ઘરનો ભેદી જ નીકળ્યો ચોર, અમદાવાદના એક વેપારી સાથે જે થયું, તે સાંભળીને તમારા હોશ ઊડી જશે!

ઉદય રંજન, અમદાવાદ : મોટા શહેરોમાં પૈસાદાર પરિવારોમાં ઘરકામ માટે નોકર રાખવો એ કોઈ નવી વાત નથી, પણ શું તમે ક્યારેય વિચાર્યું છે કે તમારા રસોડામાં રસોઈ બનાવતો, તમારા ઘરની તિજોરીની આસપાસ ફરતો એ માણસ હકીકતમાં કોણ છે? અમદાવાદના શાહીબાગમાં એક કાપડના વેપારી સાથે જે થયું, તે સાંભળીને તમારા હોશ ઊડી જશે.

ઘરનો ભેદી જ નીકળ્યો ચોર

ગત 29 ઓગસ્ટના રોજ શાહીબાગ પોલીસ સ્ટેશનમાં ઘરફોડ ચોરીની ફરિયાદ નોંધાઈ, ત્યારે કોઈને અંદાજો નહોતો કે આ ચોરી પાછળ કોઈ પ્રોફેશનલ ગેંગ નહીં, પણ ઘરનો જ ભેદી છે. કાપડના વેપારીના ઘરમાંથી 35 લાખથી વધુની મતા ગાયબ હતી અને શંકાની સોય સીધી ઘરઘાટી કમલેશ પર હતી, કારણ કે ચોરીના દિવસથી જ તે પણ ગાયબ હતો.

અમદાવાદીઓ સાવધાન! નવરાત્રિ ટાણે આ જીવલેણ રોગનો રાફડો ફાટ્યો; ખાલી સોલા સિવિલમાં જ 14,372 દર્દીઓ નોંધાયા

35 લાખની ચોરીનો ખેલ

અમદાવાદ ક્રાઈમ બ્રાન્ચે જ્યારે સીસીટીવી ફૂટેજ અને ટેકનિકલ સોર્સની મદદથી તપાસનો દોર લંબાવ્યો, ત્યારે કમલેશનું લોકેશન છેક ઝારખંડ નીકળ્યું. ક્રાઈમ બ્રાન્ચે ફિલ્મી ઢબે ઓપરેશન પાર પાડીને આરોપીને ઝારખંડથી ઝડપી લીધો. પોલીસ પણ ત્યારે ચોંકી ગઈ જ્યારે આરોપી પાસેથી 33.52 લાખના સોનાના દાગીના, 1.43 લાખ રોકડા અને મોબાઈલ ફોન સહિત કુલ રૂ. 35 લાખથી વધુનો મુદ્દામાલ અકબંધ રિકવર થયો.

વિશ્વાસઘાતી નોકરનો પર્દાફાશ

જે વેપારીના ઘરમાં કમલેશ બનીને સેવા કરતો હતો, તે હકીકતમાં રાજસ્થાનના જોધપુરનો રીઢો ગુનેગાર જયંતીલાલ ઓસ્વાલ જૈન હતો. આ કોઈ સામાન્ય ચોર નથી, પણ ભલભલાને છેતરી જતો બહુરૂપી છે. જયંતીલાલ એટલો શાતિર છે કે તે જે પણ શહેરમાં, જે પણ ઘરમાં ચોરી કરવા જાય. ત્યાં પોતાની અસલી ઓળખ ક્યારેય આપતો નહોતો.

પોલીસ તપાસમાં ખુલ્યું છે કે તે ક્યારેક કમલેશ, ક્યારેક રમેશ તો ક્યારેક વિનોદ જૈન જેવા ખોટા નામો ધારણ કરીને જ ઘરોમાં ઘૂસતો હતો. આરોપી કોઈ પરિચિત મારફતે જ રેફરન્સ મેળવીને નોકરીએ ગોઠવાતો હતો જેથી કોઈને વહેમ ન જાય.

ધનિક જૈન પરિવારોને જ ટાર્ગેટ કરતો હતો

જયંતીલાલની મોડસ ઓપરેન્ડી કોઈપણ ક્રાઈમ થ્રિલર ફિલ્મને ટક્કર મારે તેવી છે. પોતે જૈન હોવાના કારણે તે જૈન ધર્મના રીત-રિવાજો બરાબર જાણતો હતો. આથી તે માત્ર ધનિક જૈન પરિવારોને જ ટાર્ગેટ કરતો હતો. ઘરમાં નોકરીએ રહ્યા બાદ તે પોતાની મીઠી વાતો અને સ્વાદિષ્ટ શુદ્ધ રસોઈથી પરિવારના દિલમાં જગ્યા બનાવી લેતો.

સીસીટીવી કેમેરામાં તેનો ચહેરો અને વાળ ન ઓળખાય તે માટે તે ઘરમાં ચોવીસે કલાક માથા પર ટોપી પહેરી રાખતો હતો. એકથી બે મહિના ઘરમાં રહીને તે તિજોરીની ચાવી ક્યાં મુકાય છે તેની રેકી કરતો અને મોકો મળતા જ હાથફેરો કરી લેતો.

પોલીસ ચોપડે નોંધાયેલી વિગતો મુજબ, આ આરોપી સામે અગાઉ સુરતના ખટોદરા અને ઉમરા પોલીસ સ્ટેશનમાં નોકર ચોરીના 6 ગુના નોંધાઈ ચૂક્યા છે. અમદાવાદની આ ચોરી સાથે હવે તેના પાપનો ઘડો ભરાયો છે અને કુલ 7 ગુના દાખલ થયા છે. આ કિસ્સો લાલબત્તી સમાન છે કે અજાણ્યા નોકરને રાખતા પહેલા પોલીસ વેરિફિકેશન કરાવવું કેટલું જરૂરી છે.