ફિલ્મ બિઝનેસને નવી દિશા આપવા ઝીનો મોટો નિર્ણય, કોમલ નાહટાને ક્રિએટિવ ડિરેક્ટર બનાવ્યા

Zee Entertainment : ફિલ્મ બિઝનેસને વધુ સ્પર્ધાત્મક બનાવવાના સતત પ્રયાસોના ભાગરૂપે, ઝી એન્ટરટેઇનમેન્ટ એન્ટરપ્રાઇઝિસ લિમિટેડ (Z)એ વિવિધ પ્લેટફોર્મ પર ક્રિએટિવ અને બિઝનેસ તાલમેલ વધારવા તેમજ વધુ પારદર્શક અને ન્યાયસંગત પ્રક્રિયાઓ સ્થાપિત કરવા માટે ઝી સ્ટુડિયોઝ અને ફિલ્મ એક્વિઝિશન વિભાગનું માળખું મજબૂત અને પુનર્ગઠિત કર્યું છે.

આ અભિગમના ભાગરૂપે, કંપનીએ ફિલ્મ બિઝનેસની સમગ્ર મૂલ્યશૃંખલા પર વ્યૂહાત્મક દેખરેખ રાખવા માટે ઉદ્યોગના અનુભવી કોમલ નાહટાની ફિલ્મ બિઝનેસના ક્રિએટિવ ડિરેક્ટર તરીકે નિમણૂક કરી છે. આ ફેરફારનો ઉદ્દેશ નિર્ણય લેવાની પ્રક્રિયાને સરળ બનાવીને, રોકાણની પ્રાથમિકતાઓને વધુ સ્પષ્ટ કરીને તથા નિર્માણ, કમિશનિંગ, ફિલ્મોની ખરીદી અને વિતરણ સંબંધિત કામગીરી વચ્ચે વધુ મજબૂત સહયોગને પ્રોત્સાહન આપીને કંપનીના ફિલ્મ ઇકોસિસ્ટમમાં વિકાસની ગતિ વધારવાનો છે.

સુવ્યવસ્થિત કરાયેલા નવા માળખા હેઠળ, સુરજ સિંહ અને ઝી સ્ટુડિયોઝની ટીમ નાહટાને રિપોર્ટ કરશે. તેઓ વિવિધ પ્લેટફોર્મ પર વ્યાપારી નિર્ણયો અને ફિલ્મોની ખરીદી સંબંધિત કામગીરી પર પણ દેખરેખ રાખશે. ખાસ કરીને હિન્દી અને અન્ય ભાષાઓની ફિલ્મો પર તેમનું વિશેષ ધ્યાન રહેશે.

નાહટા કંપનીના CEO પુનિત ગોયન્કાને રિપોર્ટ કરશે

તેઓ ફિલ્મ વિભાગમાં રોકાણને વધુ અસરકારક બનાવવા અને વિવિધ બજારોના પ્રેક્ષકોને પસંદ પડે તેવી વૈવિધ્યસભર ફિલ્મોની પસંદગી કરવા માટે ટીમો સાથે નજીકથી કામ કરશે. આ ભૂમિકામાં નાહટા ફિલ્મ બિઝનેસની સમગ્ર મૂલ્યશૃંખલા અંગે વ્યૂહાત્મક માર્ગદર્શન મેળવવા માટે કંપનીના ચીફ એક્ઝિક્યુટિવ ઓફિસર (CEO) પુનિત ગોયન્કાને રિપોર્ટ કરશે.

ફિલ્મ બિઝનેસના માળખાને સુવ્યવસ્થિત કરવાની આ પહેલ કંપનીની એટેન્શન ઇકોનોમીમાં મહત્તમ હિસ્સો મેળવવાની, ફિલ્મ વિભાગમાં કરાયેલા રોકાણમાંથી વધુ મૂલ્ય ઊભું કરવાની અને વધુ વિસ્તરણક્ષમ તથા ભવિષ્યની જરૂરિયાતોને અનુરૂપ માળખું તૈયાર કરવાની મહત્વાકાંક્ષામાંથી પ્રેરિત છે.

બિઝનેસમાં અમલમાં મુકાયેલા આ પ્રયાસો કંપનીને થિયેટર, ટેલિવિઝન અને ડિજિટલ પ્લેટફોર્મ પર પોતાની ફિલ્મ પોર્ટફોલિયો વ્યૂહરચનાને વધુ મજબૂત બનાવવામાં મદદ કરશે. સાથે જ મૂડીની ફાળવણી માટે વધુ શિસ્તબદ્ધ અભિગમને પ્રોત્સાહન મળશે.

પુનિત ગોયન્કાએ શું કહ્યું?

નિમણૂક અંગે બોલતાં ઝી એન્ટરટેઇનમેન્ટ એન્ટરપ્રાઇઝિસ લિમિટેડના ચીફ એક્ઝિક્યુટિવ ઓફિસર પુનિત ગોયન્કાએ જણાવ્યું હતું કે, અમે અમારી વિકાસલક્ષી મહત્ત્વાકાંક્ષાઓ તરફ ઝડપથી આગળ વધી રહ્યા છીએ ત્યારે અમારા બિઝનેસ ઇકોસિસ્ટમના મુખ્ય સ્તંભોને સતત મજબૂત બનાવવું અમારા માટે અનિવાર્ય છે. આ પગલું વધુ સ્પષ્ટ અને કામગીરી આધારિત કાર્યકારી માળખું ઊભું કરવાની અમારી લાંબા ગાળાની પ્રતિબદ્ધતાને દર્શાવે છે.

અમે વિવિધ પ્લેટફોર્મ પર ફિલ્મોમાં કરાયેલા રોકાણનું મહત્તમ મૂલ્ય મેળવવા માટે સર્જનાત્મક સમજ અને વ્યાપારી શિસ્તને એકસાથે લાવી રહ્યા છીએ. મને વિશ્વાસ છે કે ફિલ્મ ઇકોસિસ્ટમની ઊંડી સમજ અને ઉદ્યોગમાં મજબૂત સંબંધોને કારણે નાહટા અમારી વિકાસયાત્રાના આગામી તબક્કામાં ટીમોને માર્ગદર્શન આપવા માટે વિશિષ્ટ રીતે સક્ષમ છે.

કોમલ નાહટાએ શું કહ્યું?

ઝી એન્ટરટેઇનમેન્ટ એન્ટરપ્રાઇઝિસ લિમિટેડના ફિલ્મ બિઝનેસના ક્રિએટિવ ડિરેક્ટર કોમલ નાહટાએ ઉમેર્યું હતું કે, હું ઝીની ETC ચેનલ સાથે તેના અત્યંત લોકપ્રિય બોલિવૂડ બિઝનેસ શોના હોસ્ટ તરીકે એક દાયકાથી જોડાયેલો રહ્યો છું. તેથી આ નિમણૂક મારા માટે ફરી પોતાના ઘર સાથે જોડાવા જેવી છે.

કંપનીના સ્થાપક સુભાષ ચંદ્રાજી અને CEO પુનિતજી દ્વારા મારા પર મૂકવામાં આવેલી શ્રદ્ધા અને સોંપવામાં આવેલી મોટી જવાબદારી પર હું ખરો ઉતરી શકું તેવી આશા રાખું છું, કારણ કે હું બંનેનો ખૂબ આદર કરું છું અને તેમને ખૂબ ચાહું છું.

ભારતીય ફિલ્મ ઉદ્યોગમાં ચાર દાયકાથી વધુનો અનુભવ ધરાવતા નાહટાને ઉદ્યોગના સૌથી પ્રતિષ્ઠિત અવાજોમાંના એક તરીકે ઓળખવામાં આવે છે. તેમણે કન્ટેન્ટનું મૂલ્યાંકન, પ્રેક્ષકોની પસંદગીઓ, બોક્સ ઓફિસના વલણો અને બદલાતા મનોરંજન ક્ષેત્ર અંગે ઊંડી નિપુણતા વિકસાવી છે.

ફિલ્મ ઇન્ફોર્મેશનના પ્રકાશક છે કોમલ નાહટા

કોમલ નાહટાએ ફિલ્મ ટ્રેડ એનાલિસ્ટ, સમીક્ષક, પ્રકાશક અને ટેલિવિઝન હોસ્ટ સહિતની વિવિધ ભૂમિકાઓમાં કામ કર્યું છે. તેઓ લાંબા સમયથી પ્રકાશિત થતું ફિલ્મ ટ્રેડ મેગેઝિન ફિલ્મ ઇન્ફોર્મેશનના પ્રકાશક છે અને ETC પર 10 વર્ષ સુધી બોલિવૂડ બિઝનેસ નામના ટ્રેડ શોનું સંચાલન કરી ચૂક્યા છે. તેઓ સિનેમા કેપિટલના સલાહકાર મંડળમાં પણ સેવા આપે છે.

પોતાની લાંબા ગાળાની વિકાસલક્ષી મહત્ત્વાકાંક્ષાઓને અનુરૂપ, કંપની ફિલ્મ ક્ષેત્રમાં પોતાની સ્પર્ધાત્મક સ્થિતિને વધુ મજબૂત બનાવવા માટે સતત પ્રયાસ કરી રહી છે અને આકર્ષક તથા વ્યાપારી દૃષ્ટિએ મજબૂત ફિલ્મ પોર્ટફોલિયો તૈયાર કરી રહી છે.

કોમલ નાહટાની નિમણૂક આ દિશામાં વધુ એક મહત્વપૂર્ણ પગલું છે. તે ફિલ્મ બિઝનેસનો વ્યાપ વધારવાની સાથે સમગ્ર મૂલ્યશૃંખલામાં સર્જનાત્મક ઊંડાણ અને આવક ઊભી કરવાની ક્ષમતાને વધુ મજબૂત બનાવશે.