં 37000 ફૂટથી 9000 ફૂટ પર આવી ગયું

બ્રિટિશ એરવેઝની ફ્લાઇટ BA295 આજે સવારે 11:50 વાગ્યે લંડનના હીથ્રો એરપોર્ટના ટર્મિનલ 5થી શિકાગોના ઓ'હેર ઇન્ટરનેશનલ એરપોર્ટ જવા માટે રવાના થઈ હતી. આ 8 કલાક અને 40 મિનિટની નિર્ધારિત ફ્લાઇટ હતી. ટેક-ઓફના લગભગ એક કલાક પછી જ્યારે વિમાન 37000 ફૂટની ઊંચાઈએ પહોંચ્યું, ત્યારે તેમાં અચાનક તકનીકી ખામી સર્જાઈ હતી. એર ટ્રાફિક ટ્રેકિંગ ડેટા સૂચવે છે કે લાંબા અંતરના ટ્વિન-જેટ વિમાને ઝડપથી નીચે ઉતરવાનું શરૂ કર્યું અને માત્ર થોડી મિનિટોમાં 28000 ફૂટ નીચે ઉતરીને 9000 ફૂટે પહોંચી ગયું હતું.