ગાંધીનગર મનપા ચૂંટણીમાં ગરમાવો! ગુજરાત કોંગ્રેસનો વોર્ડ નં-6માં GEN-Z દાવ, માત્ર 21 વર્ષની મેઘનાને ચૂંટણી મેદાનમાં ઉતારી

Gandhinagar Election in Gen Z Candidate Meghna Rabari, દુર્ગેશ મહેતા/ગાંધીનગર: ગાંધીનગર મહાનગરપાલિકાની આગામી ચૂંટણીમાં રાજકીય ગરમાવો તેજ બન્યો છે. મનપાના તમામ 11 વોર્ડમાં ભાજપ અને કોંગ્રેસે 44-44 ઉમેદવારો મેદાનમાં ઉતાર્યા છે, જ્યારે આમ આદમી પાર્ટીના 32 ઉમેદવારો સહિત કુલ 130 ઉમેદવારો ચૂંટણી જંગમાં છે. આ ચૂંટણીમાં વોર્ડ નંબર-6 ખાસ ચર્ચામાં આવ્યો છે. કોંગ્રેસે અહીં એક તરફ માત્ર 21 વર્ષની મેઘના રાજુભાઈ રબારીને ઉમેદવાર બનાવ્યાં છે, તો બીજી તરફ કર્મજીતસિંહ વાઘેલા પણ કોંગ્રેસ તરફથી ચૂંટણી લડી રહ્યા છે. એક ઉમેદવાર યુવા પેઢીના પ્રશ્નો અને Gen-Zના અવાજ સાથે મેદાનમાં છે, જ્યારે બીજા ઉમેદવાર પાણી અને રોડ-રસ્તા જેવી પાયાની સુવિધાઓના મુદ્દે શાસક પક્ષને સવાલ કરી રહ્યા છે.

21 વર્ષની મેઘના રબારીની રાજકારણમાં એન્ટ્રી
વોર્ડ નંબર-6માં કોંગ્રેસની ઉમેદવાર મેઘના રાજુભાઈ રબારી પોતાની ઉંમર અને યુવા અભિગમને કારણે ચર્ચામાં છે. માત્ર 21 વર્ષની મેઘના કોંગ્રેસ અને ભાજપના કુલ 88 ઉમેદવારોમાં સૌથી નાની વયનાં ઉમેદવાર હોવાનું જણાવાયું છે. પાટણનાં મૂળ વતની મેઘના હાલ ગાંધીનગરના ગોકુળપુરા વિસ્તારમાં રહે છે અને ઓબીસી મહિલા બેઠક પરથી ચૂંટણી લડી રહ્યાં છે.

મેઘનાની ઉમેદવારીની સૌથી રસપ્રદ બાબત એ છે કે તેમણે આ ચૂંટણી પહેલાં ક્યારેય મતદાન કર્યું નથી. મતદાનનો પ્રથમ અનુભવ મેળવતાં પહેલાં જ તેઓ સીધાં ચૂંટણીના મેદાનમાં ઊતર્યાં છે. તેમના પિતા રાજુભાઈ રબારી શહેર કોંગ્રેસના માલધારી સેલના પ્રમુખ છે અને પરિવાર લાંબા સમયથી કોંગ્રેસની વિચારધારા સાથે જોડાયેલો હોવાનું જણાવાયું છે. મેઘના યુવા પેઢીના પ્રશ્નોને ચૂંટણીમાં મહત્ત્વ આપવા માગે છે. તેમણે ભાજપના શાસનમાં ભ્રષ્ટાચાર હોવાનો આક્ષેપ કરતાં જણાવ્યું હતું કે તેના કારણે યુવાનોને યોગ્ય રોજગારી મેળવવામાં મુશ્કેલીઓ પડે છે. યુવા ઉમેદવારો અને કાર્યકર્તાઓ સાથે મળીને લોકોની સમસ્યાઓ સામે અવાજ ઉઠાવવાની અને મહેનત કરતા નાગરિકોને આગળ વધવાની તક મળે તે માટે પ્રયત્ન કરવાની પણ તેમણે વાત કરી છે.

મેઘના રબારી જે ગોકુળપુરા વિસ્તારમાં રહે છે, ત્યાં જમીનની સનદ એટલે કે માલિકી હકના દસ્તાવેજોનો પ્રશ્ન લાંબા સમયથી ચર્ચામાં છે. સ્થાનિક વિગતો મુજબ, દાયકાઓ પહેલાં અહીં આશરે રૂ. 750માં પ્લોટ ફાળવવામાં આવ્યા હતા. કુલ 120 પ્લોટ માટે નાણાં ભર્યાની પાવતીઓ આપવામાં આવી હતી, જેના આધારે લોકો અહીં વસવાટ કરવા લાગ્યા હતા.જોકે, વર્ષો વીતી જવા છતાં જમીનની સનદ ન મળી હોવાની રહીશોની ફરિયાદ છે. મનપાના કર નિયમિત ભરતા હોવા છતાં માલિકી હકનો પ્રશ્ન ઉકેલાયો ન હોવાનો તેમનો દાવો છે. આ મુદ્દે અગાઉ પણ સરકાર સમક્ષ રજૂઆત કરવામાં આવી હોવાનું જણાવાયું છે. ચૂંટણી દરમિયાન ગોકુળપુરાના રહીશોની આ સમસ્યા ફરી ચર્ચામાં આવે તેવી શક્યતા છે.

કર્મજીતસિંહ વાઘેલાએ પાણી અને રસ્તાના મુદ્દે ઉઠાવ્યા સવાલ
વોર્ડ નંબર-6માં કોંગ્રેસના બીજા ઉમેદવાર કર્મજીતસિંહ વાઘેલા પ્રાથમિક પ્રશ્નોને લઈને ચૂંટણી મેદાનમાં છે. તેમના પરિવારની પણ રાજકીય પૃષ્ઠભૂમિ છે. તેમના પિતા અજીતસિંહ વાસણ તરીકે ઓળખાતા વિરેન્દ્રસિંહ મફાજી વાઘેલા કોંગ્રેસ સાથે સંકળાયેલા છે અને ગુજરાત પ્રદેશ કોંગ્રેસ સમિતિમાં મહામંત્રી તરીકે કાર્યરત હોવાનો ઉલ્લેખ કરવામાં આવ્યો છે. તેમણે 2022ની ગુજરાત વિધાનસભાની ચૂંટણીમાં ગાંધીનગર ઉત્તર બેઠક પરથી કોંગ્રેસના ઉમેદવાર તરીકે ચૂંટણી લડી હતી.

કર્મજીતસિંહ વાઘેલાએ વોર્ડની સોસાયટીઓમાં પાણીની સમસ્યા અને રોડ-રસ્તા જેવા પાયાના પ્રશ્નોને લઈને ભાજપના શાસન સામે સવાલો ઉઠાવ્યા છે. તેમના જણાવ્યા અનુસાર, સ્ટેન્ડિંગ કમિટીના ચેરમેન હોવા છતાં સોસાયટીઓમાં પાણી અને રસ્તા જેવા પ્રશ્નો યથાવત્ છે. તેમણે એવો પણ દાવો કર્યો છે કે લોકો ભાજપના શાસનથી કંટાળી ચૂક્યા છે.આ આક્ષેપો કર્મજીતસિંહ વાઘેલાના રાજકીય નિવેદન છે. સ્થાનિક સમસ્યાઓની વ્યાપકતા અને રહીશોના અભિપ્રાય અંગે સ્વતંત્ર ચકાસણી જરૂરી છે.

યુવા પેઢીથી લઈને પાયાની સુવિધાઓ સુધીના મુદ્દા
વોર્ડ નંબર-6માં એક તરફ મેઘના રબારી યુવાનોની રોજગારી, ભ્રષ્ટાચારના આક્ષેપો અને Gen-Zના પ્રતિનિધિત્વની વાત કરી રહ્યાં છે, તો બીજી તરફ કર્મજીતસિંહ વાઘેલા પાણી અને રોડ-રસ્તા જેવા મુદ્દાઓને આગળ ધરી રહ્યા છે. ગોકુળપુરામાં જમીનની સનદનો પ્રશ્ન પણ સ્થાનિક સ્તરે મહત્ત્વ ધરાવે છે.

આમ, વોર્ડ નંબર-6માં ચૂંટણીની ચર્ચા માત્ર પક્ષીય રાજકારણ પૂરતી મર્યાદિત નથી. યુવાનોનું ભવિષ્ય, નાગરિક સુવિધાઓ અને વર્ષોથી ઉકેલની રાહ જોતા સ્થાનિક પ્રશ્નો પણ ચૂંટણીના કેન્દ્રમાં આવી શકે છે. હવે મતદારો આ મુદ્દાઓને કેટલી પ્રાથમિકતા આપે છે અને ઉમેદવારોની રજૂઆતોને કેવો પ્રતિસાદ મળે છે, તે જોવાનું રહેશે.