જસપ્રીત બુમરાહ સંપૂર્ણપણે ફિટ છે, છતાં ન્યુઝીલેન્ડ સામેની વનડે શ્રેણીમાં નહીં રમે! જાણો કેમ

ભારતીય ટીમનો સ્ટાર ફાસ્ટ બોલર જસપ્રીત બુમરાહ ન્યૂઝીલેન્ડ પ્રવાસ દરમિયાન રમાનારી પાંચ વન-ડે મેચોની શ્રેણીમાં કદાચ રમતો જોવા ન મળે. આ કોઈ ઈજાને કારણે નથી, પરંતુ ટીમ મેનેજમેન્ટ દ્વારા ઘડવામાં આવેલી એક ખાસ રણનીતિનો ભાગ છે. અહેવાલો અનુસાર, બુમરાહ સંપૂર્ણપણે ફિટ છે, જોકે, ટીમ તેને આગામી ટેસ્ટ શ્રેણી માટે તૈયાર રાખવા માંગે છે.

નોટ આઉટ હતો નમન ધીર? હૈદરાબાદમાં ટીમ ઈન્ડિયા સાથે અન્યાય! સ્ટમ્પિંગને લઈને 5 મિનિટ સુધી ડ્રામા

મીડિયા અહેવાલ મુજબ, ટીમ મેનેજમેન્ટ ઈચ્છે છે કે બુમરાહ વન-ડે શ્રેણીમાં ભાગ લેવાને બદલે રેડ-બોલ ક્રિકેટની તૈયારીઓ પર ધ્યાન કેન્દ્રિત કરે. બુમરાહે અમદાવાદમાં ટેસ્ટ ક્રિકેટ માટેની તૈયારીઓ શરૂ પણ કરી દીધી છે. ન્યૂઝીલેન્ડ જવા રવાના થાય તે પહેલાં આ મહિનાના અંતમાં તે BCCI સેન્ટર ઓફ એક્સેલન્સ ખાતે પહોંચે તેવી અપેક્ષા છે.

ઈન્ડિયા Aની ત્રીજી મેચમાં રમી શકે છે

અહેવાલો એવું પણ સૂચવે છે કે બુમરાહના વર્કલોડને ધીમે ધીમે વધારવા માટે, તેને 6 નવેમ્બરથી શરૂ થનારી ઈન્ડિયા Aની ત્રીજી મેચમાં સામેલ કરવાની યોજના છે. આનાથી તેને 19 નવેમ્બરથી વેલિંગ્ટનમાં શરૂ થનારી પ્રથમ ટેસ્ટ પહેલા તૈયારી કરવા માટે પૂરતો સમય મળી રહેશે.

એક સૂત્રના જણાવ્યા અનુસાર, પ્રવાસ લાંબો હોવાથી બુમરાહના વર્કલોડનું સંચાલન કરવું એ પ્રાથમિકતા છે. ભારતીય બોલિંગ આક્રમણના મુખ્ય આધારસ્તંભ હોવાથી, ટીમ એ સુનિશ્ચિત કરવા માંગે છે કે તે ટેસ્ટ શ્રેણી માટે સંપૂર્ણ રીતે તૈયાર હોય. છેલ્લી વખત બુમરાહે ગયા વર્ષે પોતાના દેશમાં દક્ષિણ આફ્રિકા સામે મલ્ટી ડે મેચ રમી હતી.

ઈજા બાદ ટેસ્ટ ક્રિકેટમાં વાપસીની તૈયારી

આ વર્ષની શરૂઆતમાં ઘૂંટણની ઈજાને કારણે બુમરાહ શ્રીલંકા સામેની બે ટેસ્ટ મેચની શ્રેણીમાંથી બહાર થઈ ગયો હતો. ટીમ મેનેજમેન્ટ હવે એ સુનિશ્ચિત કરવા માંગે છે કે તે આગામી ટેસ્ટ મેચો માટે ઉપલબ્ધ રહે. આ બાબતે ટીમ સાથે સંકળાયેલા મુખ્ય હિતધારકો વચ્ચે અનેક તબક્કાની ચર્ચાઓ થઈ ચૂકી છે.

આ રણનીતિ માત્ર ન્યુઝીલેન્ડ પ્રવાસ પૂરતી સીમિત નથી. તેમાં આવતા વર્ષે ઓસ્ટ્રેલિયા સામે રમાનારી પાંચ ટેસ્ટ મેચની શ્રેણીને પણ ધ્યાનમાં રાખવામાં આવી રહી છે. ટીમનું મુખ્ય ધ્યાન વર્લ્ડ ટેસ્ટ ચેમ્પિયનશિપ પર હોવાથી, એવી રણનીતિ અપનાવવામાં આવી શકે છે જેમાં બુમરાહને ઓછી મહત્વની દ્વિપક્ષીય શ્રેણીઓમાં ઉતારવાને બદલે, મહત્વપૂર્ણ ટેસ્ટ મુકાબલાઓ માટે સુરક્ષિત રાખવામાં આવે.