ગાંધીનગર: રૂપાલમાં ભક્તોનું ઘોડાપૂર, મધરાતે નીકળશે વરદાયિની માતાની પલ્લી

Rupal Palli Mahotsav : ગાંધીનગરના રૂપાલ ગામમાં વરદાયિની માતાજીના મંદિરે નોમના પાવન અવસરે પરંપરાગત પલ્લી મહોત્સવનું ભવ્ય આયોજન કરવામાં આવ્યું છે. આ મહોત્સવમાં માતાજીની પલ્લીનાં દર્શન કરવા માટે દેશભરમાંથી મોટી સંખ્યામાં ભક્તો ઉમટી પડ્યા છે. સમગ્ર રૂપાલ ગામ ભક્તિભાવ અને માતાજીના જયઘોષથી ગુંજી ઊઠ્યું છે.

ચંદ્ર-રાહુની યુતિથી બનશે ગ્રહણ દોષ, 21 ઓક્ટોબરથી આ 3 રાશિઓની વધી શકે છે મુશ્કેલી, અચાનક વધશે ખર્ચા!

પરંપરા મુજબ મધરાત્રે 12 વાગ્યા બાદ માતાજીની પરવાનગી સાથે પાંચ દિવ્ય જ્યોત ધરાવતી પલ્લીનું પરિભ્રમણ શરૂ થશે. પલ્લી રૂપાલ ગામના 27 નિશ્ચિત ચોકમાંથી પસાર થશે. આ પાવન પ્રસંગે ભક્તો પલ્લી પર શુદ્ધ ઘીનો અભિષેક કરશે. પલ્લી પર કરોડો રૂપિયાનું ઘી અર્પણ થવાની પરંપરાને કારણે ગામની ગલીઓ અને માર્ગો પર ઘીની નદીઓ વહેતી જોવા મળશે. આ અનોખી પરંપરાને કારણે રૂપાલ પલ્લી મહોત્સવ ગુજરાત સહિત દેશભરમાં વિશેષ ઓળખ ધરાવે છે.

સુરક્ષાને લઈ તંત્ર સજ્જ

રૂપાલ પલ્લી મહોત્સવમાં મોટી સંખ્યામાં શ્રદ્ધાળુઓ ઉમટી પડતા કાયદો અને વ્યવસ્થા જાળવવા માટે તંત્ર દ્વારા સઘન સુરક્ષા વ્યવસ્થા ગોઠવવામાં આવી છે. સુરક્ષાની જવાબદારી માટે 11 એક્ઝિક્યુટિવ મેજિસ્ટ્રેટ અને 42 જવાબદાર અધિકારીઓની નિમણૂક કરવામાં આવી છે. આ ઉપરાંત 500થી વધુ પોલીસ કર્મચારીઓ અને 300 હોમગાર્ડ જવાનો તૈનાત રહેશે.

દર્શનાર્થીઓને અવરજવરમાં મુશ્કેલી ન પડે અને ટ્રાફિકનું યોગ્ય સંચાલન થાય તે માટે મુખ્ય માર્ગો પર ભારે વાહનોની અવરજવર પર પ્રતિબંધ મૂકવાની વ્યવસ્થા પણ કરવામાં આવી છે.

મુખ્યમંત્રી ભુપેન્દ્ર પટેલે કર્યા માતાજીનાં દર્શન

રૂપાલ પલ્લી મહોત્સવના પાવન અવસરે ગુજરાતના મુખ્યમંત્રી ભુપેન્દ્ર પટેલે પણ વરદાયિની માતાજીનાં દર્શન કર્યા હતા. પલ્લી મહોત્સવને લઈને સમગ્ર વિસ્તારમાં ભક્તિમય માહોલ છવાયો છે અને શ્રદ્ધાળુઓ માતાજીનાં દર્શન કરી ધન્યતા અનુભવી રહ્યા છે. દર વર્ષે આ મહોત્સવમાં મોટી સંખ્યામાં ભક્તો આવે છે.