'SIR તો 2024 પછી આવ્યું, 2029માં પણ NDA જ જીતશે...' અમિત શાહના રાહુલ ગાંધી પર આકરા પ્રહારો

Amit Shah : ગૃહમંત્રી અમિત શાહે SIR અંગેના આરોપોને લઈને કોંગ્રેસ નેતા રાહુલ ગાંધી પર આકરા પ્રહારો કર્યા હતા. તેમણે કહ્યું કે, હું રાહુલને પૂછવા માંગુ છું કે, શું કોંગ્રેસ ગુજરાતમાં SIRને કારણે હારી ગઈ? તેમણે વધુમાં જણાવ્યું હતું કે ભાજપ ગુજરાતની સ્થાનિક સ્વરાજની ચૂંટણીઓમાં વિજયી બન્યું છે અને ઉલ્લેખ કર્યો હતો કે કોંગ્રેસ છેલ્લા 41 વર્ષથી રાજ્યમાં હારી રહી છે, તેમણે કહ્યું કે રાહુલ ગાંધીએ આત્મમંથન કરવું જોઈએ.

SIRનો મુદ્દો ઉઠાવતા ગૃહમંત્રીએ પૂછ્યું કે, ગુજરાતમાં કોંગ્રેસની હાર શું SIRને કારણે હતી કે પછી ભાજપ અને વડાપ્રધાન નરેન્દ્ર મોદીની લોકપ્રિયતાનું પરિણામ. તેમણે કહ્યું કે રાહુલ ગાંધી આ પરિણામો માટે SIRને જવાબદાર ઠેરવે છે, પરંતુ તેમણે આત્મમંથન કરવું જોઈએ.

કોંગ્રેસ 2029માં પણ હારવા માટે થઈ જાય તૈયાર: અમિત શાહ

અમિત શાહે કહ્યું કે, આ કોંગ્રેસે વિચારવા જેવી બાબત છે અને ભારપૂર્વક કહ્યું હતું કે રાહુલ દેશનો અવાજ નહી બની શકે. રાહુલ SIR દ્વારા ઘૂસણખોરોને બચાવી રહ્યા છે અને ગ્રામીણ વિસ્તારોમાં તેમની પહોંચ નથી. તેમણે 2029માં પણ હાર માટે તૈયાર રહેવું જોઈએ.

શાહે જણાવ્યું હતું કે ગુજરાતના મતદારોએ ફરી એકવાર નરેન્દ્ર મોદીના નેતૃત્વમાં વિશ્વાસ વ્યક્ત કર્યો છે. ગાંધીનગર મ્યુનિસિપલ કોર્પોરેશનમાં ભાજપે 44માંથી 38 બેઠકો જીતી હતી અને અગાઉની ચૂંટણીની સરખામણીમાં તેના વોટ શેરમાં 10%નો વધારો થયો છે.

આ પેટાચૂંટણીઓનો પણ ઉલ્લેખ

અમિત શાહે પશ્ચિમ બંગાળ, તમિલનાડુ અને પુડુચેરીમાં યોજાયેલી પેટાચૂંટણીઓનો પણ ઉલ્લેખ કર્યો હતો અને જણાવ્યું હતું કે કોંગ્રેસ આ ચૂંટણીઓમાં એક પણ બેઠક જીતી શકી નથી. તેમના જણાવ્યા અનુસાર, ભાજપે પશ્ચિમ બંગાળની નૌગાંવ બેઠક પર 1.42 લાખ મતોના અંતરથી જીત મેળવી હતી.

નંદીગ્રામમાં, ભાજપના ઉમેદવારે 76% મત મેળવ્યા હતા અને 1.22 લાખ મતોની સરસાઈ મેળવી હતી. રેજીનગરમાં, ભાજપ 75,000થી વધુ મતોના અંતરથી જીત્યું હતું. દરમિયાન, પુડુચેરીમાં, સહયોગી પક્ષ AINRCના NDA ઉમેદવાર 8,482 મતોથી જીત્યા હતા.