પ્રસિદ્ધ યાત્રાધામ બહુચરાજી મંદિરમાં મોટો ખેલ: કરોડોના ખર્ચે બની રહેલા નવા મંદિરમાં ગેરરીતિ સામે આવી, સ્તંભો અને પથ્થરો પણ ખંડિત!
Mehsana Bahucharaji Temple: ગુજરાતના પ્રસિદ્ધ યાત્રાધામ અને લાખો ભક્તોના આસ્થાના કેન્દ્ર સમાન બહુચરાજી મંદિરમાં ફરી એકવાર ભ્રષ્ટાચાર અને લાલિયાવાડી સામે આવી છે. તમને યાદ હશે કે અગાઉ બનાવેલું મંદિર પણ ભ્રષ્ટાચારનો ભોગ બન્યું હતું અને માત્ર 15 જ વર્ષમાં તેને તોડી પાડવાનો વારો આવ્યો હતો. ત્યારે હવે 74 કરોડ રૂપિયા ઉપરની માતબર ખર્ચે બની રહેલા નવા મંદિરમાં પણ તૂટેલા અને ખંડિત પથ્થરોનો ઉપયોગ કરવામાં આવી રહ્યો હોવાના દ્રશ્યો સામે આવ્યા છે. આ મામલે દેખરેખ રાખનાર એજન્સીનો બચાવ પણ એટલો જ હાસ્યાસ્પદ છે.
તેજસ દવે/મહેસાણા: યાત્રાધામ બહુચરાજીમાં ફરી એકવાર આસ્થા સાથે ચેડાં થઈ રહ્યા હોવાની તસવીરો સામે આવી છે. 74 કરોડના જંગી ખર્ચે બંસી પહાડના લાલ પથ્થરમાંથી બહુચરાજી માતાના નવા મંદિરનું નિર્માણ કાર્ય પૂરજોશમાં ચાલી રહ્યું છે. પરંતુ આ ભવ્યતાની આડમાં ભ્રષ્ટાચારની ઈમારત ચણાઈ રહી હોય તેવા દ્રશ્યો સામે આવતા ભક્તોમાં ભારે રોષ જોવા મળી રહ્યો છે.આ નિર્માણ કાર્યમાં મોટી બેદરકારી સામે આવી છે. નવા મંદિરમાં ઉભા કરવામાં આવેલા સ્તંભોમાં તૂટેલા પથ્થરોનો છડેચોક ઉપયોગ થયો હોવાનું સ્પષ્ટપણે જોવા મળી રહ્યું છે. માત્ર સ્તંભ જ નહીં, પરંતુ કેટલીક ઝીણવટભરી કોતરણીઓ પણ તૂટેલી અને ખંડિત હાલતમાં લગાવી દેવામાં આવી છે.
આ એ જ બહુચરાજી છે જ્યાં અગાઉ બનેલું મંદિર પણ ભ્રષ્ટાચારનો ભોગ બન્યું હતું. હલકી કક્ષાના કામને કારણે માત્ર 15 જ વર્ષમાં તે નવું બનાવેલું મંદિર તોડી પાડવાની નોબત આવી હતી. ત્યારે હવે ફરી એકવાર આસ્થાના આ મહાન કેન્દ્રમાં નવા મંદિરના નામે જૂનો જ ભ્રષ્ટાચાર દોહરાવાઈ રહ્યો છે.આ સમગ્ર મામલે જ્યારે નવીન મંદિરની દેખરેખ માટે રખાયેલ PMC (પ્રોજેક્ટ મેનેજમેન્ટ કન્સલ્ટન્ટ) ના કર્મચારીને સવાલ કરવામાં આવ્યો, ત્યારે તેમણે અત્યંત લુલો બચાવ કર્યો હતો. કર્મચારીએ બેશરમીથી કહ્યું કે, "હાલ જે તૂટેલા પથ્થર દેખાય છે. તેને રિપેર કરી દેવાશે એટલે તે નહીં દેખાય
મહેસાણા જિલ્લાના શક્તિપીઠ બહુચરાજીમાં હાલમાં ભવ્ય અને નવીન મંદિરનું નિર્માણ કાર્ય ચાલી રહ્યું છે. પરંતુ આ આસ્થાના કેન્દ્ર સમાન મંદિરના બાંધકામમાં બેદરકારી દાખવવામાં આવી રહી હોવાની સ્થાનિકોને આશંકા હતી. સ્થાનિક લેવલે મળેલી રજૂઆતો અને ફરિયાદોને પગલે બહુચરાજીના ધારાસભ્ય સુખાજી ઠાકોરે તાત્કાલિક નિર્માણ સ્થળની મુલાકાત લીધી હતી. મુલાકાત દરમિયાન સામે આવ્યું કે, નવા મંદિરમાં ઊભા કરવામાં આવી રહેલા પથ્થરના સ્તંભોમાં કોતરણીઓ ખંડિત થયેલી છે અને તેમાં નુકસાન જોવા મળ્યું છે.આ સ્થિતિ જોઈને ધારાસભ્ય સુખાજી ઠાકોરે અત્યંત કડક વલણ અપનાવ્યું હતું.
તેમણે સ્થળ પર હાજર મંદિરના કર્મચારીઓ અને કોન્ટ્રાક્ટરને કડક શબ્દોમાં ચેતવણી આપતા જણાવ્યું હતું કે, આસ્થાના સ્થાન એવા આ મંદિરમાં ગેરરીતિ કે નબળી કામગીરી સહેજ પણ ચલાવી લેવાશે નહીં. તેમણે સ્પષ્ટ આદેશ આપ્યો છે કે, હેવી પથ્થર લગાવતી વખતે જો તે તૂટી જાય કે ખંડિત થાય, તો તેને રીપેર કરવાને બદલે ત્યાં સંપૂર્ણપણે નવો પથ્થર જ લગાવવો જોઈએ. આ ઉપરાંત, ધારાસભ્યએ મંદિર વહીવટી તંત્રને પણ નિર્માણ કાર્ય પર સતત અને ચાંપતી દેખરેખ રાખવા માટે કડક સૂચના આપી છે.
