દિલ્હીના સરોજિની નગર સ્થિત એવન્યુ ટાવર્સના ફ્લેટ્સની હરાજી રદ કરવાના NBCCના નિર્ણય અંગે ઝી ન્યૂઝના અહેવાલની મોટી અસર થઈ છે. સરકારી કંપની NBCCએ પોતાની ભૂલ સ્વીકારીને તેમાં સુધારો કર્યો છે. અગાઉ ફ્લેટ્સની હરાજી રદ કરવાને લઈને કોર્ટમાં કોઈ પણ પ્રકારની કાનૂની કાર્યવાહી ચાલી રહી હોવાનો ઇનકાર કરનાર NBCCએ હવે નવું Corrigendum (સુધારેલી સૂચના) જાહેર કરીને નવા ખરીદદારોને જાણ કરી છે કે કેટલાક યુનિટ્સને લઈને મામલો દિલ્હી હાઈકોર્ટમાં પેન્ડિંગ છે અને નવા ખરીદદારો પોતાના જોખમે હરાજીમાં ભાગ લે.
NBCC દ્વારા જાહેર કરવામાં આવેલી નવી સૂચનામાં કહેવામાં આવ્યું છે કે, "NBCCએ 28 ઓક્ટોબર 2026ના રોજ જાહેર કરવામાં આવેલી સૂચના મારફતે અગાઉની ઈ-હરાજીમાં 49 ફ્લેટ્સની બોલીઓ વહીવટી કારણોસર રદ કરી દીધી હતી.
હવે NBCC સ્પષ્ટ કરી રહ્યું છે કે, આ તમામ 49 ફ્લેટ્સને નવી હરાજીમાં ફરીથી સામેલ કરવામાં આવ્યા છે. આ 49 ફ્લેટ્સમાંથી કેટલાક યુનિટ્સ માટે બોલી લગાવનારા લોકોએ દિલ્હી હાઈકોર્ટમાં અરજી દાખલ કરી છે. તેમણે પોતાની બોલીઓ રદ કરવામાં આવવાને પડકારી છે. આવી સ્થિતિમાં NBCC નવા અરજદારોને ચેતવણી આપે છે કે તેઓ આ પરિસ્થિતિઓને ધ્યાનમાં રાખીને હરાજીમાં ભાગ લે. જો કોઈ નુકસાન કે દાવો થાય છે, તો તેની જવાબદારી NBCC લેશે નહીં.
આ પહેલા 6 નવેમ્બરે જ્યારે NBCC દ્વારા આ ફ્લેટ્સની નવેસરથી હરાજી માટે અરજીઓ મંગાવવામાં આવી હતી, ત્યારે NBCCએ નવા ખરીદદારો પાસેથી આ માહિતી છુપાવી હતી. તે સમયે NBCC તરફથી કહેવામાં આવ્યું હતું કે જમીન અથવા મિલકતને લઈને કોર્ટમાં કોઈ કેસ પેન્ડિંગ નથી. જોકે હકીકત એ છે કે તેના બરાબર એક દિવસ પહેલાં, 5 નવેમ્બરે જ કેટલાક લોકોની અરજી પર દિલ્હી હાઈકોર્ટે NBCCને નોટિસ પાઠવીને જવાબ માગ્યો હતો.
NBCC દ્વારા નવી હરાજી અંગે જાહેર કરવામાં આવેલી સૂચનામાં કહેવામાં આવ્યું હતું કે સૌથી ઊંચી બોલી લગાવનારાઓને નવી હરાજીમાં ભાગ લેવાની તક આપવામાં આવશે નહીં. પરંતુ હવે NBCCએ નવું શુદ્ધિપત્ર જાહેર કરીને સ્પષ્ટ કર્યું છે કે જેમની બોલીને તેણે સફળ જાહેર કરી હતી, તેમને જ નવી હરાજીની પ્રક્રિયામાં ભાગ લેવાની તક આપવામાં આવશે નહીં. તેનો અર્થ એ થયો કે સૌથી ઊંચી બોલી લગાવનારા એવા લોકો, જેમણે હાઈકોર્ટનો દરવાજો ખખડાવ્યો હતો, તેમના માટે હવે ફરીથી હરાજીમાં ભાગ લેવાનો માર્ગ ખુલ્લો થઈ ગયો છે.
આ ખરીદદારો દ્વારા દિલ્હી હાઈકોર્ટમાં દાખલ કરવામાં આવેલી અરજીમાં કહેવામાં આવ્યું હતું કે તેમણે હરાજીમાં સૌથી ઊંચી બોલી લગાવી હતી. આ બોલી NBCC દ્વારા નક્કી કરવામાં આવેલી રિઝર્વ પ્રાઇસ કરતાં પણ વધુ હતી. આમ છતાં તેમની હરાજી રદ કરી દેવામાં આવી હતી. એટલું જ નહીં, NBCCએ હરાજી રદ કરવા પાછળ કોઈ યોગ્ય કારણ પણ આપ્યું નહોતું. ઝી ન્યૂઝે પોતાના અહેવાલમાં સુપ્રીમ કોર્ટના ચુકાદાઓમાં આપવામાં આવેલા કાનૂની સિદ્ધાંતોનો હવાલો આપીને આ મુદ્દે સવાલો ઉઠાવ્યા હતા.
જોકે, NBCCના વલણને લઈને હજુ પણ અનેક સવાલો કોર્ટમાં પેન્ડિંગ છે. ખરીદદારો તરફથી સવાલ ઉઠાવવામાં આવી રહ્યો છે કે જ્યારે મામલો હાઈકોર્ટમાં પેન્ડિંગ હતો, તો પછી નવી હરાજીની પ્રક્રિયા શા માટે શરૂ કરવામાં આવી?
NBCC વિરુદ્ધની અરજી પર સુનાવણી ટળી! દિલ્હી હાઇકોર્ટમાં હવે 26 નવેમ્બરે સુનાવણી, NBCCએ હરાજીના નિયમોમાં સુધારો કર્યો #NBCC #supremecourt #news https://t.co/W5Ksl7d22Y
— Zee 24 Kalak (@Zee24Kalak) November 18, 2026
બુધવારે થયેલી સુનાવણી દરમિયાન હાઈકોર્ટમાં ખરીદદારો તરફથી હાજર રહેલા વકીલે કહ્યું હતું કે આ મામલે જ્યારે હાઈકોર્ટે 5 નવેમ્બરે સુનાવણી કરી હતી, ત્યારે કોર્ટે NBCCને સ્પષ્ટપણે પૂછ્યું હતું કે તેઓ હવે શું કરવા જઈ રહ્યા છે. તે સમયે NBCCએ કોઈ જવાબ આપ્યો નહોતો. પરંતુ સુનાવણીના બીજા જ દિવસે, માત્ર 24 કલાકમાં, તેમણે ફરીથી આ 49 ફ્લેટ્સની હરાજી શરૂ કરી દીધી હતી.
ખરીદદારોએ નવી હરાજીની પ્રક્રિયા પર પણ રોક લગાવવાની માગ કરી હતી. હાઈકોર્ટે પણ NBCCને ચેતવણી આપતાં કહ્યું હતું કે આ મામલાને વધુ બગાડશો નહીં.
NBCC તરફથી હાજર રહેલા વકીલે કોર્ટને જણાવ્યું હતું કે તેઓ અરજદારોના વાંધાઓ અંગે વિસ્તૃત જવાબ દાખલ કરશે. હવે આ મામલે આગામી સુનાવણી 26 નવેમ્બરે થશે. તે દિવસે કોર્ટ નક્કી કરી શકે છે કે NBCC દ્વારા શરૂ કરવામાં આવેલી નવી હરાજીની પ્રક્રિયા પર રોક લગાવવી કે નહીં.