આકાશમાં ભારતનું 'અભેદ્ય ચક્રવ્યૂહ': ઈઝરાયેલ સાથે ₹8,000 કરોડની મેગા ડિફેન્સ ડીલ અને DRDOનો 'સુખોઈ' માસ્ટર પ્લાન!

Indian Air Force : આકાશી યુદ્ધમાં ભારત હવે એવું અભેદ્ય ચક્રવ્યૂહ રચી રહ્યું છે...જેની સામે દુશ્મનની દરેક ચાલ નિષ્ફળ સાબિત થશે. ભારત અને ઈઝરાયેલ વચ્ચે આશરે 8,000 કરોડ રૂપિયાની મેગા ડિફેન્સ ડીલ હવે અંતિમ તબક્કામાં પહોંચી ગઈ છે. આ મહાડીલથી ડ્રેગન એટલે કે ચીન અને પાકિસ્તાનની ચિંતામાં વધારો થવો નક્કી છે. બીજી તરફ સંરક્ષણ સંશોધન અને વિકાસ સંગઠન એટલે કે DRDOએ ભારતીય વાયુસેનાના સૌથી શક્તિશાળી ફાઇટર જેટ Su-30MKI માટે એક અત્યંત શક્તિશાળી સ્વદેશી માસ્ટર પ્લાન તૈયાર કર્યો છે.

• ભારત-ઈઝરાયેલ વચ્ચે મેગા ડિફેન્સ ડીલ
• આઠ હજાર કરોડના સંરક્ષણ સોદા
• ચીન-પાકિસ્તાનની વધશે ચિંતા હવે
• વાયુસેનાને મળશે છ નવા ટેન્કર
• J-20 સ્ટેલ્થ વિમાનો પર રહેશે નજર

સૌપ્રથમ વાત કરીએ આકાશમાં ભારતની તાકાત અનેક ગણી વધારનારી એ મહાડીલની, જે ભારત અને ઈઝરાયેલની ગાઢ મિત્રતાનું વધુ એક ઉદાહરણ બનવા જઈ રહી છે. ભારત અને ઈઝરાયેલની સરકારી સંરક્ષણ કંપની ઈઝરાયેલ એરોસ્પેસ ઈન્ડસ્ટ્રીઝ એટલે કે IAI વચ્ચે આશરે 900 મિલિયન ડોલર એટલે કે લગભગ 8,000 કરોડ રૂપિયાના સંરક્ષણ સોદા પર મહોર લાગવાની તૈયારી છે. આ ડીલ હેઠળ IAI ભારતીય વાયુસેનાને 6 અત્યાધુનિક એર-ટુ-એર રિફ્યુઅલિંગ એરક્રાફ્ટ પૂરા પાડશે..

દુનિયાના 12થી વધુ દેશો માટે આવા વિમાનોને કન્વર્ટ કરી ચૂક્યું છે

ખાસ વાત એ છે કે આ સ્પર્ધામાં રશિયા અને યુરોપની અનેક મોટી સંરક્ષણ કંપનીઓ મૂલ્યાંકનના માપદંડો પૂર્ણ કરવામાં નિષ્ફળ રહી હતી ત્યાર બાદ IAI એકમાત્ર લાયક બિડર તરીકે સામે આવી છે. ઈઝરાયેલને હવામાં જ વિમાનોમાં ઇંધણ ભરતાં ટેન્કર એરક્રાફ્ટ તૈયાર કરવાનો 40 વર્ષથી વધુનો અનુભવ છે. ઈઝરાયેલ અત્યાર સુધીમાં દુનિયાના 12થી વધુ દેશો માટે આવા વિમાનોને કન્વર્ટ કરી ચૂક્યું છે. આ નવા ટેન્કર વિમાનોના આગમનથી ભારતીય વાયુસેનાનાં જૂનાં થઈ ગયેલાં રશિયન Il-78 વિમાનોનું સ્થાન લેવામાં આવશે. ડીલ ફાઇનલ થયા બાદ વર્ષ 2028થી 2030 દરમિયાન આ વિમાનોની ડિલિવરી થવાની આશા છે.

શું છે ખાસિયતો..

• આ ટેન્કર વિમાનોના કારણે આપણા ફાઇટર જેટ્સ હવામાં જ ઇંધણ ભરી શકશે. 
• પરિણામે તેઓ લાંબા અંતર સુધી ઉડાન ભરી શકશે અને દુશ્મનની સરહદમાં ઘૂસીને હવાઈ હુમલા કરવાની ક્ષમતા પણ વધશે. 

અસલી રમત તો ત્યારથી શરૂ થશે, જ્યારે આકાશમાં યુદ્ધ છેડાશે અને દુશ્મન પોતાના સ્ટેલ્થ ફાઈટર જેટ્સ પર ગર્વ કરશે ત્યારે ભારતનું બ્રહ્માસ્ત્ર એટલે કે Su-30MKI આકાશમાં પોતાની ઘાતક ક્ષમતાનું પ્રદર્શન કરીને દુશ્મનને ભારે પડકાર આપશે.

 વિરૂપક્ષ રડારનો અત્યાધુનિક માસ્ટર પ્લાન કઈ રીતે કરશે કામ

ચીન પાસે ભલે J-20 જેવા સ્ટેલ્થ ફાઇટર જેટ્સ હોય, પરંતુ વિરૂપક્ષ રડારનું શક્તિશાળી GaN આર્કિટેક્ચર રડારથી બચવા માટે તૈયાર કરાયેલા આ વિમાનોને પણ શોધવાની ક્ષમતા ધરાવે છે. જેના કારણે દુશ્મનનાં સ્ટેલ્થ વિમાનો માટે છુપાઈને હુમલો કરવાનું મુશ્કેલ બની શકે છે. જ્યારે આ અત્યાધુનિક સ્વદેશી AESA રડારને આધુનિક ઇન્ફ્રારેડ ટ્રેકિંગ સિસ્ટમ, અદ્યતન ઇલેક્ટ્રોનિક વોરફેર સૂટ અને અસ્ત્ર જેવી લાંબા અંતરની સ્વદેશી મિસાઇલોનો સાથ મળશે, ત્યારે ભારતીય વાયુસેનાનો આ કાફલો આધુનિક યુદ્ધક્ષેત્રમાં વધુ શક્તિશાળી બની જશે..

ઈઝરાયેલ સાથેની 8 હજાર કરોડ રૂપિયાની આ મહાડીલ અને DRDOનું વિરૂપક્ષ રડાર એ વાતનો સંકેત આપે છે કે ભારત હવે સંરક્ષણ ક્ષેત્રમાં માત્ર ખરીદદાર બનીને રહેવા માગતું નથી, પરંતુ સ્વદેશી ટેક્નોલોજીના આધારે વૈશ્વિક સ્તરે પોતાની ક્ષમતા સ્થાપિત કરવા તરફ આગળ વધી રહ્યું છે.