અમરેલી પંથકમાં કપાસ પર આ રોગનો આતંક: 10-12 મણની સામે માત્ર 2 થી 3 મણ ઉતારો આવવાની દહેશત

કેતન બગડા/અમરેલી: અમરેલી જિલ્લામાં ચોમાસાની ની શરૂઆતમાં ખૂબ સારો વરસાદ પડ્યો હતો. ક્યાંક ધીમીધારે તો ક્યાંક ધોધમાર વરસાદ પડ્યો હતો. ખેડૂતોને આ વખતે આશા હતી કે કપાસનો પાક સારો થશે પરંતુ ખેડૂતોની આશા ઉપર પાણી ફરી વળ્યું છે કપાસના પાકમાં હાલ ચુસીયા અને મીલીબગ નામનો રોગ આવતા કપાસના છોડ સુકાવા લાગ્યા છે.

એક વીઘામાં ખેડૂતોને 10 થી 12 મણ કપાસ થવાની આશા હતી. પરંતુ ચૂસિયા અને મીલીબગ નામની જીવાત આવી જતા હવે બે થી ત્રણ મણનો ઉતારો આવશે. શરૂઆતમાં વરસાદ સારો હતો પરંતુ ઘણા લાંબા સમય થી વરસાદ ખેંચાયો હતો પરંતુ છેલ્લા પાંચ છ દિવસમાં મુર્જાતિ મોલાતને નવું જીવન મળ્યું હતું. પરંતુ કપાસમાં જીવાત આવી જતા કપાસના છોડ સુકાવા લાગ્યા છે.

અમરેલી જિલ્લામાં મોટાભાગના ખેડૂતો કપાસ અને મગફળીનું વધારે પ્રમાણમાં વાવેતર કરે છે ત્યારે આ વર્ષે ખેડૂતોને મોટી આશા હતી શરૂઆતમાં ખૂબ સારો વરસાદ થતાં કપાસનું વાવેતર ખૂબ સારું થશે અને ઉતારો પણ સારો આવશે તેવી ખેડૂતોને આશા હતી. ત્યારે કપાસ માં અચાનક સુકારો આવવા લાગ્યો હતો ત્યારે ખેડૂતોએ મીલીબગ અને ચુસિયા નામની જીવાત સામે દવાનો છંટકાવ પણ કર્યો હતો. પરંતુ કપાસના છોડ સુકાઈ જતા ખેડૂતોની મહેનત ઉપર પાણી ફરી વળ્યું છે.

સાવરકુંડલા તાલુકાના રામપરા ગામે ખેડૂતોના કપાસમાં મીલીબગ અને ચૂસીયા નામનો રોગ આવતા કપાસ લાલ થઈને સુકાવા લાગ્યો છે.કપાસમાં જીવાત આવી જતા ખેડૂતોએ દવાનો છટકાવ કર્યો પરંતુ કપાસમાં કોઈ અસર થઈ નહિ.ત્યારે ખેડૂતોને દવા,ખાતર,મજૂરી સહિતનો ખર્ચ માથે પડ્યો છે.