સુરતથી ચેન્નાઈ 16 કલાકમાં, નવા એક્સપ્રેસ-વેથી નાસિક, સોલાપુર, તિરુપતિ સુધી હાઈસ્પીડ કનેક્ટિવિટી, 5 મોટા રાજ્યોને જોડાશે

Surat-Chennai Expressway: સુરત-ચેન્નાઈ એક્સપ્રેસવે ગુજરાતથી દક્ષિણ વચ્ચેની રોડ કનેક્ટિવિટીને સંપૂર્ણપણે બદલી નાખવા જઈ રહ્યો છે. અત્યાર સુધી સુરતથી ચેન્નાઈની સફર પૂર્ણ કરવામાં 36 કલાકનો સમય લાગતો હતો, પરંતુ હવે આ સફર 16 કલાકમાં પૂરી થઈ જશે. ભારતમાલા પરિયોજના હેઠળ બની રહેલા આ એક્સપ્રેસવેથી ગુજરાત સીધું મહારાષ્ટ્ર, કર્ણાટક, તેલંગાણા, આંધ્ર પ્રદેશ અને તમિલનાડુ સાથે કનેક્ટ થઈ જશે. જેનાથી 900 કિલોમીટરની આ સફરમાં શાનદાર કનેક્ટિવિટી મળશે. આ પ્રોજેક્ટને અલગ-અલગ તબક્કામાં પૂરો કરવામાં આવી રહ્યો છે. જેમાં અનેક મોટા શહેરો એકબીજા સાથે જોડાઈ જશે. આ એક્સપ્રેસવે સંપૂર્ણ રીતે ચાલુ થયા બાદ ગુજરાતથી લઈને તમિલનાડુ સુધી શાનદાર હાઈસ્પીડ કનેક્ટિવિટી શરૂ થઈ જશે.

સુરતથી ચેન્નાઈની સફર 16 કલાકમાં પૂરી થશે
સુરતથી અત્યારે ચેન્નાઈ જવા માટે પારંપરિક રાષ્ટ્રીય રાજમાર્ગોની સફર ખૂબ જ કંટાળાજનક રહે છે. કારણ કે ભારે ટ્રાફિકના કારણે લગભગ 35 કલાક જેટલો સમય લાગે છે. પરંતુ સુરત અને ચેન્નાઈ વચ્ચે બની રહેલો એક્સપ્રેસવે હવે આ અંતરને સંપૂર્ણપણે ઘટાડી દેશે. આ હાઈવેથી આ સફર 16 કલાકમાં પૂરી કરી શકાશે. આ પ્રોજેક્ટ દેશની સૌથી મહત્વકાંક્ષી માર્ગ માળખાગત (ઈન્ફ્રાસ્ટ્રક્ચર) પરિયોજનાઓમાંથી એક છે, ખાસ વાત એ છે કે પહેલા આ હાઈવે 1271 કિલોમીટર પ્રસ્તાવિત હતો. પરંતુ તાજેતરમાં જ આ પ્રોજેક્ટમાં એક મોટો વહીવટી અને રૂટ સુધારો કરવામાં આવ્યો છે. જ્યાં સુરત-નાસિક ખંડને હટાવી દેવામાં આવ્યો છે. જેથી હવે તેને નાસિક-ચેન્નાઈ એક્સપ્રેસવેના નામથી ઓળખવામાં આવશે. તેનું અંતર 900 કિલોમીટર હશે. જોકે તેનું કનેક્શન સુરતથી ચેન્નાઈ વચ્ચે જ રહેશે.

6 લેન કોરિડોરથી જોડાશે આ મોટા શહેરો

• ગુજરાત: સુરત
• મહારાષ્ટ્ર: નાસિક, અહમદનગર, સોલાપુર, અક્કલકોટ
• કર્ણાટક: કલબુર્ગી, રાયચુર
• તેલંગાણા: ગઢવાલ
• આંધ્ર પ્રદેશ: કુર્નૂલ, કડપ્પા, તિરુપતિ
• તમિલનાડુ: ચેન્નાઈ

ગુજરાતથી તમિલનાડુની લાઈફલાઈન
ગુજરાતથી તમિલનાડુ વચ્ચે આ હાઈવે એક લાઈફલાઈનનું કામ કરશે. જેમાં માત્ર સમયની બચત જ નહીં થાય, પરંતુ પરિવહન પણ સરળ બની જશે. પર્યટન અને ધાર્મિક કેન્દ્રો વચ્ચે સીધી કનેક્ટિવિટી સ્થાપિત થશે. ખાસ વાત એ છે કે ગુજરાતના સુરતવાળા હિસ્સાને હટાવ્યા બાદ પણ આ મહારાષ્ટ્ર રોડ ડેવલપમેન્ટ કોર્પોરેશન (MSRDC) સમૃદ્ધિ મહામાર્ગના માધ્યમથી મુંબઈ-અમદાવાદ હાઈવેને કનેક્ટ કરી દેશે. જ્યારે દિલ્હી-મુંબઈ એક્સપ્રેસવેને પણ પરોક્ષ કનેક્ટિવિટી આપશે. એટલે કે ભારતની ચારે બાજુ આ હાઈવેની ઉપયોગિતા રહેશે. તેથી આ એક અત્યંત મહત્વનો પ્રોજેક્ટ માનવામાં આવી રહ્યો છે.

5 મોટા રાજ્યોમાં કનેક્ટિવિટી

• મહારાષ્ટ્ર
• કર્ણાટક
• તેલંગાણા
• આંધ્ર પ્રદેશ
• તમિલનાડુ

મહારાષ્ટ્રના હિસ્સાને કેબિનેટની મંજૂરી
આ પ્રોજેક્ટ પર અલગ-અલગ તબક્કામાં કામ કરવામાં આવી રહ્યું છે. મહારાષ્ટ્ર સરકારે તેના 374 કિલોમીટરના મહત્વના હિસ્સા નાસિક-સોલાપુર-અક્કલકોટ ગ્રીનફિલ્ડ ખંડને મંજૂરી આપી દીધી છે. 19 હજાર 142 કરોડ રૂપિયાના ખર્ચે આ હાઈવે તૈયાર થશે. જ્યારે કર્ણાટક અને આંધ્ર પ્રદેશ વચ્ચેના 177 કિલોમીટરના રૂટ પર પણ કામ શરૂ થઈ ચૂક્યું છે. અહીં જમીન સંપાદનની પ્રક્રિયામાં તેજી આવી છે. ભારતીય રાષ્ટ્રીય રાજમાર્ગ પ્રાધિકરણ (NHAI) એ તેને 2027 ના અંત સુધીમાં પૂરો કરવાનું લક્ષ્ય રાખ્યું છે. આ હાઈવે બન્યા બાદ રોડ કનેક્ટિવિટી ખૂબ જ મજબૂત બની જશે.