સિનેમા જગતમાં ક્યારેય ન પૂરી શકાય તેવી ખોટ; જાણીતા અભિનેતા નાના પાટેકરનું 75 વર્ષની વયે નિધન: ગોવામાં ઘરે આવ્યો હાર્ટ એટેક

Nana Patekar Death News: બોલિવુડના દિગ્ગજ અભિનેતા નાના પાટેકરનું ગુરુવારે સવારે નિધન થયાના સમાચાર મળી રહ્યા છે. મળતી માહિતી મુજબ તેમને ગોવા સ્થિત પોતાના ઘરે હાર્ટ એટેક આવ્યો હતો. તેમને બચાવવા માટે લગભગ 45 મિનિટ સુધી CPR આપવામાં આવ્યો, પરંતુ તેમને બચાવી શકાયા નહીં. નાના પાટેકરનું સવારે 5:20 વાગ્યે નિધન થયું હોવાના સમાચાર છે. તેમના નિધન બાદ મેડિકો-લીગલ કેસ (MLC) નોંધવામાં આવ્યો છે અને પોસ્ટમોર્ટમ કરવામાં આવશે.

ગોવાના ઘરમાં બેભાન હાલતમાં મળ્યા
રિપોર્ટ્સ અનુસાર, નાના પાટેકર ગોવાના ડોના પાઉલા સ્થિત પોતાના ઘરમાં સવારે બેભાન હાલતમાં મળી આવ્યા હતા. પરિવારજનો અને સ્ટાફ દ્વારા તેમને તાત્કાલિક નજીકની હોસ્પિટલમાં ખસેડવામાં આવ્યા હતા. સવારે 5:20 વાગ્યે ડોક્ટરોએ તેમને મૃત જાહેર કર્યા હતા. પ્રાથમિક તપાસ મુજબ તેમને કાર્ડિયાક અરેસ્ટ આવ્યો હતો. હોસ્પિટલ પહોંચાડ્યા બાદ ડોક્ટરોએ તેમને ભાનમાં લાવવા માટે લગભગ 45 મિનિટ સુધી અથાક પ્રયાસો કર્યા હતા, પરંતુ કોઈ સકારાત્મક પ્રતિસાદ ન મળતાં તેમને મૃત જાહેર કરવા પડ્યા હતા.

ચાર દાયકાથી વધુ લાંબી અને સફળ ફિલ્મી સફર
નાના પાટેકરે વર્ષ 1978માં આવેલી ફિલ્મ 'ગમન'થી પોતાના અભિનય કરિયરની શરૂઆત કરી હતી. તેમણે હિન્દી અને મરાઠી સિનેમામાં પોતાની આગવી શૈલી અને દમદાર ડાયલોગ ડિલિવરીથી લોકોના દિલ જીતી લીધા હતા. તેમની યાદગાર ફિલ્મોમાં પરિંદા, પ્રહાર, અંગાર, ક્રાંતિવીર, તિરંગા, ખામોશી અને અબ તક છપ્પન જેવી શાનદાર ફિલ્મોનો સમાવેશ થાય છે.

75 વર્ષની ઉંમરે પણ ફિટનેસ માટે જાણીતા હતા
તાજેતરમાં જ નાના પાટેકર પોતાની ફિટનેસને લઈને સોશિયલ મીડિયા પર ખૂબ ચર્ચામાં આવ્યા હતા. જાણીતા ફોટોગ્રાફર અને પ્રોડ્યુસર અતુલ કાસબેકરે તેમના સોશિયલ મીડિયા હેન્ડલ પર એક વિડીયો શેર કર્યો હતો. આ વિડીયોમાં 75 વર્ષના નાના પાટેકર એકપણ અટક્યા વગર સતત 15 'ટ્રાઈસેપ ડિપ્સ' કરતા જોવા મળ્યા હતા. વિડીયોના અંતમાં તેમના ચહેરા પરની સ્માઈલે ચાહકોનું દિલ જીતી લીધું હતું.

નાના પાટેકરના આગામી પ્રોજેક્ટ્સ
નાના પાટેકર તાજેતરમાં જ અક્ષય કુમાર, અભિષેક બચ્ચન અને રિતેશ દેશમુખ સાથે ફિલ્મ 'હાઉસફુલ 5' નો હિસ્સો બન્યા હતા. આ સિવાય તેઓ વિશાલ ભારદ્વાજની ફિલ્મ 'ઓ'રોમિયો'માં શાહિદ કપૂર અને તૃપ્તિ ડિમરી સાથે એક પોલીસ અધિકારીની ભૂમિકામાં જોવા મળ્યા હતા. સાથે જ તેમણે અક્ષય કુમાર અને રાધિકા મદાનની ફિલ્મ 'સૂબેદાર'માં પણ એક ખાસ કેમિયો રોલ કર્યો હતો. નાના પાટેકરનું નિધન ભારતીય સિનેમા માટે એક ક્યારેય ન પૂરી શકાય તેવી ખોટ છે.

હિન્દી અને મરાઠી બંને સિનેમાના અત્યંત પ્રભાવશાળી કલાકાર
વિશ્વનાથ પાટેકરનો જન્મ 1 જાન્યુઆરી 1951ના રોજ મહારાષ્ટ્રના મુરુડ-જંજીરામાં થયો હતો. નાના પાટેકરે પોતાની અભિનય કારકિર્દીની શરૂઆત રંગભૂમિ અને નાટકોથી કરી હતી. તેમણે 1978માં આવેલી ફિલ્મ 'ગમન' થી બોલિવૂડમાં પદાર્પણ કર્યું હતું. તેઓ હિન્દી અને મરાઠી બંને સિનેમાના અત્યંત પ્રભાવશાળી કલાકાર ગણાય છે. તેમની અનોખી સંવાદ શૈલી અને ગંભીર પાત્રો ભજવવાની આગવી શૈલી દર્શકોમાં ખૂબ લોકપ્રિય છે.

દેશના ચોથા સર્વોચ્ચ નાગરિક સન્માન 'પદ્મ શ્રી' થી નવાજવામાં આવ્યા
પરિંદા, ક્રાંતિવીર, અગ્નિસાક્ષી, ત્રિરંગા, ઘાતક, વેલકમ , અબ તક છપ્પન અને મરાઠી ફિલ્મ નટસમ્રાટ તેમની પ્રખ્યાત ફિલ્મો છે. નાના પાટેકર ભારતીય સિનેમાના એવા એકમાત્ર અભિનેતા છે, જેમણે બેસ્ટ એક્ટર , બેસ્ટ સપોર્ટિંગ એક્ટર અને બેસ્ટ વિલનત્રણેય શ્રેણીઓમાં ફિલ્મફેર પુરસ્કાર જીત્યા છે. તેમને શ્રેષ્ઠ અભિનય માટે રાષ્ટ્રીય ફિલ્મ પુરસ્કાર પણ મળી ચૂક્યા છે. ભારતીય કલા ક્ષેત્રે તેમના અમૂલ્ય યોગદાન બદલ ભારત સરકાર દ્વારા તેમને દેશના ચોથા સર્વોચ્ચ નાગરિક સન્માન 'પદ્મ શ્રી' થી નવાજવામાં આવ્યા છે.

નાના પાટેકર તેમની સામાજિક સેવાકીય પ્રવૃત્તિઓ માટે પણ જાણીતા
સામાજિક કાર્યો અને વ્યક્તિત્વ ફિલ્મો ઉપરાંત નાના પાટેકર તેમની સામાજિક સેવાકીય પ્રવૃત્તિઓ માટે પણ જાણીતા છે. તેઓ ખાસ કરીને મહારાષ્ટ્રમાં કાળઝાળ દુષ્કાળ કે મુશ્કેલીમાં મુકાયેલા ગરીબ ખેડૂતો અને તેમના પરિવારોની આર્થિક મદદ કરવા માટે સક્રિય રીતે કાર્ય કરે છે. તેઓ ભારતીય ટેરિટોરિયલ આર્મીમાં માનદ લેફ્ટનન્ટ કર્નલ તરીકે પણ સેવા આપી ચૂક્યા છે. નાનાએ ફિલ્મ ‘પ્રહાર’ માટે આર્મી ટ્રેનિંગ લીધી હતી. 1999માં કારગિલ યુદ્ધ દરમિયાન તેઓ સેનાની સાથે હતા. છેલ્લી વાર તેઓ પ્રકાશ ઝાની વેબ સિરીઝ ‘સંકલ્પ’માં જોવા મળ્યા હતા.