સૌરવ-રાંકા પર કેમ હાઈકોર્ટ બગડી? બરાબરના ખખડાવી નાખ્યા, કહ્યું- તમે Gen Z નથી, બંનેએ અરજી પાછી ખેંચી

દિલ્હી હાઈકોર્ટે આજે કોકરોચ જનતા પાર્ટીના નેતાઓ સૌરવ દાસ અને આશુતોષ રાંકાની જામીન અરજી પર સુનાવણી હાથ ધરી. સુનાવણી દરમિયાન કોર્ટ લાલઘૂમ થઈ અને વેધક સવાલો કર્યા. જેનો સીજેપી પાસે કોઈ જવાબ નહતો. આખરે અરજી પાછી ખેચી લીધી. કોર્ટે સ્પષ્ટ શબ્દોમાં કહ્યું કે જંતર મંતર પ્રોટેસ્ટ સ્થળ તરીકે ડિનોટિફાય થઈ ગયું તો પછી ત્યાં શું કામ ગયા? કોર્ટે સીજેપીને એમ પણ કહ્યું કે, તમે લોકોએ SEM (સ્પેશિયલ એક્ઝીક્યુટિવ મેજિસ્ટ્રેટ) વિરુદ્ધ અપીલ કેમ ફાઈલ ન કરી? સીધા હાઈકોર્ટ કેમ આવી ગયા?

હાઈકોર્ટના વેધક સવાલો

• જસ્ટિસ સુબ્રમણ્યમ પ્રસાદની બેન્ચે આ મામલે સુનાવણી હાથ  ધરી. કોર્ટે સીજેપી તરફથી હાજર થયેલા વકીલ અભિક ચિમનીને યાદ અપાવ્યું કે તેમના અસીલે બેલ બોન્ડની શરતોનો ભંગ કર્યો છે અને તેના માટે  બીએનએસએસમાં કાર્યવાહીની જોગવાઈ છે. 
• જસ્ટિસ પ્રસાદે કહ્યું કે 11 ઓક્ટોબરે જ્યારે તમે બેલ બોન્ડને સ્વીકારી લીધા હતા, શ્યોરિટી આપવામાં આવી હતી અને જ્યારે  બેલ બોન્ડ તોડવામાં  આવે તો બીએનએસએસમાં કાર્યવાહીની જોગવાઈ છે. 
• કોર્ટે આકરી ટિપ્પણી કરતા કહ્યું કે, તમે કોણ છો? બોન્ડ તોડવાનું કારણ શું છે? તમે રિજીમ ચેન્જના નારા કેમ આપી રહ્યા છો? SEMએ શાંતિ ભંગ સંબંધિત ચિંતાઓ પર વિચાર કરવો પડશે.

અત્રે જણાવવાનું કે સ્પેશિયલ એક્ઝીક્યુટિવ મેજિસ્ટ્રેટે સૌરવ દાસ અને આશુતોષ રાંકાની જ્યુડિશિયલ કસ્ટડીનો સમય બે દિવસ માટે વધાર્યો હતો. આરોપીઓને 21 ઓક્ટોબર સુધી જ્યુડિશિયલ કસ્ટડીમાં મોકલી દીધા હતા. આ નિર્ણય વિરુદ્ધ સીજેપી કોર્ટમાં પહોંચી હતી. અરજીકર્તાના વકીલ અભિક ચીમનીએ  કહ્યું કે તેમની અરજી SEM કોર્ટના 19 ઓક્ટોબરના આદેશને રદ કરવા માટે છે. હાઈકોર્ટે સ્પષ્ટ કહ્યું કે તમે જિલ્લા મેજિસ્ટ્રેટ સામે રિવિઝન અરજી દાખલ કરી શકે તેમ હતા પરંતુ છતાં અહીં કેમ આવ્યા?

કોર્ટે બરાબરની ફટકાર લગાવી

• કોર્ટે સૌરવ દાસ અને આશુતોષ રાંકાને પહેલેથી જ પ્રોટેસ્ટ માટે ડિનોટિફાય કરવામાં આવેલા જંતર મંતર પર જવા અંગે  ફટકાર લગાવી અને વિદેશોમાં થઈ રહેલી હિંસક ઘટનાઓનો પણ ઉલ્લેખ કર્યો. 
• કોર્ટે કહ્યું કે તમે બેલ બોન્ડ આપ્યું અને ત્યારબાદ ફરીથી જંતર મંતર ગયા. જે પહેલેથી જ ડિનોટિફાય કરેલું છે. 
• ડિનોટિફાય કરવાનો મામલો સુપ્રીમ કોર્ટ સામે પેન્ડિંગ છે. નોટિફિકેશન પર સ્ટે લાગ્યો નથી. 
• તમે ત્યાં જાઓ છો, પગલું ભરો છો, ખોટું કે સાચું પરંતુ તમે ત્યાં ગયા. 
• જ્યારે તમે ત્યાં જાઓ છો અને બેરિકેડ તોડો છો, 10-12 અન્ય લોકોના જવાથી કલમ 164 તોડવાની સંભાવના ઘણી વધી જાય છે. એવા પણ લોકો હોઈ શકે જે તમારા કાબૂમાં ન હોય અને ગડબડી કરે. 
• જજે એમ પણ કહ્યું કે અમે જોઈ રહ્યા છીએ કે આપણા દેશની બહાર શું થઈ રહ્યું છે. 
• જે એક વિદ્યાર્થી આંદોલન તરીકે શરૂ થયું હતું તે હવે આગચંપી અને લૂટફાટમાં ફેરવાઈ ગયું. 
• તમે શાંતિપૂર્ણ કહીને કઈક શરૂ કર્યું. મુદ્દો એ છે કે તમે તેને કંટ્રોલ કરી શકતા નથી. 
• કોઈ હેતુ માટે તમે પોલીસ પાસે મંજૂરી લો છો. પોલીસની મંજૂરી  ફક્ત તમને રોકવા માટે નથી. તે એના માટે પણ જરૂરી છે કે અનિચ્છનીય લોકોને તમારી વચ્ચે ઘૂસતા રોકવામાં આવે જે તમારું નામ ખરાબ કરી શકે છે.

Gen-Z મુદ્દે પણ બરાબરની  ઝાટકણી કાઢી

સુનાવણી દરમિયાન કોર્ટે આશુતોષ રાંકા અને સૌરવ દાસને ઝેન જી તરીકે સ્વીકારવાની પણ ના પાડી દીધી. કોર્ટે કહ્યું કે તમારી ઉંમર કેટલી છે? તો રાંકા અને દાસના વકીલ ચિમનીએ કહ્યું કે સૌરવ દાસ 27 વર્ષના છે અને આશુતોષ 32 વર્ષના છે. જેના પર કોર્ટે કહ્યું કે, તમે લોકો જેન ઝી નથી. જેન ઝી કોણ છે? કોર્ટે જણાવ્યું કે 1997 બાદ જન્મેલા લોકો જેન ઝી કહેવાય છે. કોર્ટે ફરી કહ્યું કે તમે જેન ઝી નથી.