50 હજાર રૂપિયાના કમિશન માટે આખા દેશની સુરક્ષા દાવ પર, 48 કલાકમાં જ 5 કરોડના ટ્રાન્જેક્શન

Dubai Connection : ડિજિટલ ઈન્ડિયાના આ યુગમાં સાયબર ઠગો દેશભરમાં હાહાકાર મચાવી રહ્યા છે, ત્યારે સુરત સાયબર ક્રાઈમ સેલે આંતરરાષ્ટ્રીય સાયબર ફ્રોડ ગેંગના એક મોટા સાગરીતને દબોચી લીધો છે. પોલીસના સકંજામાં આવેલો આ શખ્સ કોઈ સામાન્ય ગુનેગાર નથી, પણ સાયબર માફિયાઓ માટે રસ્તો સાફ કરી આપનારો મુખ્ય કમિશન એજન્ટ છે.

છેલ્લા ત્રણ વર્ષથી પોલીસની આંખમાં ધૂળ નાખીને નાસતા ફરતા મોહમદ સાઠીબ મોહમદ સાદીક તંબુવાલાને આખરે પોલીસે લોકઅપની હવા ખાતો કરી દીધો છે. આરોપી મોહમદ સાઠીબ સુરત અને દેશની એજન્સીઓ માટે માથાનો દુખાવો બન્યો હતો, જેની પાછળ પોલીસ લાંબા સમયથી વોચ ગોઠવીને બેઠી હતી.

• 5.17 કરોડનો સાયબર ખેલ
• 3 વર્ષથી ફરાર આરોપી ઝડપાયો
• 49 ફરિયાદો, એક જ એકાઉન્ટ
• 50 હજારમાં કરોડોનો ખેલ
• ફેક કંપનીથી સાયબર ફ્રોડનો પર્દાફાશ

પકડાયેલા આરોપીની મોડસ ઓપરેન્ડી સાંભળીને પોલીસ પણ ચોંકી ઉઠી છે. આ આરોપી માત્ર 50 હજાર રૂપિયાના નજીવા કમિશન માટે દેશની સુરક્ષા અને લોકોની મહેનતની કમાણી દાવ પર લગાવતો હતો. આરોપીએ બનાવટી કંપનીના નામે ડિજિટલ સિગ્નેચર ઊભી કરી અને ઈમ્પોર્ટ-એક્સપોર્ટનો IEC કોડ મેળવ્યો હતો. આ કોડ અને તેના આઈડી-પાસવર્ડ તે દુબઈ બેઠેલા મુખ્ય સાયબર માફિયાઓને બારોબાર વેચી દેતો હતો.

• 3 વર્ષથી પોલીસને ચકમો...
• આખરે સકંજામાં!
• બેંક એકાઉન્ટમાં કરોડોના ટ્રાન્ઝેકશન
• સાયબર ફ્રોડ ગેંગનો કમિશન એજન્ટ જેલમાં

આ નેટવર્ક કેટલું મોટું છે તેનો અંદાજ એ વાત પરથી લગાવી શકાય કે, આરોપીએ આપેલા એક જ બેંક એકાઉન્ટમાં માત્ર 48 કલાકની અંદર 5 કરોડ 17 લાખ રૂપિયાથી વધુના શંકાસ્પદ ટ્રાન્ઝેક્શન થયા હતા. જ્યારે પોલીસે NCCRP પર તપાસ કરી, ત્યારે આ એક જ એકાઉન્ટ સામે દેશના અલગ-અલગ રાજ્યોમાં 49 જેટલી ફરિયાદો નોંધાયેલી મળી આવી હતી. એટલું જ નહીં, આ ખાતામાં સીધેસીધા 86.34 લાખ રૂપિયા સાયબર ફ્રોડના જમા થયા હતા. આ ગેંગે એક ફરિયાદીની 25 લાખથી વધુની કિંમતની ઈ-સ્ક્રિપ્સ પણ બારોબાર ટ્રાન્સફર કરી લીધી હતી.

ત્રીજી મોટી ધરપકડ બાદ આ મની ટ્રેલ ક્યાં પહોંચશે?

આ કેસમાં સુરત પોલીસ અગાઉ કૃણાલ સેંધાણે અને તક્ષલ લુંગીવાલા નામના બે આરોપીઓની ધરપકડ કરી ચૂકી છે. હવે આ ત્રીજી મોટી ધરપકડ બાદ પોલીસ આ મની ટ્રેલ ક્યાં સુધી જાય છે તેની ઊંડી તપાસ કરી રહી છે. પોલીસનો અસલી ટાર્ગેટ હવે દુબઈમાં બેસીને દોરી સંચાર કરતા મુખ્ય સૂત્રધારો છે.

સુરત સાયબર ક્રાઈમની આ કાર્યવાહીથી સ્પષ્ટ થાય છે કે સાયબર ગુનેગારો ભલે ગમે તેટલા સ્માર્ટ હોય અને વિદેશમાં બેઠા હોય, પણ કાયદાના હાથ લાંબા છે. હવે જોવાનું એ રહેશે કે પોલીસ આ દુબઈ કનેક્શનના મૂળ સુધી ક્યારે પહોંચે છે.