રીલ ક્વીન બાદ હવે ખાખી ખંડણીખોર સકંજામાં: કીર્તિ પટેલની ખાસ સાથીદાર નયના બારૈયા સાસણગીરના રિસોર્ટમાંથી દબોચાઈ

પ્રશાંત ઢીવરે, સુરત : સોશિયલ મીડિયા પર રીલ્સ બનાવીને અને નકલી વીડિયો વાયરલ કરવાની ધમકી આપીને કરોડો રૂપિયા ખંખેરતી ગેંગની મુખ્ય સૂત્રધાર આખરે લોકઅપના સળિયા પાછળ પહોંચી ગઈ છે. સુરતની પુણા પોલીસે કીર્તિ પટેલની ખાસ સાથીદાર અને સસ્પેન્ડેડ મહિલા કોન્સ્ટેબલ નયના બારૈયાની ધરપકડ કરી લીધી છે. નયના સામે તેના જ લિવ-ઈન પાર્ટનર રાજુ ભમ્મરે જુલાઈ મહિનામાં 3.12 કરોડ રૂપિયા પડાવી લેવાની અને બ્લેકમેલ કરવાની ગંભીર ફરિયાદ નોંધાવી હતી.

• ખંડણી કેસમાં નયના આખરે ઝડપાઈ
• ઉદયપુરથી ગીર સુધી...
• પોલીસને આપતી રહી ચકમો
• કીર્તિ બાદ નયના પણ પોલીસના સકંજામાં
• 3.12 કરોડના કેસમાં નયનાની ધરપકડ

આ હાઈપ્રોફાઈલ કેસમાં કીર્તિ પટેલ તો અગાઉથી જ જેલના હવાલે છે, પણ નયના બારૈયા પોતાનો મોબાઈલ સ્વિચ ઓફ કરીને સતત પોલીસને ચકમો આપી રહી હતી.તે ધરપકડથી બચવા માટે ઉદયપુર, ચિત્તોડગઢ અને ખાટુશ્યામ જેવા ધાર્મિક અને પર્યટન સ્થળોએ વેશ પલટો કરીને છુપાતી ફરતી હતી પરંતુ ટેકનિકલ સર્વેલન્સ અને બાતમીદારોની મદદથી પુણા પોલીસને પાક્કી બાતમી મળી કે નયના ગુજરાતમાં ઘૂસી ચૂકી છે અને સાસણગીરના એક રિસોર્ટમાં મોજ કરી રહી છે.

રિસોર્ટમાં દરોડો પાડીને નયના બારૈયાને દબોચી લીધી

લોકેશન કન્ફર્મ થતાં જ સુરત પોલીસે રાતોરાત પોતાની સ્પેશિયલ ટીમ ગીર રવાના કરી અને રિસોર્ટમાં દરોડો પાડીને નયના બારૈયાને દબોચી લીધી. સુરત સેશન્સ કોર્ટે તેની આગોતરા જામીન અરજી ફગાવી દીધા બાદ પોલીસ તેની પાછળ હાથ ધોઈને પડી હતી. આખરે નયનાની ધરપકડ કરીને પોલીસે જેલના સળિયા પાછળ ધકેલી દીધી છે.

• ખંડણીખોર નયના આખરે ઝડપાઈ!
• ઉદયપુરથી ગીર સુધી પોલીસને ચકમો
• ત્રણ મહિનાની ભાગદોડનો અંત
• કીર્તિ બાદ હવે નયનાનો વારો...

તમને જણાવી દઈએ કે, આ સમગ્ર વિવાદની શરૂઆત ફેબ્રુઆરી 2026માં થઈ હતી, જ્યારે ભાવનગરના દાઠા પોલીસ સ્ટેશનમાં નયના સામે પ્રેમ પ્રકરણ બાબતે ધમકી આપવાની ફરિયાદ થઈ હતી ત્યારબાદ જૂન મહિનામાં વિવાદોની ક્વીન કીર્તિ પટેલે આ કેસમાં એન્ટ્રી મારી હતી. કીર્તિએ પોતાના ઇન્સ્ટાગ્રામ આઈડી પરથી ફરિયાદી રાજુ ભમ્મર અને તેની પત્ની વિરુદ્ધ બદનક્ષીકારક વીડિયો અને અશ્લીલ રીલ્સ બનાવી હતી. નયના બારૈયાએ પણ પોતાના આઈડી પર આ બદનક્ષીકારક વીડિયો શેર કરીને આ ગુનાહિત કાવતરામાં પૂરો સાથ આપ્યો હતો...

રાજુ ભમ્મર અને નયના 21 મહિના સુધી લિવ-ઈન રિલેશનશિપમાં

પોલીસના જણાવ્યા અનુસાર, રાજુ ભમ્મર અને નયના 21 મહિના સુધી લિવ-ઈન રિલેશનશિપમાં રહ્યા હતા. સંબંધો બગડ્યા બાદ નયનાએ કીર્તિ પટેલ સાથે મળીને ખંડણી વસૂલવાનું મોટું નેટવર્ક શરૂ કર્યું. રાજુની પત્નીના નકલી વીડિયો વાયરલ કરવાની અને રેપ કેસમાં ફસાવી દેવાની ધમકી આપીને કરોડો રૂપિયા પડાવી લીધા હતા.

હાલ તો કીર્તિ પટેલ જેલમાં છે અને તેનું ઈન્સ્ટાગ્રામ એકાઉન્ટ પણ ડીએક્ટિવેટ કરી દેવાયું છે ત્યારે હવે નયના બારૈયાની લઈને આ કેસમાં ચોંકાવનારા ખુલાસા થઈ શકે છે.

નયના અને કીર્તિની ધરપકડ એક જડબાતોડ બોધપાઠ 

સોશિયલ મીડિયા પર સસ્તા ફેમ અને રીલ્સના જોરે કાયદાને ખિસ્સામાં લઈને ફરતી આવી સ્વયંભૂ 'વિવાદિત ક્વીન્સ' માટે નયના અને કીર્તિની ધરપકડ એક જડબાતોડ બોધપાઠ છે. ખાખીની આડમાં બ્લેકમેલિંગનું નેટવર્ક ચલાવતી નયના બારૈયા હોય કે ઈન્સ્ટાગ્રામ પર કાયદાના લીરેલીરા ઉડાવતી કીર્તિ પટેલ. જ્યારે કાયદાનો સકંજો કસાય છે ત્યારે ગમે તેવા માતેલા સાંઢ પણ જેલના સળિયા પાછળ આવી જ જાય છે ત્યારે જોવાનું એ રહેશે કે આ 'રીલ લાઈફ'ની કિંગ કીર્તિ અને નયના 'રિયલ લાઈફ'ના જેલવાસમાંથી ક્યારે બહાર આવી શકે છે...