અમદાવાદમાં વધુ એક બ્રિજના પ્લાનિંગમાં AMCનું ભોપાળું! મકરબા જેવી સ્થિતિ સર્જાવાની ભીતિ

દર્શલ રાવલ, અમદાવાદ : અમદાવાદમાં બ્રિજના નિર્માણ અને તેના આયોજનને લઈને ફરી એકવાર સવાલો ઊભા થયા છે. શહેરના પશ્ચિમ વિસ્તારમાં થલતેજમાં બની રહેલા હેબતપુર રેલવે ઓવરબ્રિજમાં પણ મકરબા બ્રિજ જેવી સ્થિતિ સર્જાવાની ભીતિ વ્યક્ત કરવામાં આવી રહી છે. બ્રિજનું નિર્માણ પૂર્ણ થયા બાદ બંને છેડે મુખ્ય રસ્તા અને સર્કલ આવતા ટ્રાફિકની અવરજવર દરમિયાન અકસ્માતનું જોખમ ઊભું થઈ શકે છે. આ સમસ્યાના ઉકેલ માટે તંત્રએ કેપ્સ્યુલ ટર્નનો વિકલ્પ અપનાવવો પડે તેવી સ્થિતિ ઊભી થઈ છે.

Tinder પર યુવતી સાથે મિત્રતા પડી ભારે! અમદાવાદના વેપારીને લગાવ્યો લાખોનો ચૂનો

વિરમગામ બ્રોડગેજ રેલવે લાઇન પર આવેલા 11 નંબરના ક્રોસિંગ પાસે આ બ્રિજ બની રહ્યો છે. અંદાજે 75 કરોડ રૂપિયાના ખર્ચે 700 મીટર લાંબો અને 17 મીટર પહોળો બ્રિજ તૈયાર થઈ રહ્યો છે. છેલ્લા બે વર્ષથી વધુ સમયથી બ્રિજનું કામ ચાલી રહ્યું છે, પરંતુ ધીમી ગતિને કારણે સ્થાનિક લોકો હાલાકીનો સામનો કરી રહ્યા છે.

હાલમાં બ્રિજનું અંદાજે 70 ટકા જેટલું કામ પૂર્ણ થયું છે. રેલવે લાઇન ઉપરનો ભાગ બાકી છે, જ્યારે બંને તરફના સ્ટ્રક્ચર તૈયાર થઈ ચૂક્યા છે. આ બ્રિજ તૈયાર થતાં થલતેજ, હેબતપુર, સાયન્સ સિટી સહિત આસપાસના વિસ્તારોના લોકોને ટ્રાફિકની સમસ્યામાંથી રાહત મળવાની આશા છે.

બ્રિજની ડિઝાઇન અને આયોજન સામે ઊભા થયા સવાલો

જોકે, બ્રિજના નિર્માણ સાથે જ તેની ડિઝાઇન અને આયોજન સામે સવાલો ઊભા થયા છે. થલતેજ તરફ બ્રિજ નીચે ઉતરતાં ગુલમહોર ચાર રસ્તા આવે છે, જ્યારે હેબતપુર તરફ મુખ્ય આડો રોડ આવેલો છે. બંને તરફ મુખ્ય રસ્તા હોવાથી બ્રિજ પરથી ઉતરતા વાહનો અને અન્ય રસ્તા પરથી આવતા વાહનો વચ્ચે અકસ્માતની શક્યતા વ્યક્ત કરવામાં આવી રહી છે.

ખાસ કરીને થલતેજ તરફ બાગબાન અને ઝાયડસ રોડ પાસે ટ્રાફિક વ્યવસ્થાને લઈને કેપ્સ્યુલ ટર્નની જરૂર પડી શકે છે. એટલે કે રેલવે ક્રોસિંગ મુક્ત કરવાના હેતુથી બની રહેલા બ્રિજમાં જ ટ્રાફિકની સમસ્યા ઊભી થાય તેવી સ્થિતિ છે. ડિઝાઇનમાં રહેલી સંભવિત મુશ્કેલી દૂર કરવા તંત્રએ કેપ્સ્યુલ ટર્નનો વિકલ્પ અપનાવવો પડે તેવી ચર્ચા છે.

બ્રિજના ધીમા કામ સામે સ્થાનિકોમાં નારાજગી

સ્થાનિક લોકોએ બ્રિજના ધીમા કામ સામે નારાજગી વ્યક્ત કરવાની સાથે તંત્રના આયોજન સામે પણ સવાલો ઉઠાવ્યા છે. મકરબા બ્રિજ જેવી સ્થિતિ હેબતપુરમાં પણ ન સર્જાય તે અંગે ચિંતા વ્યક્ત કરી છે. સ્થાનિકોના આક્ષેપ છે કે યોગ્ય આયોજનના અભાવે બ્રિજ બન્યા બાદ પણ લોકોને ટ્રાફિક અને અકસ્માતના જોખમનો સામનો કરવો પડી શકે છે.

હવે સવાલ એ છે કે કરોડોના ખર્ચે બની રહેલો આ બ્રિજ ખરેખર લોકોને સુવિધા આપશે કે પછી અણઘડ આયોજનને કારણે નવી ટ્રાફિક સમસ્યાનું કારણ બનશે?