ફેસબુક પર ફ્રેન્ડ રિક્વેસ્ટ પડી શકે છે ભારે: અમદાવાદમાં વૃદ્ધને હનીટ્રેપમાં ફસાવી પડાવ્યા 24 લાખ રૂપિયા

ઉદય રંજન, અમદાવાદઃ પહેલા સોશિયલ મીડિયા પર અજાણ્યા આઈડીથી ફ્રેન્ડ રિક્વેસ્ટ, પછી મીઠી-મીઠી વાતોથી પ્રેમનું નાટક, અને અંતે હનીટ્રેપની એવી ઘાતક જાળ...જેમાં ફસાયા બાદ શિકારે પોલીસના ડરથી લાખો રૂપિયા ગુમાવવાનો વારો આવે છે! અમદાવાદમાંથી આવો જ એક ચોંકાવનારો કિસ્સો સામે આવ્યો છે, જ્યાં એક વૃદ્ધને આરોપીઓએ લપેટામાં લીધા અને પડાવ્યા લાખો રૂપિયા...કોણ છે આરોપી અને કેવી રીતે આ ગેંગનો પોલીસે અંત આણ્યો.

24 લાખ પડાવ્યા...વધુ 7 લાખની માંગ!
સોશિયલ મીડિયા પર અજાણ્યા વ્યક્તિ સાથે સંપર્ક કરતા પહેલા સાવધાન રહેજો...કારણ કે એક ભૂલ તમને હનીટ્રેપથી બ્લેકમેઈલિંગ અને લાખોની ખંડણી સુધી પહોંચાડી શકે છે...અમદાવાદના આનંદનગર પોલીસ સ્ટેશન વિસ્તારમાં હનીટ્રેપ અને બ્લેકમેઈલિંગનો ચોંકાવનારો કિસ્સો સામે આવ્યો છે. ફેસબુક મારફતે વૃદ્ધનો સંપર્ક કરી આરોપીઓએ તેમને હનીટ્રેપમાં ફસાવ્યા હતા.

શાતિર આરોપીઓએ પહેલાં મીઠી-મીઠી વાતો કરીને વૃદ્ધને પોતાની જાળમાં લીધા...ખેલ અહીં જ ન અટક્યો...ત્યારબાદ આરોપીઓએ પોલીસ તરીકે ઓળખ આપી વૃદ્ધ અને તેમના દીકરાને ખોટા કેસમાં ફસાવી દેવાની ધમકી આપી હતી...કાયદા અને જેલના આ ડરનો ફાયદો ઉઠાવીને તબક્કાવાર કુલ 24 લાખ રૂપિયા પડાવી લેવામાં આવ્યા હતા.

આ પણ વાંચોઃ નવરાત્રિ ટાણે ખેલૈયાઓ સાવધાન! અસુરક્ષિત ટેટૂ તમને જિંદગીભરનું આપી શકે છે દુ:ખ!

હનીટ્રેપનો શિકાર બનેલા વૃદ્ધ પાસે 24 લાખ રૂપિયા પડાવ્યા બાદ પણ બ્લેકમેઈલર્સની ભૂખ સંતોષાઈ નહોતી...આરોપીઓએ વધુ સાત લાખ રૂપિયાની માંગણી કરી, જે આધારે વૃદ્ધને આરોપીઓ પર શંકા ગઈ હતી...આથી વૃદ્ધે આનંદનગર પોલીસનો સંપર્ક કરતા તેઓ હનીટ્રેપનો શિકાર થયા હોવાનું સત્તાવાર જાણવા મળ્યું હતું...આ મામલે આનંદનગર પોલીસ સ્ટેશનમાં ફરિયાદ નોંધાયા બાદ આરોપીઓની શોધખોળ શરૂ કરાઈ હતી.

આ દરમિયાન ઝોન-7 એલસીબીની ટીમને બાતમી મળી હતી કે એક આરોપી એસ.જી હાઇવે પરથી પસાર થઈ રહ્યો છે...આ બાતમીના આધારે LCB સ્ક્વોડે આરોપી અલ્પેશ સોલંકીની ધરપકડ કરી છે અને તેની પાસેથી એક લાખની રોકડ કબજે લીધી છે.

પોલીસની પ્રાથમિક પૂછપરછમાં સામે આવ્યું છે કે આ કેસમાં હજુ પણ વધુ બે આરોપીઓ ફરાર છે, જેમને પકડવા ચક્રો ગતિમાન કરાયા છે...હની ટ્રેપમાં પડાવેલા રૂપિયા કોણે કોણે કેવી રીતે વહેંચ્યા છે, આ સાથે જ આરોપીઓએ અત્યાર સુધી કેટલા લોકોને આ રીતે હની ટ્રેપનો શિકાર બનાવ્યા છે તે દિશામાં વધુ તપાસ માટે આરોપીના રિમાન્ડ મેળવવાની તજવીજ હાથ ધરાઇ છે...