અમદાવાદમાં ઠગાઈનો અનોખો કિસ્સો, ચિલ્લરના નામે ગઠિયાએ વેપારીઓને લગાવ્યો લાખોનો ચૂનો

ઉદય રંજન, અમદાવાદ : અમદાવાદમાં ઠગાઈનો એક અનોખો કિસ્સો સામે આવ્યો છે. ચિલ્લરની જરૂરિયાત ધરાવતા વેપારીઓને વિશ્વાસમાં લઈને આરોપી રોકડ મેળવી લેતો હતો. પૈસા મળ્યા બાદ ચિલ્લર આપ્યા વિના જ ફરાર થઈ જતો. રામોલ પોલીસે આ ભેજાબાજને ઝડપી પાડ્યો છે. પોલીસ તપાસમાં આરોપીએ સાતથી વધુ વેપારીઓને શિકાર બનાવ્યા હોવાનું સામે આવ્યું છે. ત્યારે કોણ છે આ આરોપી અને કઈ રીતે વેપારીઓને પોતાનો શિકાર બનાવતો હતો, તેના વિશે આ લેખમાં જાણીશું.

છેતરપિંડીની અનોખી મોડસ ઓપરેન્ડી

અમદાવાદના પૂર્વ વિસ્તારમાંથી ચિલ્લર આપવાના બહાને છેતરપિંડી કરતો આરોપી ઝડપાયો છે. રામોલ પોલીસે 33 વર્ષીય વાલા ઉર્ફે વિરાજ રબારીની ધરપકડ કરી છે. આરોપી હોટેલ, રેસ્ટોરન્ટ અને ખાણીપીણીની દુકાનોને ટાર્ગેટ કરતો હતો. વેપારીઓને 5 અને 10 રૂપિયાના સિક્કા મોટી સંખ્યામાં લાવી આપવાની વાત કરતો.

ચિલ્લરની જરૂરિયાત હોવાથી વેપારીઓ આરોપીની વાતમાં આવી જતા હતા. ત્યારબાદ આરોપી વેપારીઓ પાસેથી 15 હજારથી લઈને એક લાખ રૂપિયા સુધીની રોકડ મેળવી લેતો હતો. પરંતુ રોકડ મળ્યા બાદ ચિલ્લર આપ્યા વિના જ આરોપી ફરાર થઈ જતો હતો. ફરિયાદ બાદ બાતમીના આધારે પોલીસે આરોપીને વસ્ત્રાલના તનમન ચાર રસ્તા પાસેથી ઝડપી પાડ્યો છે.

આરોપી મૂળ પાટણ જિલ્લાનો છે

પોલીસ તપાસમાં સામે આવ્યું છે કે આરોપી મૂળ પાટણ જિલ્લાના શંખેશ્વર તાલુકાના કુવર ગામનો રહેવાસી છે. આરોપીએ પરિચિતો પાસેથી ઉછીના પૈસા લીધા હતા. દેવું વધી જતા પૈસા કમાવવા માટે તેણે છેતરપિંડીનો રસ્તો અપનાવ્યો હતો. નિકોલ અને ઓઢવ વિસ્તારમાં આવેલી હોટેલ અને ખાણીપીણીની દુકાનો તેની નજરમાં રહેતી હતી.

આરોપી પહેલાં હોટેલમાં જમવા જતો અને સંચાલક સાથે વાતચીત કરીને વિશ્વાસ કેળવતો હતો. ત્યારબાદ ઓળખીતાઓ અથવા બેંકમાંથી 5 અને 10 રૂપિયાના સિક્કા લાવી આપશે તેમ જણાવતો હતો. વેપારીઓ પાસેથી રોકડ મેળવ્યા બાદ ચિલ્લર આપવા માટે નજીકની સોસાયટી પાસે બોલાવતો હતો. પરંતુ વેપારી ત્યાં પહોંચે તે પહેલાં જ આરોપી રોકડ લઈને ફરાર થઈ જતો હતો. એક વેપારી સાથે છેતરપિંડી કર્યા બાદ આરોપી એકથી બે મહિના સુધી ગાયબ થઈ જતો હતો.

સાતથી વધુ વેપારીઓને શિકાર બનાવ્યા

ત્યારબાદ ફરી નવા વેપારીઓને ટાર્ગેટ કરીને આ જ મોડસ ઓપરેન્ડીથી છેતરપિંડી કરતો હતો. પોલીસની પૂછપરછમાં આરોપીએ છેલ્લા બે વર્ષમાં સાતથી વધુ વેપારીઓને શિકાર બનાવ્યાની કબૂલાત કરી છે. આરોપીએ વેપારીઓ પાસેથી કુલ 4.60 લાખથી વધુની રકમ પડાવી હોવાનું સામે આવ્યું છે. હાલ રામોલ પોલીસે આરોપીની ધરપકડ કરી વધુ તપાસ હાથ ધરી છે. આ ગઠિયાએ અન્ય કેટલા વેપારીઓ સાથે આ રીતે છેતરપિંડી કરી છે. તે દિશામાં પણ પોલીસ તપાસ કરી રહી છે.