વડોદરા : જમીન દલાલ સુનિલ બન્યો સમીર, મુસ્લિમ યુવતીને પ્રેમજાળમાં ફસાવી વારંવાર આચર્યું દુષ્કર્મ
પ્રેમ અને આકર્ષણ એકબીજાના પુરક પણ છે અને વિરોધી પણ છે, પરંતુ જ્યારે પ્રેમના નામે કોઈ ઠગબાજી થાય ત્યારે માણસને પોતાની જીંદગી નરક સમાન લાગવા લાગે છે. ત્યારે આવી જ એક કંપાવનારી ઘટના વડોદરામાં બની છે. જ્યાં ઓળખ છુપાવીને હવસખોરે એક યુવતીના જીવનમાં આગ લગાવી દીધી છે. જો કે, પોલીસે આરોપીને દબોચી લીધો છે.
જયંતી સોલંકી, વડોદરા : કહેવાય છે ને કે પ્રેમમાં માણસ આંધળો બની જાય છે અને પોતાના પ્રિયતમ માટે સર્વસ્વ અર્પણ કરી દે છે, પરંતુ આટલી બધી કુરબાની બાદ પણ જ્યારે હૃદય પર ઠગાઈનું ખંજર વાર કરે છે. ત્યારે ન માત્ર હૃદય પરંતુ વ્યક્તિની જીંદગી પણ તબાહ થઈ જાય છે. વડોદરામાં પ્રેમમાં દગો મળવાની ઘટના બની છે. જ્યાં એક જમીન દલાલે પોતાની ઓળખ છુપાવીને મુસ્લિમ યુવતીને પહેલા તો પ્રેમજાળમાં ફસાવી અને ત્યાર બાદ વારંવાર દુષ્કર્મ આચર્યું.
લગ્નની લાલચ આપી વારંવાર આચર્યું દુષ્કર્મ
આ મામલે વડોદરાના ગોત્રી પોલીસ મથકે દુષ્કર્મની ફરિયાદ નોંધાઈ છે. પીડિતાના જણાવ્યા મુજબ શહેરના અકોટા, ગોત્રી અને ભાયલી વિસ્તારમાં આવેલી જુદી-જુદી હોટલોમાં લઈ જઈને દુષ્કર્મ આચર્યું હતું. આરોપીએ સમીર ઉસ્માનિયા તરીકે આધાર કાર્ડ પણ બનાવ્યું હોવાનો પીડિતાનો આરોપ છે. તો પીડિતાએ બે વખત ગર્ભપાત કરાવ્યો હોવાનો પણ ગંભીર આક્ષેપ આરોપી પર લગાવવામાં આવ્યો છે.
પોલીસે આરોપીની કરી ધરપકડ
પોલીસ કમિશનરના આદેશ બાદ ફરિયાદ નોંધાતા પોલીસ તુરંત હરકતમાં આવી અને સુનિલ મહીડાની તાત્કાલિક ધોરણે ધરપકડ કરી લેવામાં આવી. જે બાદ આરોપીને કોર્ટ સમક્ષ રજૂ કરીને પોલીસે રિમાન્ડ પણ મેળવ્યા. હવે આરોપીએ ખરેખર બનાવટી ઓળખના દસ્તાવેજો બનાવ્યા છે કે કેમ, પીડિતા સાથે કરેલા કૃત્ય વગેરે જેવા મામલે તપાસ કરી રહી છે.
વડોદરાની ઘટનામાં ગંભીર આરોપો બાદ ફરિયાદ અને આખરે આરોપીની ધરપકડ તો થઈ ચૂકી છે, પરંતુ હવે પોલીસની તપાસમાં શું તથ્યો સામે આવે છે તેના પર સૌ કોઈની નજર છે.
