ગોલ્ડ મેડલ જીતાડ્યો છતાં વૈભવ સૂર્યવંશીનું કપાયું પત્તું, ટીમમાંથી બહાર થવાનું સાચું કારણ આવ્યું સામે

India vs West Indies 1st T20 : લખનઉના એકાના સ્ટેડિયમમાં રમાઈ રહેલી ભારત અને વેસ્ટ ઈન્ડિઝ વચ્ચેની પાંચ મેચોની T20 શ્રેણીની પ્રથમ મેચ માટે યુવા બેટ્સમેન વૈભવ સૂર્યવંશીને ફરી એકવાર પ્લેઈંગ XIમાં સ્થાન મળ્યું નથી.

જાપાનમાં યોજાયેલી એશિયન ગેમ્સમાં ગોલ્ડ મેડલ જીતનારી ભારતીય ટીમનો ભાગ રહેલા આ 15 વર્ષીય ડાબોડી બેટ્સમેને તાજેતરમાં શાનદાર પ્રદર્શન કર્યું હતું. તે એશિયન ગેમ્સમાં ગોલ્ડ મેડલ જીતનાર સૌથી યુવા ભારતીય ખેલાડી બન્યો હતો. તેમ છતાં વેસ્ટ ઈન્ડિઝ સામેની આજની પ્રથમ T20 મેચ માટેની પ્લેઈંગ XIમાં તે સ્થાન મેળવવામાં નિષ્ફળ રહ્યો છે.

વૈભવ સૂર્યવંશીને કેમ કરાયો બહાર?

એશિયન ગેમ્સ દરમિયાન ભારતની બંને મેચોમાં વૈભવે ઇનિંગ્સની શરૂઆત કરી હતી. તેણે શ્રીલંકા સામે 38 રન અને પાકિસ્તાન સામેની ફાઇનલમાં 15 રન બનાવ્યા હતા. પડકારજનક પીચો પર તેની વિસ્ફોટક બેટિંગ અને આક્રમક અભિગમે સૌનું ધ્યાન ખેંચ્યું હતું.

ક્રિકેટ નિષ્ણાતોના મતે એશિયન ગેમ્સ દરમિયાન ટીમ મેનેજમેન્ટે પરિસ્થિતિ અને પ્રતિસ્પર્ધીઓને ધ્યાનમાં રાખીને એક ઓલ-રાઉન્ડર ઓછો રમાડવાનો નિર્ણય લીધો હતો, જેના કારણે વૈભવને ઓપનિંગ કરવાની તક મળી હતી. જોકે, વેસ્ટ ઈન્ડિઝ સામેની આ સિનિયર-સ્તરની શ્રેણી માટે ટીમે તેના સંયોજનમાં ફેરફાર કર્યો છે અને પ્લેઈંગ XIમાં ઓલ-રાઉન્ડરનો સમાવેશ કરવાને પ્રાથમિકતા આપી છે.

બોલિંગ કોચ મોર્ને મોર્કેલે શું કહ્યું ?

ભારતના બોલિંગ કોચ મોર્ને મોર્કેલે મેચ પૂર્વેની પ્રેસ કોન્ફરન્સ દરમિયાન વૈભવના ભવિષ્ય અંગે મહત્વપૂર્ણ નિવેદન આપ્યું હતું. તેમણે કહ્યું કે, દરેક જણ વૈભવની પ્રતિભાથી વાકેફ છે, તેમ છતાં વરિષ્ઠ ખેલાડીઓ સાથે ડ્રેસિંગ રૂમ શેર કરવો અને આવા વાતાવરણમાં સમય વિતાવવો તેની કારકિર્દી માટે અત્યંત ફાયદાકારક સાબિત થશે.

મોર્કેલે વધુમાં ઉમેર્યું કે, ભલે વૈભવને મેદાન પર રમવાની તક ન મળે, પરંતુ ટીમ બસમાં, ડગઆઉટમાં અને હોટેલમાં અનુભવી ખેલાડીઓ સાથે સમય વિતાવવાથી તેને તેની રમત સુધારવામાં મદદ મળશે.

પ્લેઈંગ XIમાં મોટો ફેરફારો

આ મેચ માટે ટીમે વૈભવના સ્થાને નમન ધીરનો ઓલરાઉન્ડર તરીકે સમાવેશ કર્યો છે. આ ઉપરાંત, જસપ્રીત બુમરાહની ગેરહાજરીમાં અર્શદીપ સિંહની વાપસી થઈ છે, જ્યારે વોશિંગ્ટન સુંદરના સ્થાને મયંક યાદવને પ્લેઈંગ XIમાં સ્થાન આપવામાં આવ્યું છે અને રવિ બિશ્નોઈના સ્થાને કુલદીપ યાદવનો સમાવેશ કરાયો છે.

ભારતની પ્લેઈંગ XI: સંજુ સેમસન, અભિષેક શર્મા, ઈશાન કિશન, શ્રેયસ અય્યર (કેપ્ટન), તિલક વર્મા, શિવમ દુબે, નમન ધીર, અક્ષર પટેલ, અર્શદીપ સિંહ, મયંક યાદવ અને કુલદીપ યાદવ.