મધરાતે નિર્ણય લેવાતા આખરે અટકી ગયું ACP વિવેક ભગતનું 'પ્રમોશન', મહિલા પત્રકારોએ લગાવ્યો છે ગંભીર આરોપ

ચૂંટણી પંચના મુખ્ય ચૂંટણી કમિશનર જ્ઞાનેશકુમાર સામે ચાલી રહેલા વિરોધ પ્રદર્શન દરમિયાન એક મહિલા પત્રકારે દિલ્હી પોલીસના એસીપ વિવેક ભગત પર શારીરિક ઉત્પીડનનો આરોપ લગાવ્યો હતો અને દિલ્હી સરકારે વિવેક ભગત સહિત 12 અધિકારીઓને એડિશનલ ડીસીપીનો કરન્ટ ડ્યૂટી ચાર્જ સોપ્યો. એટલે કે વિવેક ભગતનું પ્રમોશન કર્યું. પરંતુ હવે જે સમાચાર આવી રહ્યા છે તે મુજબ દિલ્હી સરકારે પોતાના આ આદેશમાં ફેરફાર કર્યો છે અને એસીપી વિવેક ભગતને તેમાંથી બાકાત કર્યા છે. મહિલા પત્રકારના આરોપ મામલે હાલ તેમની સામે તપાસ ચાલુ છે. સરકારે શું કહ્યું તે ખાસ જાણો.

કેમ હટાવ્યું વિવેક ભગતનું નામ?
આ મામલે સરકારે જણાવ્યું કે વિવેક ભગતે પોતે કહ્યું હતું કે જ્યાં સુધી તેમની સામે ચાલી રહેલી તપાસ પૂરી ન થાય ત્યાં સુધી તેમને વધારાનો ચાર્જ સોંપવામાં ન આવે. દિલ્હી સરકારે પોતાના સત્તાવાર એક્સ હેન્ડલ પર મોડી રાતે કરેલી એક પોસ્ટમાં જણાવ્યું કે દાનિપ્સ (દિલ્હી આંદમાન નિકોબાર ટાપુ સમૂહ પોલીસ સેવા)ના 12 અધિકારીઓને એડીસીપીના પદનો કાર્યભાર સોંપવા મામલે પાંચ ઓક્ટોબરે જે આદેશ બહાર પાડવામાં આવ્યો હતો તેમાં વિવેક ભગત મામલે સંશોધન કરાયું છે. જે મુજબ આ અધિકારીઓને વધારાનો ચાર્જ સોંપવાનો પ્રસ્તાવ 25 ઓગસ્ટના રોજ શરૂ કરાયો હતો અને તે વર્તમાન ઘટનાક્રમ કરતા ઘણો પહેલાનો છે. જરૂરી ફેરફાર બાદ આદેશ પાંચ ઓક્ટોબરે બહાર પાડવામાં આવ્યો હતો.

પોસ્ટમાં વધુમાં જણાવવામાં આવ્યું છે કે, વર્તમાન કાર્યભાર સોંપવો એક હંગામી વ્યવસ્થા છે જેનાથી કોઈ નાણાકીય લાભ મળતો નથી. આ સાથે જ જે અધિકારીઓને એડીસીપીનો કાર્યભાર સોંપવામાં આવ્યો છે તેઓ નિયમિત રીતે નિયુક્ત એડીસીપી દ્વારા થતી બંધારણીય જવાબદારીઓનું કામકાજ સંભાળી ન શકે.  તેમાં કહેવાયું છે કે જો કે વિવેક ભગતે સ્વેચ્છાએ ભલામણ કરતા કહ્યું કે મહિલા પત્રકારોના કથિત ઉત્પીડન મામલે તપાસ પૂરી થયા અને તેના સંતોષજનક રીતે તારણ પર ન પહોંચાય ત્યાં સુધી તેઓ વર્તમાન કાર્યભાર સ્વીકારશે નહીં.

પોસ્ટ મુજબ તેને ધ્યાનમાં રાખીને પાંચ ઓક્ટોબરના આદેશમાં સંશોધન થઈ રહ્યું છે અને વર્તમાન કાર્યભાર સોંપવા સંબંધિત આદેશ બાકી 11 અધિકારીઓ અંગે ફરીથી બહાર પાડવામાં આવશે.

શું હતો મામલો

• અત્રે જણાવવાનું કે એક અધિકૃત આદેશમાં ભગત સહિત 12 અધિકારીઓને એડીસીપીનો કાર્યભાર સોંપવામાં આવ્યો હોવાની જાણકારી આપવામાં આવી હતી. 
• આ આદેશમાં તત્કાળ પ્રભાવથી દિલ્હી પોલીસમાં તૈનાત 12 DANIPS અધિકારીઓને વધારાના DCP પદનો કરન્ટ ડ્યૂટી ચાર્જ સોંપવાની મંજૂરી આપવામાં આવી હતી. 
• મહિલા પત્રકારે જેમના પર શારીરિક ઉત્પીડનનો આરોપ લગાવ્યો છે તે વિવેક ભગત પણ તેમાં સામેલ છે. 
• હાલ તેઓ કર્નોટ પ્લેસના સબ ડિવિઝનલ પોલીસ ઓફિસર (SDPO) તરીકે તૈનાત છે. 
• સરકારે એ પણ સ્પષ્ટ કર્યું કે CDCની આ વ્યવસ્થા હંગામી છે અને તે નિયમિત પ્રમોશન નહીં ગણાય
• આ અસાઈન્મેન્ટથી કોઈ નાણાકીય લાભ મળતા નથી. 
• અધિકારીઓએ તેને નિયમિત પ્રક્રિયાનો એક ભાગ ગણાવ્યો હતો અને કહ્યું હતું કે તેના માટે ભલામણ બહુ પહેલાથી મોકલવામાં આવી હતી. 
• આ યાદીમાં ડો. વિકાસ શ્યોકંદ, એ વ્યેંકટેશ, ગુરુસેવક સિંહ, રેણુ લતા, વિદૂષી કૌશિક, મનુ હિમાંશુ, સકારિયા મિહિર પ્રવીણભાઈ, ગરિમા  તિવારી, વિવેક ભગત, આશીષ કુમાર, મનિષ લાડલા, અને રોહત ગુપ્તા સામેલ હતા.

પત્રકારોએ શું આરોપ લગાવ્યા હતા
વિરોધ પ્રદર્શન દરમિયાન 3 મહિલા પત્રકારોએ જંતર મંતર પર ચૂંટણી પંચ વિરુદ્ધ ચાલતા વિરોધ પ્રદર્શન વખતે દિલ્હી પોલીસના 3 કેટલાક અધિકારીઓ પર શારીરિક ઉત્પીડનનો આરોપ લગાવ્યો હતો. પોલીસે જણાવ્યું કે તેમને આ મામલે ફરિયાદ મળી છે. જેની ક્રાઈમ બ્રાંચ તપાસ કરી રહી છે.