Gujarat News Live: ટ્રાફિક પોલીસ PSIએ નશામાં કર્યો અકસ્માત? ભરત પંડ્યા સામે ફરિયાદ, MLAના ઘરની સફાઈ માટે ફાયર ફાઈટરનો ઉપયોગ!

દાહોદના દેવગઢ બારિયાના ફાયર ફાઈટરનો એક વીડિયો વાયરલ થયો છે.  જેમાં MLA બચુ ખાબડના નિવાસે ફાયર ફાઈટર પહોંચ્યાના દ્રશ્યો સામે આવતા ચકચાર મચી છે. ફાયર ફાઈટરનો વીડિયો વાયરલ થતાં અનેક સવાલ ઉઠ્યા છે કે આખરે આ ફાયર ફાઈટર ત્યાં શાં કારણસર પહોંચ્યું? નગરપાલિકા કર્મચારીના જણાવ્યા મુજબ પ્રમુખ ધર્મેશભાઈ કલાલના કહેવા બાદ ફાયર ફાઈટર ત્યાં મોકલાયું હોવાનો દાવો કરાયો છે. જો સફાઈના કામ માટે ફાયર ફાઈટરનો ઉપયોગ થયો હોય તો નિયમ મુજબ ભાડું વસૂલાયું કે નહીં? ઈમરજન્સી વાહનના ઉપયોગ અંગે નગરપાલિકા પાસે કોઈ સત્તાવાર મંજૂરી કે નોંધ હતી કે કેમ? સમગ્ર મામલે નગરપાલિકા તંત્રની સત્તાવાર સ્પષ્ટતા મહત્વની બની છે. 
 

ભરૂચના અંકલેશ્વરની પાનોલી GIDCમાં હોસ્ટર લાઇફ સાયન્સ પ્રા. લી. કંપનીમાં ભીષણ આગ ફાટી નીકળી. રાત્રિના આશરે 2 વાગ્યે કંપનીમાં આગ ફાટી નીકળીતા કંપનીના કામદારોમાં નાસભાગ મચી ગઈ હતી. જાણ થતાં ફાયર વિભાગની ટીમો તાત્કાલિક ઘટનાસ્થળે પહોંચી ગઈ હતી. રાહતના સમાચાર એ છે કે ચાર જેટલા ફાયર બ્રિગેડની મદદથી પાણીનો મારો ચાલવી આગ પર કાબૂ મેળવામાં આવ્યો છે.  

નવા ભાડા કરાર વિધેયકને લઈને વકીલોની વિરોધ યથાવત જોવા મળી રહ્યો છે. આજથી વકીલો અચોક્કસ મુદ્દતની હડતાળ પર ઉતરશે.  બાર કાઉન્સિલ ઓફ ગુજરાતે પણ આ હડતાળને ટેકો જાહેર કર્યો છે. જેને કારણે હવે આમ જનતાની મુશ્કેલીઓમાં વધારો થઈ શકે છે. 

કિર્તી પટેલની સાથીદાર અને સસ્પેન્ડેડ મહિલા કોન્સ્ટેબલ નયના બારૈયાની સુરત પુણા પોલીસે ધરપકડ કરી છે. પુણા પોલીસ સ્ટેશનમાં નોંધાયેલા ખંડણી તેમજ આઈટી એક્ટ હેઠળના ગંભીર ગુનામાં તે લાંબા સમયથી નાસતી ફરતી હતી. સુરત પોલીસની સર્વેલન્સ ટીમે ટેકનિકલ વર્કઆઉટ અને લોકેશન ટ્રેસ કરીને આરોપી નયનાને સાસણગીરથી ઝડપી પાડી છે. મૂળ ભાવનગરના સિહોર પંથકની રહેવાસી ૩૩ વર્ષીય નયના બારૈયા સામે અગાઉ પણ અનેક ગુના નોંધાઈ ચૂક્યા છે. આરોપી મહિલા સામે ભાવનગરના વિવિધ પોલીસ સ્ટેશનોમાં મારામારી, પ્રોહિબિશન અને એટ્રોસિટી સહિત કુલ 6 ગુનાઓ નોંધાયેલા છે. સાસણગીરથી ધરપકડ બાદ પુણા પોલીસે મહિલા આરોપીને સુરત લાવી આગળની કાયદેસરની કડક કાર્યવાહી હાથ ધરી છે.

નવસારી શહેરમાં વધુ એક હિટ એન્ડ રનની ઘટના ઘટી. શહેરના તીધારા જકાતનાકા પાસે ગત મોડી રાતે ફૂલ સ્પીડમાં કાર હંકારી ચાલકે બે બાઈકને ટક્કર મારી. કારની ટક્કરમાં બાઈક ચાલકોને થઈ સામાન્ય ઈજા. મોડી રાતે ફૂલ સ્પીડમાં કાર હાંકનાર ચાલક નશાની હાલતમાં હોવાનું અનુમાન કરવામાં આવી રહ્યું છે.  અકસ્માત સર્જીને ભાગવાનો પ્રયાસ કરતા કાર ચાલકને સ્થાનિકોએ પકડી પાડ્યો હતો.  પોલીસને ઘટનાની જાણ થતાં ઘટના સ્થળે પહોંચી ચાલકનો કબ્જો લઈને તપાસ હાથ ધરી. નવસારીમાં એક અઠવાડિયામાં નશામાં ફૂલ સ્પીડમાં લોકોના જીવ જોખમમાં મૂકી કાર હાંકવાની ત્રીજી ઘટના જોવા મળી. એક અકસ્માતમાં તો એક આધેડે જીવ પણ ગુમાવવા પડ્યો હતો. 

રાજ્યમાં અકસ્માતોની વણઝાર યથાવત. ખેડાના માતરમાં ઈકો કારે રિક્ષાને ટક્કર મારતાં 3નાં મોત, 4ને ઈજા થઈ જ્યારે વડોદરાના સાવલી પાસે બે કાર સામસામે ટકરાતાં 2નાં મોત, 2ને ઈજા થઈ જોવાના સમાચાર છે.