ગાંધીનગર મનપા ચૂંટણી પહેલાં રાજકારણ ગરમાયું: કોલવડામાં કોંગ્રેસના પોસ્ટરો ફાડી નાખવાના આક્ષેપથી હલચલ

હેતલ પારેખ, ગાંધીનગરઃ ગાંધીનગર મનપાની ચૂંટણી જેમ જેમ નજીક આવી રહી છે, તેમ રાજકીય ગરમાવો પણ વધી રહ્યો છે. વોર્ડ નંબર 7ના કોલવડામાં કોંગ્રેસના પ્રચાર પોસ્ટરો અને બોર્ડ ફાડવાના આક્ષેપથી હવે રાજકીય જંગ વધુ ઉગ્ર બન્યો છે. કોંગ્રેસે ભાજપ સામે આક્ષેપ કર્યો છે, જ્યારે ભાજપે સમગ્ર ઘટનાને પબ્લિસિટી સ્ટંટ ગણાવી છે. મામલો હવે રેન્જ આઈજી કચેરી સુધી પહોંચ્યો છે. જુઓ આ ખાસ અહેવાલ...

ગાંધીનગરના કોલવડામાં ચૂંટણી પ્રચારના પોસ્ટરો બન્યા રાજકીય રણક્ષેત્ર...કોંગ્રેસનો દાવો છે કે રાતોરાત તેના 35થી 40 જેટલા પ્રચાર બોર્ડ અને પોસ્ટરો ફાડી નાખવામાં આવ્યા. વોર્ડ-7માં આ ઘટનાને પગલે કોંગ્રેસના કાર્યકરોમાં રોષ જોવા મળ્યો છે.

કોંગ્રેસ ઉમેદવાર ફેનિલ પટેલે આક્ષેપ કર્યો કે ભાજપ ચૂંટણીમાં હારના ભયથી આ પ્રકારનું રાજકારણ કરી રહ્યું છે. સાથે જ કોંગ્રેસનો એવો પણ દાવો છે કે તેમની પ્રચાર ગાડીઓ નીકળે ત્યારે ડીજે બંધ કરાવવાનો પ્રયાસ થાય છે.

આ પણ વાંચોઃ રાધનપુર નગરપાલિકામાં ભાજપમાં  વિવાદ: ઉપપ્રમુખના ગંભીર આક્ષેપોથી રાજકારણ ગરમાયું

જોકે કોંગ્રેસના આક્ષેપોને ભાજપે ફગાવી દીધા છે. ભાજપ ધારાસભ્ય રીટાબેન પટેલે આ આરોપોને પાયાવિહોણા ગણાવ્યા છે. ભાજપનો દાવો છે કે કોંગ્રેસ પાસે ચૂંટણી મુદ્દા ન હોવાથી સહાનુભૂતિ મેળવવા માટે આ પ્રકારનો પબ્લિસિટી સ્ટંટ કરવામાં આવી રહ્યો છે.

વિવાદ અહીં અટક્યો નથી. પોસ્ટર ફાડવાના મામલે કોંગ્રેસનું પ્રતિનિધિમંડળ રેન્જ આઈજી કચેરી પહોંચ્યું અને સીસીટીવીના આધારે તપાસ કરી જવાબદારો સામે કાર્યવાહી કરવાની માંગ કરી. પોલીસ તરફથી યોગ્ય કાર્યવાહી કરવાની ખાતરી આપવામાં આવી હોવાનું કોંગ્રેસે જણાવ્યું છે.

એક તરફ પ્રચારનો જોર... બીજી તરફ પોસ્ટર વોર અને આક્ષેપ-પ્રતિઆક્ષેપ...ગાંધીનગર મનપાની ચૂંટણી પહેલાં વોર્ડ નંબર 7નું રાજકારણ ગરમાયું છે. હવે સવાલ એ છે કે આ પોસ્ટર વિવાદનો અંત તપાસથી આવશે કે ચૂંટણી સુધી રાજકીય આરોપોની ગુંજ યથાવત રહેશે?.