'અમારા વિના NCPનું વિલીનીકરણ શક્ય નથી...' અજિત જૂથ અને શરદ પવાર વચ્ચે વધેલી નિકટતા પર ફડણવીસનું નિવેદન

મહારાષ્ટ્રના રાજકારણમાં હાલમાં ભારે હલચલ જોવા મળી રહી છે. નેશનાલિસ્ટ કોંગ્રેસ પાર્ટી (NCP)ના બે જૂથો વચ્ચે સંભવિત વિલીનીકરણ અંગે અટકળો તેજ બની છે. ઉલ્લેખનીય છે કે, અજીત પવારના નેતૃત્વ હેઠળનું NCP જૂથ મહારાષ્ટ્ર સરકારમાં ભાજપનો સહયોગી છે અને અજીત પવારના પત્ની સુનેત્રા પવાર નાયબ મુખ્યમંત્રી છે. આ સંજોગોમાં જો વિલીનીકરણ થાય, તો અજીત પવારના જૂથનું વલણ શું હશે, તેના પર ભાજપની ચાંપતી નજર છે.

પ્રણવ મુખર્જીને જોઈતી હતી PMની ખુરશી? સોનિયા ગાંધીએ આ રીતે સંભાળી હતી સ્થિતિ!

મહારાષ્ટ્રના મુખ્યમંત્રી દેવેન્દ્ર ફડણવીસે પણ આ ઘટનાક્રમ પર પ્રતિક્રિયા આપી છે. મંગળવારે મીડિયા સાથે વાત કરતા તેમણે કહ્યું કે, NCPના બે જૂથો વચ્ચે વિલીનીકરણ થશે કે કેમ, તે અંગે માત્ર શરદ પવાર અને સુનેત્રા પવાર જ સ્પષ્ટતા કરી શકે છે. તેમણે ભારપૂર્વક કહ્યું કે, આ બંને નેતાઓમાંથી કોઈએ પણ ભાજપ સાથે આવા કોઈ પ્રસ્તાવ અંગે ચર્ચા કરી નથી.

'અમારા વિના NCPમાં વિલીનીકરણ શક્ય નથી'

મંગળવારે મુંબઈમાં તેમના સત્તાવાર નિવાસસ્થાન ખાતે દિવાળી મિલન સમારોહ દરમિયાન પત્રકારો સાથે વાત કરતા ફડણવીસે આ ટિપ્પણી કરી હતી. તેમણે કહ્યું કે, જો શરદ પવાર અને સુનેત્રા પવાર વિલીનીકરણ કરવાનો નિર્ણય લે છે, તો તેઓ અમને જાણ કરશે. અમારા વિના વિલીનીકરણ થઈ શકે નહીં. જોકે, અત્યાર સુધી આ બાબતે કોઈએ અમને કંઈપણ જણાવ્યું નથી.

'સુનેત્રા પવારની અજીત પવાર સાથે સરખામણી કરવી અયોગ્ય'

જ્યારે સુનેત્રા પવાર અને તેમના સ્વર્ગસ્થ પતિ અજીત પવાર વચ્ચેની સરખામણી વિશે પૂછવામાં આવ્યું, ત્યારે મુખ્યમંત્રી ફડણવીસે આવી સરખામણીઓને અયોગ્ય ગણાવીને ફગાવી દીધી હતી. તેમણે અજીત દાદાને એવા નેતા તરીકે વર્ણવ્યા જેમણે સમયની કસોટી પાર કરી છે, જેમને મહારાષ્ટ્રની ઊંડી સમજ છે અને રાજ્ય વિશે વ્યાપક જ્ઞાન છે. દાયકાઓના રાજકીય અનુભવ અને રાજ્યની રાજકીય ગતિશીલતા પરની ઊંડી પકડ ધરાવતા અજીત પવાર સાથે સુનેત્રા પવારની સરખામણી કરવી યોગ્ય નથી.

'સુનેત્રા પવાર પરિસ્થિતિ મુજબ ઢળી રહ્યા છે'

મહારાષ્ટ્રના મુખ્યમંત્રીએ વધુમાં જણાવ્યું કે, સુનેત્રા પવાર રાજકારણમાં નવા છે. તેઓ ધીમે ધીમે પરિસ્થિતિ મુજબ ઢળી રહ્યા છે. આવી સ્થિતિમાં, અજીત દાદા જેવા અનુભવી રાજકારણી સાથે તેમની સરખામણી કરવી અયોગ્ય ગણાશે. તેમણે ઉમેર્યું કે NCP જનસેવા માટે સમર્પિત છે અને સુનેત્રા, NCPના અન્ય વરિષ્ઠ નેતાઓ સાથે મળીને પક્ષનું સંચાલન કરવા માટે કામ કરી રહ્યા છે.

NCPના બંને જૂથો વચ્ચે સંભવિત પુનઃમિલનની ચર્ચાઓ

નોંધનીય છે કે દેવેન્દ્ર ફડણવીસનું આ નિવેદન એવા સમયે આવ્યું છે જ્યારે NCPના બંને જૂથો વચ્ચે સંભવિત પુનઃમિલન અંગે અટકળો ચાલી રહી છે. તાજેતરમાં પ્રફુલ્લ પટેલ અને છગન ભુજબળના નેતૃત્વ હેઠળ NCP (અજીત પવાર જૂથ)ના નેતાઓએ દિલ્હીમાં ગૃહમંત્રી અમિત શાહ સાથે મુલાકાત કરી હતી. ત્યારબાદ પ્રફુલ્લ પટેલે મુંબઈમાં હોસ્પિટલમાં દાખલ શરદ પવારની મુલાકાત લીધી હતી. હવે એ જોવાનું રહે છે કે NCPની અંદરના આ ઘટનાક્રમની મહારાષ્ટ્રના રાજકારણના ભવિષ્ય પર શું અસર પડશે.