Gold Rate Today: ત્રીજે નોરતે સોના-ચાંદીના ભાવમાં ઘટાડો, ઘટેલા ભાવે સોનું ખરીદવું હોય તો ફટાફટ આજનો રેટ જાણો

આજે નવલી નવરાત્રીનું ત્રીજું નોરતું છે. અંબા માતાની ભક્તિ અને ઉપાસનાના આ પર્વમાં સોના-ચાંદીના દાગીનાની જો ખરીદી કરવા માંગતા હોવ તો તમારા માટે સુવર્ણ તક છે કારણ કે સોના અને ચાંદીના ભાવ ગગડ્યા છે. આજના વાયદા બજાર અને રિટેલ બજારના ભાવ ખાસ જાણો.

આજનો સોના-ચાંદીનો ભાવ
IBJAની વેબસાઈટ પર જાહેર થયેલા આજના ખુલતા  ભાવ મુજબ 10 ગ્રામ 24 કેરેટ સોનાના ભાવમાં આજે 399 રૂપિયાનો ઘટાડો જોવા મળ્યો છે. જો છેલ્લા  24 કલાકના ભાવ જોઈએ તો સોનાના ભાવમાં 763 રૂપિયા ઘટ્યા છે. ઘટાડા બાદ આજે સોનાનો  ભાવ 147662 રૂપિયા પર ખુલ્યો છે. જ્યારે એક કિલો ચાંદીના ભાવમાં 923 રૂપિયાનો ઘટાડો નોંધાયો છે અને ભાવ 219372 રૂપિયા પર જોવા મળ્યો છે. છેલ્લા 24 કલાકમાં ચાંદી 1502 રૂપિયા સસ્તી થઈ છે.

અત્રે જણાવવાનું કે આ ભાવમાં મેકિંગ ચાર્જ અને જીએસટી સામેલ હોતા નથી. આ ભાવ એસોસિએશન દિવસમાં બેવાર જાહેર કરે છે. શનિવારે અને રવિવારે તથા જાહેર રજાઓના દિવસે સોના ચાંદીના ભાવ જાહેર કરાતા નથી.

કેરેટ પ્રમાણે ભાવ
કેરેટ પ્રમાણે ભાવ જોઈએ તો ફાઈન ગોલ્ડના એક ગ્રામના 14766 રૂપિયા છે જ્યારે 22 કેરેટ સોનાનો પ્રતિ ગ્રામ 14412 રૂપિયા, 20 કેરેટ પ્રતિ ગ્રામ 13142 રૂપિયા અને 14 કેરેટના પ્રતિ કેરેટ 9524 રૂપિયા છે. જ્યારે સિલ્વરનો ભાવ પ્રતિ કિલોગ્રામ 219372 રૂપિયા છે. 

વાયદા બજારના ભાવ
વાયદા બજાર MCX ના ભાવ જોઈએ તો બપોરે 1 વાગ્યાની આસપાસ સોનું 0.07 ટકાના વધારા સાથે 149650 રૂપિયાની સપાટીએ જોવા મળ્યું છે. એટલે કે વાયદા બજારમાં સોનું વધારા સાથે જોવા મળ્યું છે. જ્યારે એક કિલો ચાંદી 0.04 ટકાના વધારા સાથે 222972 રૂપિયાની સપાટીએ પહોંચી છે. એટલે કે વાયદા બજારમાં કિંમતી ધાતુઓ વધારા સાથે જોવા મળી છે.

આગળ શું રહેશે સ્થિતિ
આજે ભલે સોના અને ચાંદીના ભાવમા ઘટાડો જોવા મળ્યો હોય પરંતુ એક્સપર્ટનું માનવું છે કે આવનારા દિવસોમા ભાવ વધી શકે છે. કોમોડિટી એક્સપર્ટ એજય કેડિયાના જણાવ્યાં મુજબ ભારત અને ચીનમાં તહેવારોની સીઝન શરૂ થઈ ગઈ છે. જેના કારણે સોના ચાંદીની માંગણીમાં વધારો જોવા મળી શકે છે. આ ઉપરાંત ચીન સહિત દુનિયાના અન્ય દેશોની સેન્ટ્રલ બેંકો પણ ભરપૂર સોનું ખરીદી રહી છે. અજય  કેડિયાના જણાવ્યાં મુજબ આ બધા  કારણસર સોનું દિવાળી સુધીમાં 1.55 લાખ રૂપિયા અને ચાંદી 2.40 લાખ સુધી જઈ શકે છે.